Presidente nobo di smac – Shannon Henriquez

Desde cu e ta mucha e ta corda cu e tabata encanta carnaval. Shannon (40) mes ta conta cu e inspiracion inicial di esaki ta danki na su mama, kende a semper inculca esaki y mas den su infiancia. Tur loke tabata trata cu cultura, arte y creatividad manera musica, baile y moda, el a lanta ta encanta. Esmas, e mes a yega di participa riba un escenario pa eleccion di reina, tanto infantil y reina grandi di Aruba su Carnaval.

Ademas di esaki, e mes a participa pa basta aña den diferente gruponan di Carnaval. Sinembargo, su trabou den e ultimo 2 añanan, ta loke a trece un etapa nobo den su bida awe unda despues di a colabora como miembro di S.M.A.C., awor Shannon ta haya un rol nobo como presidente di e organisacion. Un responsabilidad nobo cu no por laga e wowonan grandi blauw confundibo pa pensa cu e no ta capas, e ta sintie mas cu cla pa e reto aki.

“Mi a accepta e reto aki door cu mi tin confiansa den mi mes y den mi team y semper mi ta di pensamento cu trahando hunto den un team bo por logra hopi. Mi ta wak esaki como un di e mihor manera tambe cu mi persona por contribui cu Aruba su Carnaval. Pa dos aña mi a forma parti di S.M.A.C. como miembro y na luna di October mi persona a keda eligi como e siquiente president di S.M.A.C. na unda board a deposita nan voto pa mi persona. Den e comunidad cu mi ta biba aden mi ta considera esaki como un responsabilidad moral y social pa cu pais Aruba”.

Shannon ta bisa cu e caminda pa duna un organisacion manera S.M.A.C. bida no tabata facil. E tabata un reto grandi cu a keda concretisa den corto tempo. “Un organisacion di Carnaval ta rekiri hopi comunicacion cu hopi hende y instancianan.

Nos mester a logra haya tur e stakeholdersnan di un manera democratico riba un liña cu e solo meta pa Carnaval di Aruba bai bon y bira mihor ainda di locual e tabata caba”, e ta bisa. E mes tin su trabou diario pero ta contento di tin e cooperacion pa haci e obra di amor actual como presidente di SMAC. “ Danki na e cooperacion aki, mi por dedica 100% como President di S.M.A.C. Tambe mi famia y amigonan cu semper ta dunami un man y asina mi ta keda den balance.

E tendencia pa mira cambio semper ta prome comentario cu ta bin dilanti, pero Shannon ta mira esaki mas leu cu esaki. “No ta trata solamente di cambionan cu ami lo kier mira sino di cambionan cu nos tur kier mira. Nos di S.M.A.C, e stakeholders den Carnaval, pues Aruba henter. Hunto nos tin cu traha pa haci e cambionan necesario pa Carnaval di Aruba sigui crece”. Y si mester bin cambio pa percura pa carnaval keda na bida, Shannon ta bisa e cooperacion di tur hende ta crucial.

“Carnaval ta di gran balor pa Aruba den hopi sentido. Su balor cultural ta obvio. E celebracion cultural anual mas grandi cu Aruba conoce. Di mes e ora Carnaval tin su balor turistico. Aruba One Carnival Island ta un di nos lemanan. Siendo parti di nos cultura e tin un balor educacional. Muchanan ta usa Carnaval na scol como tema pa spreekbeurt. Muchanan ta haci nan esfuerso pa siña canta, baila, actua y conta joke. Carnaval por ta un estimulo grandi pa e creatividad di hopi di nos muchanan y mayornan. Carnaval ta trece hopi hende hunto den un solo celebracion grandi y mahestuoso.

“Ban celebra Carnaval den grandi, manera semper tabata nos custumber. Un peticion special si ta pa nos cuida y yuda otro pa evita cu situacionnan lo por sali for di man. Nos ta un famia grandi di Carnaval cu por tin diferencia di opinion. Nos mester por papia sin grita y discuti sin bringa. Goza sin cu mester a bebe dimas. Tur hende yega cas bon sin ningun accidente”