Pa 12:54 di marduga , Presidente di Merca Donald Trump, a confirma via su cuenta di Twitter cu tanto e como su casa Melania, a sali positivo pa Covid-19. Den su anuncio e presidente a anuncia cu nan lo pasa door di esaki hunto. E prome anuncio a sali den oranan mas trempan via Bloomberg pero no a keda confirma pa Cas Blanco te cu e anuncio di Presidente Donald Trump su mes.
Bloomberg, den su prome reportahe a bisa cu e desaroyo aki a bin despues cu Trump a bin den contacto directo cu un di su top conseheronan cu ta Hope Hicks, kende a sali positivo dia prome di October, 2020 pa Covid-19. Esaki a causa cu mesora a test e presidente y su casa, kende awor a resulta di a sali positivo. Hicks a viaha diamars ultimo cu Trump den Air Force One pa atende e debate presidencial contra Joe Biden na Cleveland, Ohio. Tambe el a compaña Trump pa un trip na Minnesota pa un encuentro grandi cu sostenderonan eynan.
Mientras awor e noticia aki ta confirma, preguntanan ta keda riba con por ta posibel cu Donald Trump, cu tabata den contacto cu Hicks, kende su resultado tabata conoci pa un grupo na cas blanco, toch a sigui cu su schedule diahuebs ainda atendiendo un fundraiser na New Jersey. Na ki momento e presidente tabata sa di e resultado aki prome cu a sigui cu normalidad cu su eventonan ta algun di e preguntanan cu awor ta den debate y considera como un posibel kiebro den seguridad pa cas blanco. Apenas algun ora prome cu Trump a haya su cu e ta positivo, el a bisa un audiencia virtual cu e pandemia tabata yegando su final.
Den e prome debate presidencial, contario manera hopi otronan prome, a bin cu e regla pa e candidatonan no duna otro man, pa prome biaha debi na e pandemia di Covid-19. E diagnostico aki ta equivalente y constata como un menasa na e salud di un presidente Mericano den funcion desde hopi decada, por lo menos, desde tiroteo contra Presidente Ronald Reagan na 1981.
Un transishon temporal di poder ta posibel segun e amienda 25 di e constitucion Mericano, cual a keda estableci desde e asesinato di John F Kennedy. Esaki a keda uza varios biaha caba, por ehempel, ora un presidente Mericano den funcion mester a bay bou di anestesia debi na proceduranan medico. Te awor no tin indicacion cu Trump ta prepara pa uza e amienda aki cu lo duna Vice Presidente Mike Pence, e maneho di e pais bou di su mando. Si pa un motibo of otro Pence no por asumi e mando, e siguiente den linea pa asumi esaki lo ta e House Speaker, den e caso aki, Democratic House Speaker Nancy Pelosi.
“Mi tin e seguridad cu e Presidente por sigui cu su funcionnan sin interupcion mientras e ta recupera” ta loke e dokter di Trump, dr. Conley a pone den un memo.
