Desde 1994, mi tabata traha part time den un gym despues di mi trabou administrativo na Den Haag, Hulanda. E doño di gym a bisami cu e ta wak cu mi gusta yude hende dus pakico no certifika mi mes. E la ofrece pa page p’ami y asina ey mi tabata viaha di Den Haag Pa Papendal (sede olympico) pa un aña largo pa mi certificacion. Despues mi a muda pa Aruba y a cuminsa train hende priva, e tempo ey na Body Friction Gym y Wyndham Hotel. Door di logronan cu varios Miss Aruba, Miss Teen y atletanan den Fitness, e demanda pa mi train mas hende a subi. Ora cu mi a nota cu sobrepeso y obesidad tabata subiendo na Aruba, mi a co-produci e exitoso show e tempo ei di Subway “Perde Pa Gana” cu a bay pa 6 aña. Mi ultimo certificacion cu mi a haal e aña aki 2017, ta un Master Class den nutrition di Precision Nutrition. Mi ta kere den keda educa bo mes constant riba bo tereno.
1. XCL: Ki tempo bo interes den deporte a intensifica y pakico?
R .Wild: Na momento cu mi a realisa cu eigenlijk mi trabao ta pa yuda hende sea baha peso, drecha nan fisico y salud of competi riba nivel. Mas cu tur cos mi a realisa con importante salud ta.
2. XCL: Kico ta e drempel cu ta haci cu hopi hende no ta drenta un gym of haci deporte?
R .Wild: Tin varios motibo; inseguridad, disiplina, motivacion, pasenshi, flohera, falta di condicion, ayudo profesional ta cosnan cu mi ta wak y tende di hopi hende.
3. XCL: Kico ta e top 5 problemanan mas grandi cu hopi hende ta haci den nan nutricion na Aruba?
R .Wild:
- Come demasiado cos dushi (sucu)
- Come hopi cumindanan prosesa (junkfood)
- Come no frekuentemente (salta cuminda)
- No come casi nada di berdura
- Come no balansa y porcionan muchu
4. XCL: Kico ta mas imporante ora di come pa ‘get fit’, e size di food portion of e carbohydrate total en cada cuminda?
R .Wild: Eigenlijke balans (portion,proteina, healthy fats, berdura, fruta y por ultimo carbohidrato). Djis pa aclarea, carbohidrato NO ta un nutrient esencial pa sobrebibi, pero si proteina, berdura, fruta y healthy fats ( nuts, avocado). Si carbohidratonan compleho ta recomendabel (quinoa, batata dushi)
5. XCL: Kico ta un meal plan y e ta algo individual pa cada hende?
R .Wild: A ser proba miles di biaha cu grandi NINGUN dieet ta funciona. Mayoria di biaha dieet ta ‘quick fix’ nan ta y bo ta subi e peso bek. Un plan di cuminda ta un ‘lifestyle change’ pa loke ta trata bo nutricion… algo mucho mas sostenibel y efectivo. Aunke pisca ta pisca, cada hende ta diferente y tin diferente meta of nesecidad
6. XCL: Orario di come ta importante?
R .Wild: Enrealidad no… debi cu por ehempel tin hopi prueba cu fasting (yuna) ta super beneficioso pa nos salud. Cu otro palabra of un ehempel ta cubo por scohe pa yuna di 8pm pa 10am y come bo prome cuminda (desayuno) 10.30am. Loke si ta importante ta, come balansa y frecuente (cada 3 pa 4 ora).
7. XCL: Tin hopi papia riba substancianan uza ora cu ta train, con esaki ta na Aruba?
R .Wild: Esaki ta algo mundial pero den mi opinion e ta algo personal. Si mi tin di bisa cu media y hopi di esnan cu no tin conocemento di e topico, ta exahera of papia cosnan cu no ta berdad. Claro cu tur cos tin su riesgonan pero hopi di e substancianan ey ta remedi. Un ehempel, un cortisol shot ta un steroid shot of pa mayoria di condicionan inflamatorio, ta uza steroids. Ta keda si cu nan ta ilegal y cu hopi ta haci uso sin conocemento.
8. XCL: Proteina y vitamina ta un ‘must’ ora di tene cuenta cu nutricion?
R .Wild: Proteina ta e nutriente dimas importante den mi opinion (proteina ta responsabel pa cabey, djente, hormone, sistema imun). Si bo ta papia di Protein shake, e ta djis proteina (carni, galinja,piska, webo) na polvo… dus e curpa ta absorbe mas liher. Esaki kiermen cu e tin su ventaha por ehempel despues di training. Vitamina ta esencial pa e metabolismo di e ser humano y parti di hopi proseso vital di e curpa.
9. XCL: Con importante cuminda ta na momento den comparacion cu bo ta training, dus cua tin mas importancia?
R .Wild: Cumindata 90% y ta importante na TUR momento…. no ora di train so. Un cos si… mihor come dos siman bon y no train cu train dos siman y come malo!. Nos mester realisa cu cuminda ta remedi, energia y esencial pa un bon salud.
10. XCL: Kico ta e foutnan cu hende ta keda haci ora di train cu no ta duna resultado segun bo?
R .Wild: Hopi hende no sa kico nan ta haci of tin di haci… dus nan ta train sin un plan. Otro cos cu mi ta wak hopi ta cu hopi no tin e tecnica corecto. Internet a trese hopi cos bon pero malo tambe… tin hopi ta copia un rutina of ehercicionan riba instagram of google y kere cu esei ta suficiente of cu e lo mester traha cu nan.
11. XCL: Bo ta kere hende lo por yega na nan meta sin tin mester di haci un dieet?
R .Wild: Manera ma menciona… dieet NO ta funciona. Si t’asina cu bo no por haya un fisico saludabel of atletico sin come apropia.
12. XCL: Juicing & Detox ta hopi popular, nan ta traha?
R .Wild: Mi ta haya asina jammer con hende ta cai den e creencia di Detox. No tin ningun prueba sientifico di esaki y mayoria no ta ni ripara cu nan por ta baha pero ta subi tur cos bek… dus ni haci limpi ni baha! Si bo meta ta pa detox (“haci limpi”) bo curpa, no perde bo tempo ni placa. Bo curpa ta traha pa detox su mes via e higra, urina, bai af y sodo. Un ehempel ta cu si por ehempel ba come un salada cu tabata contene lechuga daña y bo a bira malo. Esaki a pone bo stoma bira y bo ta saca….. esey ta un forma con bo curpa mes ta detox e “toxico” di e cuminda daña ei. Loke si bo por haci ta elimina sucu, cuminda prosesa y cumindanan cu vetnan malo.
Nota: caminda hopi hende ta cai aden ta e peso cu nan a baha durante e “detox”. E ta simpel… e ta tanto dia riba low calorie cu consecuencia cu e peso cu bo a baha ta mas muskulo y awa….no vet!
13. XCL: Kico ta e mytonan mas grandi cu hende tin riba nutricion y training hunto?
R .Wild:
- Keda sin come pa baha peso
- Hisa peso light pa hopi repiticion ta kima vet
- Haci hopi buikspier ta baha barika
- Hisa peso ta haci hende muher mustra manera un homber
- E fahanan cu sa bisti ta moldia figura of kima vet
14. XCL: Kico ta e cumindanan mas saludabel cu bo ta recomenda pa come tur dia?
R .Wild:
- Berdura (tur pero vooral berde y crucifero manera brocoli)
- Fruta (vooral berries)
- Boontji
- Pinda (nuts en general)
- Seeds (simiya manera pumpkin seeds, sunflower seeds)
15. XCL: Bo ta ripara un cambio pa loke a training mentality awor na Aruba
R .Wild: Pa loke ta movecion sigur mi ta wak hopi diferencia… mas hende ta move, mas gym pero caminda nos ta lack y masha hopi mes ta e parti comemento.
