2016 tabata un aña di hopi positivo y definitivamente uno productivo pa Randall Luidens, un hoben ‘rapper’ talentoso y mihor conoci den e mundo musical como ZYON. Cu 20 aña di edad, Zyon ta un di e voznan mas scucha na tur radio stacion na Aruba y su letranan cu contenido valioso, ta dirigi na e audiencia en general. Su letranan ta concentra den crea consenshi riba e cosnan importante den bida cu tin biaha nos no ta pone atencion na nan y ta resalta e importancia di conoce bo mes, di educa bo mes, di scohe pa bo mes y specialmente pa ‘Stima bo mes’, manera un di su canticanan ta titula.
Infancia
Randall a crece den un famia amoroso cu ta consisti di su mayornan y su ruman muher grandi. E ta corda cu for di mucha e tabata gusta pinta. Esaki tabata su manera di expresa. Eventualmente e pasion aki a evoluciona den scirbi poesia, canticanan y ‘Rap’. Como mucha, e tabata practica deportenan manera Karate y Judo, y aunke actualmente e no ta practicanan mas, toch e ta train un ke otro biaha MMA y Boxing. Su prome recuerdonan di scol ta hibe na Imelda Kleuter School, sigui pa 2 aña basis na Rosario College y despues, door di un oportunidad cu su tata a haya como meneer di school, Randall a sigui studia basis te cu caba HAVO na Schakel College.
“Ora mi tabatin 12 aña mi a scirbi mi prome rap, mi a keda lanta henter anochi ta scirbi y purba di rima, mi kier a crea cu mi palabranan. E tempo ey mi tabata den contacto cu un rapper local y mi a mande e texto, pero e guy nunca mas a papia cu mi! (hahaha!) Mi sa cu e texto tabata malo pero ami tabata guste toch, pa mi e tabata algo cu a sali di mi, algo cu mi a crea y door di esey mi a aprecie”.
Cu tempo su pasion pa scirbi a bira mas fuerte y e tabata sinti cu e tabata neglisha loke e ta describi como su “soñonan” y aunke e decision no tabata facil, Randall a sa di scucha su curason y a drop out di Universidad di Aruba (FEF). “Mi no ta bay school aworaki, tur cos cu mi ta haci ta ‘strictly music’”.
Construi su soño
Manera tur cos den bida cu ta bal la pena, entre e momento di tuma e decision aki y ‘make it happen’, tabatin un gap cu ta conforma di hopi trabou. No unicamente na nivel fisico pa Randall por a yega na su propio studio (cu ayudo di su tata), sino tambe e teoria pa e por a siña e parti tecnico di grabacion y mixing. Su amigo Nigel Maduro tabata clave pa yude cu esaki.
“Pasion pa musica ta algo cu ta crece tur dia y esaki ta e manera cu a cuminsa: E tempo aya mi tabata scucha hopi music e cantica di mas importante pa mi tabata ‘Suave’ di Basic One.”
Actualmente Zyon ta ta considera su mes, un Urban Artist, un rapper cu por canta, pero no cantante. E ta kere cu su talento principal ta e capacidad di siña for di su propio erornan. “Tin biaha mi ta wordo complementa cu mi rapnan ta hopi bon structura cu letranan bon hinca den otro, y hende ta bisami e ta un talento cu m’a nace cune. Mi definitivamente no a nace cu e talento di rap, mi tabata scirbi den scondi di ora scol a caba te anochi ora mi bay drumi.” Algun di su influencianan ta Tupac, Notorious BIG, Eminem, 50 Cent y esun di mas grandi tawata Basic One (awor aki Ataniro). “Ta increibel con universo a dunami e previlegio di traha cu e persona cu semper mi a look up to como un mucha jong. Cosnan hopi grandi ta pasa si bo haci locual bo stima.
Un anecdota
Un biaha na scol Randall tabata scirbi un cantica y su docente a wak e dune straf. “Despues di les e docente a yamami paden y a bisami “je verspilt je tijd met dat rap gedoe, je kan nooit iets bereiken met rap” y el a caba su speech puntrando mi “hoeveel fans heb je tot nu? één?”.
Dos luna pasa e mesun docente a mande un mensahe bisando e cu su primanan tabata fan di dje y cu despues di scucha ‘Fantasia’, e docente a reconoce cu den e cantica ta haci un remarke over di con el a handle e situashon ey añanan prome. “El a pidimi sorry y el a bisami cu nunca e no a verwacht cu un dia mi lo por a bira un artista conoci”. Aunke nan a keda bon cu otro, Randall tin miedo cu e situacion aki por pasa cu mas hoben creativo y cu nan lo por sinti kibra y stop di kere den nan soñonan.
Plannan 2017
Dia 14 di Mei 2017 su album ‘Perspectiva 2’ lo sali. “2017 mi ta bay tin varios colaboriacion cu artistanan di Aruba y tambe Corsow pero locual tambe mi tey concentra riba dje ta mi canticanan na Ingles, paso e ta un otro ‘challenge’ y e ta dunami e oportunidad pa amplia mi ‘reach’. Dus 2017 ta bay ta un aña unda cu mi tin plan di mustra ful un otro banda dimi mes, como artista”.
Hubentud segun su wowo
Zyon ta sinti cu e no por papia pa tur, pero e ta sinti cu hubentud ta un tiki indiferente cu hopi cosnan importante, entre nan, politiek. “Hopi hoben ta followers di un mentalidad self-destructive. Mi ta spera cu nan ta kere den ALGO. Tin mucho hopi hende awor aki (asta den parlamento) sin un opinion, y esei no ta saludabel pa desaroyo di un pais”.
Mensahe pa comunidad
Simpel, no tene miedo pa para pa locual abo ta kere den dje. Hopi hende tin un opinion pero no ta durf di vocifera esaki paso nos tin miedo di kico otro hende lo pensa. Un pueblo keto ta un pueblo sin desaroyo y esei ta e ultimo cos cu nos mester pa nos isla. Tur desishon grandi cu bo haci, haciele cu amor y bo lo ripara cu felicidad ta bin di mes. Awe mi ta mas felis cu nunca y e ta paso amor pa locual mi ta haci ta lantami tur mainta c’un ‘smile’ riba mi cara.
