Despues di ta bibando 5 aña aisla Linda Evangelista ta cla pa comparti su storia personal den un entrevista cu e revista PEOPLE. Linda Evangelista (56) ta papia over di e dolor emocional y fisico cu a cubri su bida durante e ultimo añanan, despues di a somete su mes na e procedura conoci como CoolSculpting. Un procedimiento popular di “vries vet” aproba pa FDA cu ta wordo promovi como un alternativa noinvasivo na liposuccion. E proceso aki a laga Linda permanentemente deforma y brutalmente desfigura.
Despues di 3 luna cu e modelo a haci e tratamento aki, el a cuminsa ripara cu e areanan unda e tabata kier a vries e vet diripiente a cuminsa crece y a bira duro.
“Mi a purba soluciona esaki mi mes, mi a kere cu mi tabata haciendo algo malo” Linda ta bisa. El a cuminsa haci dieet y haci mas ehercicio, te yega na e punto cu e no tabata casi come nada.
Finalmente na Juni di 2016 ora el a bishita dokter ta unda el a wordo diagnostica cu PAH (Paradoxical adipose hyperplasia). Dr a bise cu no ta importa cuanto dieet e haci ni cuanto ehercicio e haci, niun tabata bay soluciona su situacion.
Ora cu su Dr. a tuma contact cu e compania di CoolSculpting tocante di su PAH e modelo compania a bisa cu nan lo kier haci e cosnan bon y lo ofrece pa paga pa un liposuccion c’un ciruhano cu e compania mes lo kies, cual ta un specialista cu Linda ta afirma cu nan lo a uza prome caba pa coregi e daño di PAH. Den vispera di su liposuccion Linda a wordo informa cu e compania lo cubri e gastonan solamente si e firma un acuerdo di confidencialidad, cual el a nenga di haci. E mes a cubri e gastonan di su prome liposuccion di curpa completo na Juni di 2016.
Despues di e cirugia Linda mester a haci uzo di diferente faha y productonan durante 8 siman, si no e efecto HAP por a bolbe aparece locual a sosode, incluso despues di su di dos liposuccion na Juli di 2017.
“E no tabata mustra ni un tiki miho” Linda ta bisa. “Si mi bisti un shimis sin faha, mi lo feila full te na e punto di casi sangra, paso nan no ta vetnan suave, e ta un vet duro”. E ta bisa cu su postura tambe a wordo afecta pasobra e no por pone su brasanan plat na banda, e no ta kere cu niun designers lo kier bisti’e asina.
Gran parti di su storia y su demanda ta pa recupera confiansa den su mes bek. “Dicon nos ta sinti e necesidad di haci esaki cu nos curpa? Semper mi tabata sa cu mi lo bira bieu y mi sa cu nos curpa ta pasa door di cierto cambionan pero simplemente nunca mi a pensa di mustra asina. Mi no ta reconoce mi mes”
“Mi ta spera di por laga los un poco di e berguensa y yuda otro persona cu ta pasando den e mesun situacion cu ami, esey ta mi goal”. Esaki ta un di e rasonnan principal cu el a kibra su silencio.
E procedura di CoolSculpting ta uno popular aki na Aruba aunke te dia di awe nos no tin ningun informacion di casonan similiar manera esun di e modelo Linda Evangelista.
