Aña 2020 ta confrontando mundo cu scenarionnan cu nos no por ni imagina prome. Como sernan humano nos ta den buskeda constante di contestanan cu ta yuda nos comprende kico tur ta pasando. Sin embargo, informacion contradictorio ta aparece cada bes mas riba Internet, y di e manera aki mal informacion ta ganado tereno dor di probecha di e desconfianza y preocupacion cu tin pa cu e virus COVID-19. Dor cu informacion falso ta broei ta tur caminda, ta ainda mas dificil pa haya guia confiabel riba e virus, creando loke World Health Organization a clasifica como un ‘infodemia.’
Si aki na Aruba bo a tuma nota di e aumento di e presencia di algun ‘conspiracy theorist’, ta, entre otro, pasobra for di inicio di historia hende tin un necesidad inherente pa ricibi atencion di otro, sinti superior of mas inteligente cu e resto di e poblacion. E pensamento aki por bay te na e punto di kere cu ta su responsabilidad pa ‘habri wowo’ di otronan. Unabes cu nan ta convenci di nan pensamento, no tin intencion pa confirma si algo ta berdad of no, pero mas bien ta determina pa haya mas argumento cu ta respalda nan posicion.
Un studio na Hulanda a saca afo cu 1 den cada 10 hende ta kere por lo menos un di e teorianan di conspiracion cu tin rond di Coronavirus. Traha pa e compania Kieskompas den cual a participa casi 8 mil persona, a determina cu e creencia den teorianan di conspiracion ta particularmente presente mey mey di esnan cu ta sostene partidosnan politico di ‘derecha’ (conservativo, ta kere den herarkia social).
For di e idea cu bebe clorox por mata e virus, te na e teoria cu e virus a wordo traha den un laboratorio como arma biologico, e pandemia COVID-19 a genera un tormenta di informacion robes, cu ta consisti di riba 2.000 rumor y teoria di conspiracion, segun un estudio nobo. Den dje un ekipo internacional di cientificonan social, dokter y epidemiologonan a revisa e contenido riba media social, incluyendo postnan riba Twitter y Facebook, como tambe reportahenan den corant y television durante e temporada di december 2019 pa april 2020.
Determina kico ta confiabel y kico no, nunca tabata mas importante cu na e aña aki. Sin embargo e existencia di organisacionnan independiente cu ta desenmascara ‘fake news’ ta e herment mas importante di e publico pa confia den loke e ta lesa, wak of tende rond. P’esey, proximo biaha cu bo ta riba Facebook y bo wak un post cu ta papia di con gobierno Mericano ta bay pone microchips den e vacuna pa COVID-19; para un rato, refleha y controla.
“Mal informacion pusha dor di rumornan, stigma y teorianan di conspiracion por tin implicacionnan potencialmente serio riba e individuo y e comunidad si ta bay over na duna esaki preferencia riba consehonan basa riba evidencia,” asina e autornan a skirbi den e estudio publica e luna aki den e American Journal of Tropical Medicine and Hygiene. “Agencianan di salud mester monitorea malinformacion relaciona cu …COVID-19 den temporal real, y activa otro stakeholders di comunidad y gobierno local pa desenmascara mal informacion.”
Infotagion, un organisacion cu ta bringa malinformacion riba coronavirus ta aclarea y yuda preveni e plamamento di contenido falso dor di djis etiketa informacion sin base. Di mesun manera, Full Fact ta un ekipo independiente cu ta saca afo informacion robes y estadisticanan falso cu ta aparece den publicacionnan.
Den su edicion di dia 11 di augustus ultimo, e corant Bon Dia Aruba a publica un entrevista cu epidemiologo Maribelle Tromp den cual el a taha sector di salud pa percura di no perde e confianza di comunidad. Di nan banda, autoridadnan nacional manera Gabinete Wever-Croes y DVG a adverti for di prome dia cu e situacion presenta pa pandemia di COVID-19 ta uno sin precedente y tur dianan nan mes ta siñando algo nobo.
Entidadnan publico tin e reto di maneha e crisis sanitario aki atendiendo e efectonan di salud, e efectonan economico, pero tambien un reto substancial den e suministro di informacion den forma transparente, oportuno y responsable.
E idea ta pa gobierno y otro agencianan siña comprende e patronchi den cual rumor, stigma y teorianan di conspiracion ta circula. Di e manera aki nan por comunica mas eficientemente e berdadnan tocante e virus aki. Pesey e autornan di e estudio ta recomenda pa nan publica informacion cientifico concreto riba COVID-19 riba nan website. Fuera di esey, agencianan no solamente mester identifica y desenmascara rumornan, pero tambe traha cu otro sectornan pa difundi informacion corecto.
