TATA – Stephen Richard Geerman

Stephen tin 34 aña di edad y ta Officer Risk Management na Stichting Algemeen Pensioenfonds Aruba (APFA). No obstante su dianan largo y e titulonan cu el a logra durante su carera, esun di ta tata di dos yiu muher, ta esun cu mas orguyoso e ta di dje.

Stephen a lanta den un hogar cu 2 ruman muher, un mayor cune di 4 aña mas grandi y un 8 aña mas jong. “Pa hopi aña mi tata a traha como docente na scol di polis y mi mama ainda ta trahando como huisarts na Savaneta. Door di esey mi a lanta toch den un omgeving cu mayoria di hende na scol por ehempel sa ken mi mama of yiu di ken mi ta”.

Esaki ta algo su Stephen semper a haña cu tin su ‘pro’ y su ‘contra’. Stephen ta conta cu e nunca a usa esaki como excusa pa haña trato preferencial pero tampoco e ta nenga for di unda el a bin of kico tur su mama a haci y ainda ta haciendo pa e comunidad di Savaneta. “E ideologia ey mi a keda lanta cune tambe, cu bo por yega na kico cu ta cu bo pone bo mente na dje, ‘as long as you work hard for it’. Mi ta bin di un famia cu mi descendientenan ta e prome hendenan na Aruba y specialmente na parti di Savaneta cu tabatin nan mesun negoshi. Por ehempel mi bisabuelo (Gregorio de Kort) tabata doño di Savaneta store y despues Family Store na Oranjestad. Dus pa tin ambicionnan grandi semper a core den mi sanger y mi a wordo lanta rond di dje”.

Stephen su hobby principal ta musica. For di su 13 aña e ta envolvi di un manera of otro den musica y esaki ta algo cu e ta disfruta. “Di chikito mi mama a pone mi rumannan y ami den les di piano. Despues di esey mi a cuminsa conoce otro instrumentonan y tambe cantamento ora mi a cuminsa bira teenager”.

Stephen ta di opinion cu locual ta haci un hende un bon tata ta pa por tin pasenshi. “Nos niun a nace sabiendo con pa ta un bon tata. Ta na nos mes pa wak kico e generacion prome a haci bon y malo y purba di tuma e miho lesnan di esey pa no ripiti e mesun erornan cometi. Den mi caso ta un tiki mas complica paso mi ta tata di 2 yiu muher. Mi prome yiu cu actualmente tin 7 aña, no ta biba aki na Aruba, dus esey ta haci pa wanta un band cune un tiki mas dificil. E ta un ‘give and take’ ora bo ta un tata separa of soltero, con cu bo kier yame. Eynan mester tin hopi pasenshi di tur banda. Mi di dos yiu muher tin actualmente 3 aña y esey ta pasa hopi tempo cumi y cu e edad cu e tin, pasenshi ta tur cos”.

Otro cos mi ta kere ta purba haña un balans entre ta un tata cu mester pone cierto reglanan y toch keda open suficiente cu bo yiu lo por aserca bo cu cualkier problema cu e lo tin un dia. Tur mucha mester structura, pero mi mes tin cu admiti cu tin ora ta hopi facil pa ta of pa bira hopi “laks” den e disciplina cu mester tey. E ta keda un ‘learning process’.

Stephen no ta kere cu por compara trabou, hobby y ser tata cu otro. “Mi no ta kere por compara e 3 cosnan aki cu otro. Of mihor bisa, si mi mester kies un volgorde, e prome semper lo ta pa ta e mihor tata cu por. E di 2 lo ta mi trabou y mi carera y e di 3 lo ta hopi. Den mi area di experticio mi tin e suerte cu semper tin diferente opcion pa trabou. Pero algo cu mi no lo haña bek nunca ta e tempo perdi cu mi no a pasa cu mi yiu. Aunke mi ta kere cu e ta importante pa un hende tin un hobby pa por expresa su mes, mi ta kere firme den tambe forma un base solido financieramente pa kico cu pasa cu mi yuinan no lo mester worry cu nada dia cu mi no t’ey mas. P’esey mi lo pone e volgorde aki”.

“Kico ta haci mi diferente na con mi tata a lanta mi ta cu mi t’ey emocionalmente mas pa mi yiunan of ta purba di ta. Specialmente mi yiu cu ta biba aki na Aruba. Tempo cu ami a nace ainda e pensamento tabata na Aruba cu ta e mama ta haci e trabou di lanta un yiu y no e tata. Como cu mi mama tabata bezig ta crece su practica di dokter, e funcion ey a cay hopi den man di otro hende manera familiarnan y ayudo cu nos tabatin na cas. Den esey mi ta completamente otro den e sentido di con ‘hands-on’ mi ta cu mi yiu. Y como tata soltero, mi no tin otro opcion tampoco”.

“Mi tata su personalidad ta hopi mas rigido cu esun dimi. Manera mi a menciona door di su trabou, ‘it’s all about order’. Esey ta algo cu ami ta hopi mas flexibel den dje. Pero si mi tin cu menciona algo bon cu mi a tuma over ta un tiki di esey. Tempo cu ami a crece no tabata tin tanto distraccion manera tin aworaki cu muchanan no ta enfoka por ehempel riba scol, etc”.

Stephen ta kere cu su experiencia di tin un yiu bibando afor, leu, ta siñ’e e importancia di tempo y con liher esaki ta pasa. “Mi mihor conseho ta pa pasa mas hopi tempo cu ta posibel cu bo yiunan. Hopi biaha mi sa wak den mi kring di conocido of amigo relacionan cu ta caba y e unico hende cu ta sali perdi ta e yiu. Si bo tin un tata cu ta purba y haci su maximo esfuerso pa tin un relacion cu bo yiu, mi ta kere aunke por tin contratiemponan manera distancia, un dia e yiu lo bin bek pa busca su tata”.