Mi infancia mi a pase den un famia musical y semper mi a lanta rond di instrument y artistanan cu ta bin cas pa graba of traha cualkier cantica serca mi tata of mi omo, kende awe no t’ey mas. Mi tabata hunga voetbal y tabatin hopi amor p’e pero na caminda mi mester a dicidi entre musica of voetbal pa combina cu scol. Mi tata a siñami toca piano den 1 dia pa motibo cu mi a gaña juffrow na scol cu mi sa toca piano y diripiente nan a pidimi pa toca pa full e scol un dia despues durante e fiesta di pasco di scol. El a siñami toca jingle bells den 1 dia. Mayoria parti mi a bibe den un cas hopi humilde y mi hobby tabata bati riba bleki cu hemchi.

Mi primo Jermin Dijkhof tabata un di mi primonan mas pega cu a siñami toca cuarta y net e tempo ey mi omo na Hulanda a manda programanan pa nos di traha musica moderno. Asina Jermin a studia y improvisa e programa di traha beat y graba. Cu tempo mi tata a traha un studio na cas den sala. Semper mi tata ta traha durante dia, dus e unico ora p’ami traha ta di anochi marduga pa mainta. Mi a cuminsa traha musica tur dia te mainta, bai scol sin drumi y asina mi a keda pa añanan largo.

Mi infancia tabata diferente, nunca tabatin internet na cas manera tur otro hobennan, dus mi unico internet tabata traha muziek. Awor ta net 10 aña cu mi ta trahando e mesun orario nan ey den studio te cu dia di awe. Durante añanan mi a siña toca casi tur instrument tambe. Un gran parti di mi infancia tabata festivalnan cultural como tambe toca y canta den diferente Gaita.

E recuerdonan mas agradabel tabata e dianan cu mi por a comparti cu mi mama y tata hunto y tambe e temporadanan di bati riba bleki of hemchi y crea mi mesun musica.

E ambiente no tabata uno bon solamente pero el a influenciami na un manera cu mi a cuminsa haya inspiracion y un manera pa ‘uit’ mi mes.

Di mi experencia den studio mi tabata sinti bon ora di progresa of siña algo nobo. Semper mi a graba mas artista y tambe bandanan dus di esey tambe mi a siña hopi. Mi tabata rap, mi no tabata sa mucho di cantamento pero cu tempo mi a siña canta tambe. Riba escenario a bai mas dificil cu otronan, no tabata facil pa bende mi mes riba un stage como e BIGGY BOY dus mas cu nunca mi mester a crea un estilo cu ta hacimi unico riba stage y cantando riba esenario cu artistanan mas grandi, a ponemi siña hopi.

Temporada cu mi a participa pa prome ves na e roadmarch hubenil mi tabata mester un nomber. Mi ruman muhe Melanie a bin cu e nomber Biggy, Janiro Eisden cu a preparami e tempo ey pa bai Calypso y Roadmarch a dunami e nomber Don Biggy pero na final di dia, el a bira ‘Biggy boy’. Jeon tabata e nomber cu mi kier a duna mi yiu algun dia ora e nace, cual mi lo haci ainda si Dios permiti. Jeon ta bin di Jon door di Jonathan. Cu mi 18 aña mi a dicidi cu mi lo crea un otro artista mas despues cu ya caba tabata conoce mi como Biggy boy. Mi a cuminsa canta canticanan cu palabranan menos bunita pero cu a gara atencion di un ‘crowd’ nobo por ehempel den night club, rumshop etc etc y mi tabata hacie mas anonimo cu hende no sa cu ta Biggy boy, pasobra mi tabata haci e stem un tiki diferente.

Pero cu tempo, e canticanan di JEON tambe a cuminsa pega y mi mester a cuminsa presenta dus automaticamente tur hende a haya sa cu tami mes. Despues Biggy tabata esun cu ta canta love song y Jeon tabata esun ‘’malamucha’’. Na 2015 mi a bai Hulanda den cual temporada mi a drenta un etapa di madures y mi a dicidi di ta un solo artista. Mi tabatin tempo liber suficiente pa pensa ken mi ta di berdad y ken mi kier ta, dus na final di dia, mi a sinti cu mi mes a cambia como persona y mi no ta para mas pa canta palabra malo. Dus ora cu mi a graba Dushi Bida, mi a pone JEON y di e dia eynan, JEON a bira e artista cu mi ta desea di ta di berdad pasobra mi por tabata mas mi mes y tambe lo duna un mihor ehempel na esnan mas chikito.

Prome cu tur cos mi a bira un tiki popular riba mi isla ora cu mi a graba e cancion ’’E GAITON’’cu gaita Sensacionales. Cu mi 17 aña mi a inspira mi prome hit ‘’Mi kier bo ta felis’’ net e tempo ey mi tabata participando den e competencia di Sparkling Tour cual mi a yega te den e 10 nan na final, pero no a gana. Tabata net un dia despues cu e evento aki a pasa y mi a bai radio cu e cantica y sin por a pensa esaki lo bira un hit grandi riba isla nan ABC cu a ponemi cuminsa biaha mane loco pa e isla nan hunto cu Basic One den añanan 2008/2009.

Despues di e prome hit mi no a drumi mes mas riba mi carera, mi a sigi traha duro pa saca mi siguiente hitnan. Na 2009 mi a saca ‘’Si mi tin abo’’ y tambe ‘’Apesar di tur cos’’ y hopi mas…y sin por a pensa cu e canticanan aki lo bira un exito y Biggy boy tabata gusta pa e hubentud y na tur scol mas tanto pa e mucha muhernan.

Ora mi a saca cantica ‘Apesar di tur cos’ cu mi a ripara cu mi tin un mercado di tur edad cu ta sigui mi musica.

Mi ta saca cancionnan den tur tipo di ritmo of estilo pero ultimo tempo mi a kies pa haci un fusion di Regea y zouk… of kizas puru regea of puru zouk pero crea den mi estilo cu mi cuarta y wiri. Di tur cancion di pasado te cu awor, mi cancion favorito den e slow nan ta ‘It is what it is’ y den club song te cu awe ‘’Bon vibe’’ ta mi favorito.

Local mi semper a admira Basic One como cu mi ta produci mi mesun beatnan tambe semper mi a admira e producer Kurt Labadie. Na Corsow mi ta admira Levi Silvanie y Izaline. Internacional mi artista preferi ta Bruno Mars y Juan Luis Guerra pero segun lyrics, e artista cu mi ta admira ta Ricardo Arjona.

Berdad e aña ‘ki mi no a competi pero si mi a compone y aregla e tumba ganador di Jerrino Baas. Tambe mi a zorg pa un kavel y mi a bai admira carnaval e aña ‘ki pa por tin mas inspiracion pa futuro.

Kisaz pa otro nan no, pero desde Biggy boy mi a sinti cu Aruba a cuminsa apoya su mesun artistanan.

No ta existi union entre musiconan. Nos tin un gran cantidad di musico pero tiki evento, dus e BOLO ta chikito y tur hende kier biba di dje. Dus tur hende kier bringa pa nan pan, por ehempel kitando trabou di otro etc etc. P’esey nunca mi a drenta e business di toca den hotel paso eynan e cosnan ey ta pasa mastanto. Mi tata ta musico cu a toca mas cu 30 aña den hotel dus mi sa mayoria cos cu ta pasa. Di dos motibo ta cu gewoon nos ta biba riba un Isla cu envidia ta domina personanan cu no por wak e otro crece y ta bai keda hacie dificil pa un dia tin union, pero ban keda cu speransa cu un dia nos lo logra mira e union tan desea aki. Ami Personalmente ta apoya tur otro cu ta traha duro pa logra nan meta.

Mi lo prefera duna e conseho pa mihor bira artista y no cantante. Como artista bo por semper tin bo estilo y no tin regla p’e. Bo por crea bo mesun musica y promove loke ta sali for di bo curason pa otronan. Mi conseho ta pa pone Dios prome den bo bida y semper kere den bo mes pasobra soñonan ta bira realidad si bo keda kere den dje.

Nunca mi a traha, pa ta mas duidelijk, nunca mi a firma un papel di trabou of tabata para na cualkier trabou 4 of 8 ora. Ami nunca a traha un trabou normal. Semper mi a biba di musica y ainda bibando di dje. Mi sa cu tin hopi mayor cu no ta kere cu e por ta un profesion of algo cu por ponebo yega na tin un bon futuro. Danki Dios awe mi por a demostra na mi mayornan cu e ta posibel biba como un artista riba un isla asina chikito. Humildemente mi kier bisa cu ami no ta e mucha homber cu mami cu papi ta yuda financieramente. Mi ta riba mi mes y mi a ‘struggle’ hopi na caminda pero awe mi ta contento di por a yega te unda cu mi ta y ta contento cu tur loke cu mi tin.

Mi a topa cu diferente oportunidadnan y tin cu a pasami na caminda y tin cu a logra. Por ehempel ora cu Aventura a kibra, rumannan Max(Bahista)) y Lenny(Guitarista) a tuma contacto cumi pa forma parti di nan banda nobo pero pa un of otro motibo, e no a bai door, pero esey tabata e unico biaha cu mi a permiti algo asina pasa mi. Dj Chuckie a bin biba na Aruba y nos a logra conoce otro na un fiesta pa su casa cu el a ‘book’ Upgrade. Di e dia ey Chuckie a bisami cu e lo yudami yega na unda mi tin cu yega paso e ta mira mi tin hopi talento.

Na 2015 cu mi a bai biba na Hulanda diferente Record Label di Hulanda a reuni cumi y tabata hopi interesa. Mi no a firma cu ningun, mi a warda cu pasenshi pa sigui wak ki oportunidadnan mas tin. Te dia cu Dj Chuckie mes a presentami na Sony, mi a bai 2 reunion na Amsterdam cu nan y dia 11 di November 2016 mi a firma cu e compania mas grandi den mundo di musica. Te cu awor mi tin un contract di publishing cu nan y esaki a cuminsa 1 di januari 2017. Pronto lo mi firma un contract mas cu nan pero ora ta asina leu, lo mi lo comparti esaki tambe. Tin hopi cos pa pasa ainda den añanan venidero.

Paso ainda mi no a canta y dedica na otro idioma pero automaticamente cuminsando e aña ‘ki, tur hende lo cuminsa tende algo diferente y sin ningun duda, confiando den Dios, nos lo yega mas leu cu por.

Mi a ricibi mas felicitacion cu critica. Mi a aclarea riba medionan social cu mi tin 26 aña y no 16. Mi no kier promove of influencia ningun hoben pa bebe alchohol, loke mas mi a mustra na hobennan ta cu algun dia nan tambe por bira grandi pone nan mesun producto riba mercado. No mester ta alchohol, pero como mucha homber patriotico lanta crioyo den Santa Cruz, mi a dicidi cu esaki lo ta algo cu por keda pa semper. No solamente como alchohol pero kizas un souvenir pa pone den hogar di cualkier Arubiano.

Nan ta muchu hopi pa menciona y mi tin miedo di lubida un persona pero hopi hende a yudami den pasado y awor y mi ta hopi agradecido na tur. Pero mas cu tur hende mi kier djis gradici Dios pa pone cada un di e persona nan ey den mi caminda.

Mi mayornan sa cu semper mi ta scirbi di mi bida of cosnan cu ta pasa rond dimi. Mi ta un compositor hopi directo y riba e punto sin tira nada indirecto. No pa hende sa di mi bida pero pa hende cu ta biba loke ami tambe ta biba. Mi mayornan semper a apoyami te cu dia di awe nan no a bisami nada riba loke mi ta crea y mi relashon cu nan tur dos ta super bon. Actualmente mi por hasta bisa mihor cu nunca.

Di dia mi a conoce mi a bise cu pa semper lo mi ta cune, den bon y malo e tabata cumi y t’ey p’ami. E ta gustami y aceptami manera mi ta y ta compronde mi bida artistico. E ta un pilar principal di mi carera y mi negoshi. E ta nifica mi futuro casa y manera mayoria hende sa caba, e mes ta mi manager. Nos tin diferente plan pa futuro, pero e plan principal awor ta pa no tin yiu ainda y pa dedica na estudio y nos negoshi, pero segun Dios su tempo Jeon jr. tambe ta den nos plan pa futuro.

Extra info.

1. Nos ta 4 Ruman,Mi ta esun mas Chikito.
2. Mi ruman nan yama: Melanie,Rozanne y Jean Paul.
3. Mi mama yama Francia y mi tata Robert.