“Mi ta bay busca un futuro den futbol cu mi no por haya ‘kinan na Aruba”, ta e palabranan di Ricky Hodge riba un decision cu el a tuma pa cambia e rumbo di su bida. E delantero di e ekipo di Dakota ta subi avion awe tardi pa bay traha riba su soño di ta un futbolista profesional. Ricky a yega di hunga pa teamnan Nacional, Britannia RCA y Riverplate, semper cu e number 11.
Ricky ta conoci como un futbolista na Aruba pero tambe pa ta e yiu homber di Natalie Tromp y Hubert Kock (Ski) cu hopi tabata conoce como adictonan ambulante, ambos ya fayeci, pero riba kendenan semper Ricky a papia habri na tur cu kier a duna oido. Ricky, kende a lanta den un famia cu a dune amor, a siña di futbol y a lante leu di droga. Su origen no ta defini ken e ta pero si a siñ’e di scohe pa un bida saludabel semper. “Mi kier bay traha un mihor futuro pa mi yiunan”, e hoben di 25 aña a confesa na Xclusivo Magazine.
Xclusivo Online lo presenta un programa mas profundo di un entrevista cu nos a tene cu Ricky prome cu el a subi avion, rumbo pa Hulanda. Nos ta desea Ricky Hodge tur exito di mundo.
