Digitalisacion di servicionan publico ta un topico cu gobiernonan di diferente asignatura a toca den transcurso di tempo. Sinembargo mester a yega un pandemia pa forsa e idea wak luz di dia, y aunke no a tuma luga di e manera mas adecua, no tabatin otro opcion pa cu continuacion di un bida semi-normal. Na final di dia, ta e clientenan ta esnan cu tin e ultimo palabra riba con cada departamento a percura pa ehecuta e transicion di servicio fisico den nan edificionan, pa esun virtual atrabes di plataformanan digital.
Na comienso di 2019 Gabinete Wever-Croes a anuncia un proyecto di ‘eGovernment’ den cual a delinea un trayecto pa digitalisacion contando cu e asesoria di un academia di Estonia. Entre e obhetivonan tabata pa elimina papel y rijnan largo ora di solicita un servicio of producto di gobierno, ademas di brinda beneficionan na sector priva y empresario dor di elimina parti di e ‘red tape’ cu ta existi pa haci negoshi.
E yegada di e pandemia di COVID-19 a obliga tur departamentonan di gobierno pa di manera individual e independientemente agiliza nan structura pa por a duna continuacion na nan operacionnan y servicio na cliente. Cu e lunanan di juli y augustus tras di lomba, den cual por a experimenta un grado mas halto di ‘normalidad’, hopi ta puntra nan mes con e nivel di productividad y eficiencia den sector publico a keda afecta, of ta ser midi? Esaki ta un situacion temporal, of nos ta conociendo un transicion definitivo na un sistema nobo?
Ya caba por tende comentario tanto riba caya, den circulonan familiar y di amistad, como tambe riba media social riba experiencianan personal, di unda e procesonan ta canando nechi y unda tin dolor di cabes. Na simpel bista, e consenso ta indica cu mientras usuarionan di Registro Civil y Censo ta contento cu e cambionan haci, di otro banda, e clientenan di DIMAS ta masha disgusta cu e canalnan di comunicacion deficiente. Recientemente e departamento aki a indica cu e fayo ta debi na falta di informacion y rekisito. Pa loke ta trata Departamento di Impuesto, e señalnan ta mixto caminda tin testimonionan tanto negativo, como positivo riba e canalnan adapta di servicio.
E flexibilidad di traha for di cas pa cumpli cu e normanan di siguridad sanitario estableci probablemente a mitiga e plamamento di e virus, pero di otro banda a pone cu no tin forma di controla si e funcionario publico ta cumpliendo cu su tarea. Comentario for di den sector publico mes ta p.e. “Bo no ta hayanan zomaar mas, ni na telefon.” Y mientras Gobierno tin asuntonan di mayor peso pa atende p.e. ayudo di Hulanda y control di e pandemia, no ta conoci ken, of si algun hende a fiha norma of indicadornan pa midi con e eficiencia of deficiencia di departamentonan di gobierno ta afectando economia y comunidad.
Ta bon pa aclarea cu Xclusivo no ta fiha su mirada solamente riba e sector publico, pero tambe ta bay trece dilanti e cambionan cu a conoce for di negoshinan den sector priva. Manera ta conoci, hopi a ahusta nan modelo pa por sobrevivi y yega mas cerca di nan clientenan. Aki tambe tin storianan positivo y no asina tanto pa comparti.
Pa haya un miho bista di e situacion riba nivel nacional, Xclusivo ta trece e topico dilanti pa encurasha un analisis y discusion productivo riba e tema. Como herment di medicion adicional, ta invitabo pa forma parti di e siguiente encuesta basa riba cada persona su experiencia personal.
