Imagina bo mes bo ta den un relacion di varios aña, bo tin dos yiu precioso, bo ta exitoso den bo profeshon y tumando retonan nobo. Toch ta yega un momento caminda cu bo ta realisa cu bo no ta completamente feliz. Tin algo cu no ta bon y eynan bo ta realisa cu bo tin atraccion pa un persona di bo mesun sexo y ta hayabo confronta cu e dilema, kico pa scohe p’e. Esaki ta locual cu a pasa cu Rowald Wever, un nurse di profesion cu a haya su mes ta scohe pa su felicidad realisando cu solamente si e como persona ta feliz, e lo por haci personanan rond di dje tambe feliz. Esaki ta un storia di corahe, amor propio y na final, di felicidad.
Perfil
Rowald a nace na Aruba y tin 37 aña. “Mi ta bin di un famia humilde c’un tata (q.e.p.d.) trahador cu a sa di traha duro y hiba su famia dilanti. Mi tata, cu su 33 aña, tabatin un negoshi cu tabata hopi conoci na Aruba cual tabata un funeraria renombra e tempo ey, Agencia Funeraria Zepp Wever. Esaki el a tuma over di su defunto welo y conhuntamente cu su tata, a sa di hiba e negoshi aki dilanti. Mi a lanta den un hogar cu no tabata falta nada, mi tabatin tur loke un mucha tabata kier.
Mi a bira tata na un edad relativamente hoben y hasta aki mi mayornan a sa di dunami e sosten necesario. Mi ta hopi agradecido na nan, apesar cu mi tata no t’ey mas. Mi tata a sa di siñami hopi cos den bida. Un di e lesnan cu el a siñami semper ta pa sa ken ta bo hendanan, trata tur pero no con a ningun. Placa por trece hopi amistad, pero ora no tin esey e amistadnan falso ey tampoco lo no t’ey mas. Asina bo ta siña sa ken ta bo amistad, coleganan y famianan di berdad”.
Educacion y profesion
“Mi no tabata e mihor studiante tempo di mi “studie-periode”. Mi a stop di bay scol den mi mavo, examenklas y a dicidi di bay traha”. Esaki tabata un decepcion grandi pa Rowald su tata. “Despues di 2 aña trahando, mi a realisa mi eror ora mi wak mi ex-klasgenoten cu vakantie na Aruba y ta papia di nan estudio na Hulanda. “Asina mi a cuminsa EPI pero nivel 3, mirando cu mi no a caba mavo”. Desde eynan Rowald a studia ‘nonstop’ pa logra su metanan y a logra haal su mavo te yega na su bachelor degree den nursing. “Mi a sali best geslaagde di full EPI y a keda reconoci e tempo ey pa Womens club of Aruba (WCA). E anochi aki tabata un hopi special p’ami, pero pa a mustra mi tata tambe cu mi tabata por y cu nunca ta laat pa siña y logra loke bo kier den bida”. Rowald a studia na Aruba, Corsow y su specialisacion pa nurse el a a hacinan via hogeschoolnan di Hulanda conhuntamente cu hospital.
“Ami ta un persona cu ta gusta yuda hende, y pa e motibo aki mi a drenta enfermeria y ta e trabou cu mi ta yama p’e. Mi gusta y ta stima mi trabou. E experiencianan di mas bunita cu mi por corda ta cu mi tabata bezig cu mi ultimo aña di mi HBO-V opleiding y mi a solicita pa bay traha riba Intensive of care. Mi a keda accepta y paar di luna despues mi mester a haci e opleiding di ICU combina hunto cu SEH. Danki na Dios tata na prome lugar y mi famia cu semper a dunami e sosten y apoyo na e momentonan ey. Mi yuinan tabata mi motivacionan di mas grandi pa den bida no faltanan nada.
Scohe pa mi mes
Algun aña atras, Rowald a tuma un desicion cu a cambia su bida completo. Rowald a realisa cu e no tabata completamente feliz den su bida casa y a sinti cu e mester ta honesto cu su mes y cu esnan rond di dje. Cu 34 aña, Rowald a dicidi di scohe pa un bida diferente na esun cu e tabatin.
“Realisa cu mi tabatin sentimiento pa un persona di mesun sexo cu mi na principio, a trece hopi desconfiansa den mi mes pero alaves a termina na hacimi mas fuerte. Rowald a scohe pa sumes y na mes momento, pa no sigui biba den un relashon di engaño.
“Mi sentimientonan pa mi pareha actual tabata creciendo y mi tabata y ta sintimi feliz cune. E bashi cu mi tabatin a keda yena. Paso apesar cu e mama di mi yuinan a haci tur cos pa e relacion por a sigui, mi no tabata haya cu e tabata merece esaki. E ta un muher fuerte y mi ta agradecido na dje pa a dunami e 2 tesoronan di mas bunita na e mundo aki. Apesar di tur e dolor cu mi por a cause semper e tabata t’ey p’ami. Kizas den futuro nos lo por ta amigo, pero p’awor y semper nos lo ta e mayornan di nos tesoronan. Esey ningun hende no por cambia. Mi a hacie dolor y a causa mi yuinan dolor na e momento ey.
Pero tabata mihor asina y sigui biba den un relacion cu no tabatin confiansa mas unda ami tabata sinti algo pa un otro persona cu tabata di mesun sexo cumi. Tabata momentonan duro p’ami y danki na esey mi por a wak ken tabata na mi banda. Hendenan cu mi tabata considera mi amigonan, coleganan cu mi a brinda mi apoyo y confiansa den nan, tabata precisamente, esunan cu a lagami na caya. Nan tabata esunnan cu mas a huzga, menosprecia y papia malo dimi.
Pero e personanan aki a hacimi mas fuerte awe y danki na nan mi ta ken mi ta awe y unda mi ta. Paso nan a mustrami cu riba e mundo aki, mi no mester aprobacion di ningun hende, mi no mester di nan pa mi ta feliz. Nan a mustrami cu hende ta keda hende, y nan t’ey solamente ora nan tabatin mester di mi.
E no tabata un desicion cu tabata planea of algo cu mi a yega di pensa cu lo pasa. No tabata algo cu mi por bisa cu mi a sconde henter mi bida y tabata scondi pa ‘sali’. Esaki absolutamente no tabata mi caso. Mi a scohe pa mi mes y por zona hopi egoista di mi parti, pero pa bo duna felicidad, bo mester ta feliz. Bo no mester biba pa loke hende ta pensa dibo. Abo como persona mester sa ken y esnan cu conocebo di berdad tambe sa ken e persona ey ta.
Esun cu semper lo t’ey pami incondicionalmente ta mi mama. Den mi momentonan bon y menos bon mami semper t’ey. Su palabranan ta locual a dunami forsa pa mi por a para riba mi pia bek, y mustra tur hende ken mi ta y cu nada no por kibrami, mi felicidad of mi relacion. Pero ricibi e apoyo di mi mama y scuche bisami ; “Mi yui, e ta haci dolor pero si abo ta feliz, mami ta feliz. Abo mester sa kico cu bo kier y no haci hende dolor”.
Rowald ta conta cu e decision aki no tabata uno facil, pero e tabata necesario pa su propio felicidad y tambe di esnan rond di dje. “Si tin algo cu mi no gusta ta haci hende dolor y mi a haci esaki. Tabata hopi dificil y no por a deal cu e situacion y tur cos tabata draai rond di mi.
Poco ta e hendenan cu sa den tur loke mi a pasa. Mi ta duna Dios danki pa por a dunami e forsa y corahe pa por a enfrenta esaki y mi ta pidie tur dia pordon pa e dolor cu mi por a causa.
Tur hende merece ta feliz, sin importa rasa, color, sexo, edad of e persona cu e ta. Berdad mi tin un persona nobo den mi bida y di mesun sexo cumi, pero esaki no ta hacimi menos hende y ni menos of mas homber. Mi ta keda e mesun Rowald, esaki no ta cambia mi personalidad. Loke bo ta pensa di mi no ta interesami, si ami ta feliz esey ta conta.
Mi ta feliz cu mi pareha, nos ta bon friends, gympartners y consehero di otro. Mi tin e sosten di mi famia locual ta mi mama y rumanan.
Mi yuinan, aunque no tabata un proceso facil pa nan, ningun dia nan a menospreciami of a alehami di nan. E hecho di tin e sosten y acceptacion di tur e personanan aki den mi bida ta hacimi feliz y ta mi motivacion pa sigui biba”
Conseho
“Pa bo por duna felicidad, abo como persona mester ta feliz. Scohe pa bo felicidad ta un stap grandi den bida, p’esey esaki ta un decision cu abo mes mester tuma. Tur hende por ta feliz, si nan mes kier y lucha pa nan mesun felicidad. No laga niun hende kibrabo, sino hacibo mas fuerte. Ami Rowald, kier ta un ehempel pa mas hende eyfor, cu bo no mester precupa cu opinion di hende sino percura pa bo mesun felicidad”
