Julissa & Mary-Lynn di Paper Sisters

Paper Sisters ta un idea cu a nace por medio di un gusto mutuo di dos ruman pa ‘stationary’, cual a bira awe un negoshi den cual cu comunidad di Aruba por disfruta di un coleccion amplio di agenda, notebooks, journals y un sin fin di cosnan pa un y tur cu ta gusta papeleria. Lesa mas di e dos rumannan aki cu a haci di nan hobby, un tienda unico den su estilo aki na Aruba.

Julissa (25) y Mary-Lynn (31) a lanta den un cas cu mayornan cu a separa pero apesar di esaki, semper a zorg pa nan. “Nan semper a apoya nos den tur loke cu nos a haci y tabata streng pa nos bay bon den nos estudio”. Ambos a lanta den Santa Cruz y a bay Colegio San Antonio, despues Colegio Arubano na Playa pa finalmente bay studia na Hulanda. Julissa a studia International Communication & Media y Mary-Lynn a studia pa docente di e idioma Spaño.

“E idea a lanta simplemente door di nos tur dos cu ta gusta productonan ‘stationary’ y no por haña loke nos tabata busca na nos gusto na Aruba. Mi ta corda cu mi tabata trece diferente productonan di stationary pa Mary-Lynn ora mi tabata bin for di Hulanda. Despues nos a bin na realisa e ‘gap’ cu tabatin den e mercado pa esaki y asina nos a dicidi di purba riba nos mes, pues pa ofrece e tipo di productonan aki na mas hendenan di Aruba. Nos a cuminsa como un ‘pop-up store’, algo chikito na cas cu algun cliente. Nos a cuminsa promove via Facebook y ‘word of mouth’. Aña tras di aña, nos clientela a crece y nos ‘range of products’ tambe. Despues di mas o menos 2 aña di haci varios ‘pop-up stores nos a dicidi di tuma e ‘big step’ di habri nos mesun tienda pa tempo completo. Dia 30 di November 2019 ta dia nos a habri nos store na San Barbola”, Julissa ta conta. Locual e rumannan aki kier logra cu Paper Sisters ta pa crea un ‘environment’/lugar pa hende muher unda nan kier celebra, inspira y empodera nan mes. Unda otronan por ta creativo y sinti nan mes relaha door di e producto y servicionan cu nan ta ofrece.

Mary Lynn ta duna les na John Wesley College na Sanicolas y ta trahando flexibel p’asina e por combina su trabou como docente cu Paper Sisters. Di otro banda, Julissa actualmente ta trahando full-time na Paper Sisters. Esaki ta encera di ta e sales representative di tienda y e marca. Na mesun momento e ta haci e mercadeo pa Paper Sisters y otro proyectonan na banda den e mesun area aki. Como ruman, Julissa y Mary-Lynn sa kico cada un di nan ta bon den dje y ta aplica esaki den nan negoshi.“Claro e por tin su retonan pasobra nos ta dos hende cu diferente caracter pero esaki ta complementa otro tambe. E banda positivo ta cu nos ta gusta mesun cosnan y nos ta reta otro na pensa y bin cu ideanan creativo of maneranan cu nos por innova nos business of eventonan cu nos ta haci. Dus cu nos ta ruman y conoce otro asina bon y sa kico nos tur dos ta bon den dje, tin su partinan bon cual nos ta siñando ainda con pa traha cune pa nos beneficio”.

“Mentalidad na Aruba ta hopi conformista y cambionan ta sosode mucho poco poco. Esaki por limita un entrepreneur cu ideanan diferente y nobo. Bo ta haya bo mes ta sigui camindanan legal cu t’asina largo y costoso. Nos a experencia tambe cu departamentonan no ta traha hunto of no ta suficientemente informa cu consecuencia cu bo ta hayabo ta bay 2/3 biaha un solo lugar. Leynan na Aruba ta anticua y di un of otro manera, esakinan no ta keda actualisa y ta perhudica entrepreneurnan. En corto, Aruba su sistema mes ta hacie no atractivo pa young entreprenuers sigui p’adilanti”.

Julissa y Mary-Lynn ta bezig ta buscando e balans entre nan trabou y nan mesun bida ainda. “Prome nos tabata un ‘pop up store’ y tabata habri cada tanto temporada y esaki tabata pasa mayoria vez durante vakantie, pues e balans tabata facil pa haya. ‘It’s all fun and games’ pa tin bo mesun lugar, ta bo mesun hefe pero na mes momento esey kiermen cu bo lo mester bay balansa bo tempo liber tambe, cual muchu bo no lo tin, cu bo trabou. Julissa ta sigui conta: “Ami a yega di haña hende bisami cu negoshi den famia ta esun cu tin mas chens di fracasa. Pero den nos negoshi, t’e ainda ta famia ta loke a pone nos unda nos ta aworaki. E ayudo cu nos ta haña di nan t’asina ireemplasabel.

“Pa bo tin un business entre ruman/famia por ta un reto pasobra bo conoce otro hopi bon pero e ta bunita tambe pasobra bo sa bon kico cada un ta bon den dje. E comunicacion ta un punto hopi importante, Mester duna otro e espacio pa trece ideanan nobo. Ora di conflicto, nos ta conseha pa no tuma cosnan personal sino wak con por soluciona esaki den e mihor forma pa e negoshi. Ta importante pa corda cu bo ta trahando pa e mesun interes, cual ta e exito di e negoshi. E mihor conseho ta: communication is key!

NOMBER COMPLETO: Julissa Thaísa Dianne Ras
EDAD: 25 aña
ESTUDIO: International Communication and Media
PROFESION: Director Lynsa Group & Marketing Manager di Paper Sister

NOMBER COMPLETO: Mary-Lynn Antoinette Giana Ras
EDAD: 31 aña
ESTUDIO: FEF commerciele economie lerarenopleiding Spaans
PROFESION: Director Lynsa Group & Docente di Spaño