SORPRENDI y INCORECTO, tabata e reaccion di Setar riba e recien ponencia cu tabata parse di ta dirigi riba e capacidad di SETAR pa por tin online schooling na Aruba.
E recien anuncio di gobierno di Aruba pa tene scolnan sera te cu dia 3 di September , 2020, ta un punto di discusion atrobe y tin grupo y opinionnan dividi riba esaki. E decision aki a bin despues di e cantidad di casonan di Covid-19 cu a aumenta y a hiba gobierno na dicidi pa extende e apertura di scol, cual tabata planea pa dia 20 di Augustus inicialmente.
Den un conferencia di prensa dialuna dia 17 di Augustus , Sra Glenda Hernandez di Crisis Team a haci e anuncio di e fecha nobo aki. Sinembargo e parti di e anuncio aki, sra Glenda a haci un ponencia unda a adverti scolnan cu tin pensa pa bin cu ‘online schooling’, pa NO haci esaki pasobra –“NO TA BEDOELING y nos infra-structura digital NO ta prepara pa esaki y lo STANCA”. Nos no ta prepara pa esey”, tabata e palabranan di sra Hernandez. E comentario tabata uno hopi fuerte haci den un conferencia di prensa di gobierno, p’esey nos di Xclusivo Online a aserca SETAR cu e pregunta riba e realidad tras di e ponencia aki.
Den nos combersacion cu SETAR nan a sigura nos cu sra. Glenda Hernandez ni tampoco otro persona di Crisis Team a tuma contacto cu SETAR y nan ta nenga cu e ponencia aki ta berdad, es mas, ta conoci cu SETAR a haci invershonnan cu a aumenta nan capacidad hopi mas ainda actualmente.
Awe mainta Minister di eseñansa, Rudy Lampe a tene un conferencia y tambe a desmenti esaki y bisa cu seguramente tin un confusion pa loke ta e comentario di Hernandez .
DIGITAL INTELLIGENCE PA MAESTRONAN
Durante conferencia aki tambe a anuncia cu ta bay cuminsa cu educacion y capacitacion na nos maestronan yama -Digital Intelligence- unda maestronan awor por bay haya educacion riba e parti aki, cual hopi biaha tabata bin dilanti como argumento di parti di maestronan pa loke ta online schooling
‘Nos Sistema di enseñansa a cambia 180 grado y nos no por keda tras. E pandemia aki a trece un cambio tur caminda riba asina tanto nivel na mundo unda educacion tambe a keda afecta, y Aruba no ta diferente. No por lubida cu tur mucha tin derecho riba educacion, sin importa e crisis tumando lugar na e momento specifico y ta responsabilidad di gobierno pa haci esaki posibel, segun UNESCO. “Nada no por stroba educacion” e Minister a bisa awe.
Segun un sondeo di departamento di enseñansa a haci desde cu scolnan a sera ta indica c’un ¾ di muchanan di Aruba a tuma parti na educacion via distancia y 64% di scolnan na Aruba a indica di tin un plan di emergencia ora mester kibra e presencia di enseñansa fisico. “Digital Skills ta un necesidad, riba tur nivel y enseñanza”, e Minister a bisa.
Pa loke ta posibilidad di e equipo y acceso na internet serca algun muchanan, e Minister a bisa di ta consiente di esaki y por ehempel ta spera cu por haya ayudo di SETAR pa por regla e ultimo factor. Setar a mustra mustra nan goodwill caba anteriormente regalando internet na un grupo di mucha y nos a compronde cu nan ta den proceso pa un otro gesto similar den e siguiente dianan.
Den un Cumbre Virtual cu ta bay tuma lugar awor, lo bay discuti tur e factornan cu ta strobando e digitalisacion y atende pa resolve esakinan.
