TATA – Jorge Zarraga

Jorge (40) ta corda cu desde hoben e tabata soña pa bira tata. Pero tabata te cu su 30 esaki a bira un realidad cu nacimento di su yiu Oliver. Di eynan, su otro yiunan a sigui cu ta Kyara (8), Mila (5),  Cynthia (2) y Juliet di 7 luna cu Orlando, su ‘bonus kid’, manera e ta yame, kende ta yiu di su esposa Sam. “Mi ta kere cu ta pasobra mi a bin di un famia grandi cu cinco ruman cu ami como esun mas responsabel, hunto cu mi mama (q.e.p.d) mi tabata yud’e zorg pa nan tur”. Unavez cu el a bira tata cu su prome pareha, bibando na Hulanda e momento ey cu tur retonan den mercado laboral, el a realisa e importancia y responsabilidad cu e rol aki ta trece cune. Determina semper manera e ta, Jorge a forma sumes den e area di mercadeo pa provee pa su famia hoben. Jorge a bolbe Aruba un poco mas cu 5 aña pasa unda 2 aña despues el a conoce Sam cu su yiu Orlando, a namora y hunto a forma nan hogar ampliando nan famia cu 2 yiu mas cu Cynthia y Juliet. Bida tabata simplemente perfecto y Cynthia, mas ainda…

“Ora mi a bolbe Aruba, mi a pidi universo y Dios pa mi topa un persona cu tin yiu manera mi y cu hunto nos por haya mas yiu na mi dushi isla Aruba y asina nos por traha nos hogar. Asina Cynthia a bin den nos bida. Su prome nomber a bin di mi mama, un persona cu tabata hopi special pa hopi hende cu a conoce tambe. E relacion cu mi yiu tabata unico, tur tempo cu mi tabata na cas, Cynthia tabata cumi. Como tata, tur nos yiunan ta unico y Cynthia Aurora Isabella tabata asina tambe. E tabata trece luz y felicidad serca tur hendenan rond dje. Tur caminda cu nos tabata sali, hende straño tabata bin cuminda y bisa nos palabranan bunita di dje. Su carisma tabata unico. Aparte di esakinan, e tabata un mucha hopi liher den tur cos; cu su 8 luna caba e tabata ripiti cierto reaccion of palabranan. Ya cu 2 aña e tabata papia hopi bon, e tabata zindelijk y tabata por a comunica den 4 idioma. E tabata hopi social mes c’un bon sentido di humor. Como un tata di 5 yiu, mi por bisa cu Cynthia Aurora Isabella tabata yena mi curason y bida 100%”.

E atardi di 31 di Mei a bira e dia cu e bida di Jorge, Sam y nan famia chikito a keda cambia pa semper ora Cynthia a hoga den un pool chikito. “Ningun hende lo ta prepara pa perde un yiu den nan bida. Hopi menos un yiu asina chikito manera Cynthia. Despues di e doloroso momento cu nos a pasa, momento cu nos tabata den sala di emergencia y cu nos a haya sa cu no por a haci nada pa nos evita e partida di nos yiu, el a kibra nos c’un dolor manera nunca mi a sinti den mi bida promer. Pero den famia nos ta wak bida den un forma diferente. Mi a siña di hopi chikito cu bida no ta solamente esun cu nos tin fisicamente y cu nos tur ta energia. Nos tur ta parti di Dios of universo. Nos creencia ta cu e momento c’un persona ta fayece, energia nunca ta muri, sino ta transforma.

E parti fisico no ta bay t’ey mas pero si e energia ta sigui su caminda na Dios y universo. Pero pa nos yiu por a sigui su ‘journey’, nos ta kere cu mester a dune energia positivo y no negativo manera culpa of rabia, pasobra esaki lo por trece unicamente descordia y destruccion serca nos tur. Nos a dicidi di accepta nos responsabilidad di e presente y no biba den pasado. Si bo ta puntrami si e partida di nos yiu ta haci nos dolor, mi contesta ta “si, e ta haci nos hopi dolor y nos ta haya su falta den nos bida increibelmente, pero pa honra nos yiu y por sigui di un modo spiritual apoyando su ‘journey’, nos a dicidi di tuma e caminda mas fuerte di no bay den consumi nos mes cu negativismo ni separashon, sino e contrario. Duna mas amor, mas tempo hunto, tuma e momento pa nos otro yiunan y ta un ehempel pa nos yiu, pasobra mi sa cu esey ta locual Cynthia lo tabata kier di nos. Pues pa nos ta mas conciente di nos bida”.

Jorge ta bisa cu e no tabata nada facil pa splica su otro yiunan di e partida di Cynthia Aurora Isabella pero mester a haci esaki, splicando kico a pas’e cu e no t’ey mas awor, pero sin drama y cu palabra normal, sin fantasia. “Muchanan mester keda trata cu respet y duna nan un splicashon normal. Mi por bisa c’un situashon asina den nos bida ta sea ta kibrabo of ta hacibo mas fuerte. No ta importa ken bo tabata prome, e cambio aki mester ta pa hacibo un mihor persona, c’un cambio den perspectiva general. Bida ta continua, nos cu ta den mundo fisico mester sigui. Nos ta duna hopi mas balor na famia, nos ta inverti mas tempo cu nos yiunan. Nos ta aprecia mas e awe, cu e soño di mayan”.

Como pareha, Jorge ta splica cu Sam cune ta mas uni y ta den hopi mas combersacion tur dia. “Pa un hende muher kizas e dolor ta mas duro of diferente pasobra e ta mas un dolor biologico cu pa e hende homber.

Pa por tin un idea, ainda Cynthia tabata haya lechi di pecho di su mama 2 of 3 biaha pa anochi. Cynthia tabata lanta yama su mama pa bebe lechi tur anochi. Sam ta un hopi bon mama y tabata purba extende e tempo di duna lechi di pecho na su yiunan mas cu e tabata por”.

“Ta importante pa bo ta mas conciente c’un yiu ta un bendishon di bida y ta un responsabilidad. Den cual sea cu ta e situashon cu bo ta na e momento aki y bo tin un yiu, bo mester sa c’un yiu semper, tardi of trempan, ta bay trece felicidad den bo bida. E por dunabo e forsa cu bo mes no tabata sa bo tin pa logra hopi otro cosnan grandi den bo bida den e momentonan di mas dificil. Si den un momento bo a pensa cu ningun hende ta simabo, bo yiu lo ta esun cu ta stimabo semper incondicionalmente. Habri bo wowo y mira bida den e momento di presente. Mira bo yiu den su wowonan y permiti bida, Dios, energia y e universo drenta bo curason. Realisa cu no tin nada mas den e mundo aki cu por yena bo curason manera e amor di un yiu. No warda te na e momento cu e no t’ey mas pa bo bira conciente di e importancia di tin bo yiu den bo bida”.