1. XCL: Conta nos un poco di bo mes, unda bo a lanta y den ki tipo di hogar?
Mi nomber ta Jeanissa Maduro, mi tin 20 aña di edad y ta cumpli aña dia 17 di December,mi a nace na Hulanda y cu mi 3 aña mi a bin biba na Aruba hunto cu mi mama y mi 2 ruman homber nan. Di chikito mi ta gusta musica y mi semper a gusta baila, cu 12 aña mi a cuminsa baila den e grupo Popcorn club & Dancers y te awo ainda mi ta un popcorn soldier.. Durante mi añanan den Popcorn mi a logra 3 aña tras di otro e titulo di miho bailarina di aña, tambe mi a sali Popcorn soldier mas popular y tambe Trainer of the year. Mi a lanta den un hogar unda mi mama tabata mi tata tambe, semper mi mama tabata t’ey pami den tur momento, mi ta orguyoso di dje pa tur loke el a y ainda ta haci pa nos como mama soltera.
2. XCL: Na unda bo a bay scol?
Mi a bay Barney Speelschool, despues di eynan mi a bay Imelda Kleuterscool, despues mi a gradua y mi a bay Colegio Frere Bonifacius y ora mi a caba cu basis mi a bay Juliana School Dependance na Hato y despues di 2 aña a cambia pa “Ceque College Mavo” y actualmente mi ta studiante na Colegio EPI Salubridad y Servicio.
3. XCL: Kico ta e recuerdonan mas bunita di bo niñes?
E recuerdo mas bunita di mi niñes ta ora cu ami hunto cu mi primonan tabata hunga pafo y subi palo di kenepa sin ningun responsabilidad.
4. XCL: Unda bo ta studiando y pakico bo a scohe pa esaki?
Mi ta studiando na Colegio EPI den sector salubridad y servicio den principio mi a scohe e sector aki pa motibo cu mi tabata kier a bira docente di Spaño, pero durante e añanan cu mi ta studiando na EPI mi a ripara cu di berdad mi gusta yuda hende den otro forma tambe cu no ta duna les so pero den manera social y emocional y mirando tambe cu awendia tin hopi probleman rond di Aruba mi ta desea pa forma parti di e ayudo den futuro.
5. XCL: Bo a bira basta conoci y un figura “publico” na momento cu bo a wordo escogi como reina di Aruba su carnaval 65. Kico esaki tabata nifica pabo?
Esaki p’ami tabata un emocion hopi grandi mirando cu di chikito mi semper tabata wak eleccion di reina y di chikito caba mi tabata kier a participa, mi soño a bira realidad na aña 2015 ora cu mi a participa na eleccion di reina hubenil representando Popcorn club. Den 4 dia nos a prepara y mi a participa y nos a bay cu e corona, pero e biaha aki tabata hopi diferente mirando cu e biaha aki mi tabata un poco mas grandi y mas consiente y mi tabata mas involvi.
6. XCL: Con bo a prepara bo mes pa ora cu bo a gana eleccion di reina di Aruba su carnaval?
Desde cu mi a keda corona, mi haya varios guia con mi mester actua mirando cu mi lo tin wowo riba mi, mi ta hopi agradecido pa tur e tipsnan cu mi a haya, cosnan chikito basico cu un reina no por haci mas y cu un reina di carnaval mester haci.
7. XCL: Kico carnaval ta nifica pabo?
Carnaval pa mi ta nifica union, e ta un momento caminda full e isla ta bini hunto y mustra con hopi nan ta stima un di nos eventonan cultura di mas importante. E ta un momento unda cu hopi hende por lubida di tur cos y simplemente disfruta hunto den e momento.
8. XCL: Ki ta bo opinion di e cosnan negativo cu ta pasa durante carnaval?
Apesar cu tin varios momento menos positivo durante temporada di Carnaval mi ta kere cu nos isla ta birando mas conciente tocante e problemanan aki y den futuro nos lo por conta cu un Carnaval mas sano y cu menos problema.
9. XCL: Conta nos con bo preparacion pa eleccion di reina tabata.
E aña di preparacion tabata un aña basta pisa mirando cu nos tabata bezig cu diferente proyecto pa recauda di fondo cual tabata un rifa di un auto pa solamente 1 florin esaki a inicia 6 di april. Nos tabata bezig practicamente tur dia parando banda di caminda p’asina bende rifa y haya e fondo nan necesario pa asina paga tur e gasto. Despues di e rifa mirando cu no ta tur gasto a wordo cubri. Nos a organisa un Bingo 9 di december 2018 pa por a rondaf e ultimo detayesnan. Apart di e recaudamento nan di fondo tur otro cos nan tabata super great manera training nan hunto cu Maribel Andrade y tambe training nan pa mi show hunto cu Popcorn. Ami hunto cu nos team di 4 tabata pasa momento nan super dushi hunto pero alaves momento nan dificil di dialoga idea nan y ora di tuma decision tambe.
10. XCL: Kico ta e cos di mas importante cu bo a siña cu bo participacion pa eleccion di reina di Carnaval?
Mi ta kere e cos di mas importante cu mi a siña den henter e preparacion cu si nos no a traha duro, sagrifica nos tempo energia nos nunca lo a logra pa brinda Aruba un show di e forma cu nos a haci, ami semper lo ta agradecido na mi team di trabou pa haci esaki pami.
11. XCL: Con bo a combina bo scol y bay pa reina di carnaval?
E no tabata un aña fasil pero cu sacrificio bo ta logra, carnaval ta 1 biaha pa aña pero bo estudio ta bo futuro y lo keda pa semper, nos mester a sagrifica cierto lesnan pero nos a haal nan despues.
12. XCL: Bo ta hopi activo durante henter aña pa recauda fondo pa asina yuda esnan den necesidad. Conta nos mas di esaki.
Durante mei 2019 nos a haci un bingo pa recauda fondo pa muchanan den necesidad pa e temporada di Back to School, nos a yuda nan cumprando tas di scol y tambe material pa nan por bay scol pero claro nos no lo probecha di nan cu sacamento di potret esey ta algo cu nos a haci di curason y nada mas bunita pa graba cada sonrisa den nos memoria y curason sin mester camara pa show off. Ora bo man drechi haci algo bon man robes no mester sa.
13. XCL: Con bo lo desea di sigui crece como hoben y persona?
Mi ta desea di sigui crece como un hoben ehemplar caminda varios otro hoben por sigi mi paso nan y asina alaves crea un impacto positivo riba e sociedad di Aruba mirando cu nos hubentud mester di e persona nan pa guia nan cual ta e motibo tambe pakico mi ta stuadiando pa trahado social.
14. XCL: E ultimo tempo no tin hopi participante mas pa eleccion di reina di Aruba su carnaval manera antes. Kico ta bo opinion tocante esaki?
Mi opinion riba e tema aki ta cu e gastonan ultimamente ta sumamente halto pa un hoben su soño wordo cumpli mirando e luho cu nos carnaval tin ultimamente aunke tin hopi otro manera cu un hoben por mustra su talento sin cu e mester ta asina costoso, pero semper cu e preparacion corecto (cuminsa na tempo) bo lo por logra sigur. Crea un team cu por yuda bo pasobra tin hopi cos envolvi y mi ta kere SMAC por cuminsa baha cierto condicionnan pa e gastonan ta minimo pa cu un participante y kizas mehora e premio tambe pa e ta mas atractivo pa un persona por dicidi na participa, un auto manera antes no lo ta un mal idea HAHA.
15. XCL: Kico ta e mensahe cu bo lo kier manda pa esnan cu ta pensa di participa pa reina di Aruba su carnaval?
Si bo tin e deseo pa bay pa reina di carnaval, no tene miedo di expresa esey, crea un team pa yuda bo pasobra e ta rekeri hopi dedicacion y tambe placa. Tin den mente cu si bo kier gana bo mester traha pe pasobra tur esnan cu competi kier gana esey ta e meta final. Ta fuerte mentalmemte pa tur comentario y critica di hende y percura pa apesar di tur cos bo gosa sanamente di e temporada.
