Dellanire Maduro

15 January, 2020

Pronto e parlamentario mas hoben den nos parlamento

E mirada riba Dellanire Yecenia Maduro (29) ta mas intenso desde cu a bira conocir cu e lo bira e siguiente parlamentario cu lo drenta parlamento entrante December 2019 pa partido POR. Esaki ta debi na e ‘shift’ cu a presenta cu retiro di minister di Desaroyo Teritorial, Infrastructura y Medio Ambiente, Otmar Oduber, for di politica y cu parlamentario Marisol Lopez- Tromp, asumiendo e cargo di e minister over y consecuentemente, Dellanire, e posicion di Marisol Lopez- Tromp. Dellanire su mes, a studia medicina na Universidad de Ciencias Medicas (UCIMED) na Costa Rica y desde ultimo eleccion, ta fungi como consehero pa Dangui Oduber, minister di Turismo, Salubridad Publico y Deporte. Cu su 29 aña, Dellanire ta bira awor, e parlamentario mas hoben di nos parlamento.

KEN TA DELLANIRE

Dellanire ta un persona positivo cu gusta desafio, gusta siña cosnan nobo, desaroya abilidadnan (skills) nobo. “Mi gusta ta bezig den diferente cos, sea working out (jogging, crossfit), duna charla, wak documentario, ta voluntario, yuda mi rumannan cu les. Mi ta bin di Seroe Blanco, mi famia ta consisti di un tata Arubiano, un mama Colombiano y 3 ruman. Mi ta bin di un famia grandi, cu hopi tanta y prima. Un famia yen di muher independiente, luchador”. Dellanire a atende Lili Peuterschool, despues a bay Imelda Kleuterschool. Su preparacion di scol basico tabata na Rosario College, despues Dellanire a atende La Salle College (MAVO). Y finalisando el a bay Colegio Arubano (HAVO) unda cu el a finalisa como mihor graduado.“Un anecdota interesante ta cu señora Marisol Lopez–Tromp den su funcion e tempo ey como Minister di Enseñanza ta esun cu a dunami e reconocemento, por medio di Women’s Club of Aruba, pa mihor graduado na aña 2009 durante di e ceremonia yama “Students Award” unda un total di 21 studiante a keda honra e anochi aki”.

Dellanire ta conta cu su niñez tabata uno hopi dushi, unda cu el a pasa hopi atardinan ta hunga Nintendo cu su tata y mi tabata pasa fin di siman na lama. En corto mi niñez tabatin uno impulsivo creativo, unda semper nos a wordo motiva pa semper duna e mihor di bo mes y cuida semper di otro. Den mi famia nos semper a lanta cu e ehempel pa yuda nos prohimo, maske con chikito e yudansa por ta”. E lesnan di mas importante cu Dellanire a haña for di su hogar y cu te dia di awe e ta aplica ta pa haci cosnan pa otro no pa ken nan ta of kico nan por duna su persona bek, pero pa Dellanire mes ta como persona. Tambe pa ta independiente, pa ta contento cu su mes y pa corda cu ningun hende ta perfecto. Pa siña di e foutnan di su mes pero tambe di otro, pa semper wak e banda positivo di tur cos y pa semper tin e vision pa mehora y crece. Por ultimo, pa no tin miedo di bisa locual cu e ta pensa.

Mi lo sugeri un ‘code of conduct’ pa tur parlamentarionan pa crea confiansa y respet”

REGRESO NA ARUBA

Como medico hoben studia den Region, Dellanire ta participa den e lucha pa reconocemento di profesionalnan di salud di region. “Na aña 2013 grupo di medico di region a forma e comision “Un firma pa un yiu di Tera” unda mediconan, studiantenan y famia a busca firma di nos comunidad pa sostene e causa aki. Nos a colecta 11.254 firma den 2 dia. E firmanan a keda entrega na es momento Minister Presidente Mike Eman. Ni asina e gabinete na e momento ey no a precura pa duna contenido na e ley di “AruBig” pa medico di region por eherce su profesion di un forma responsabel. Den e ultimo 30 añanan, e problematica aki no a haya atencion mereci, unda cu e gobiernonan a keda c’un actitud pasivo. Un di e metanan primordial di nos coalicion POR, MEP, RED ta pa reconoce profesionalnan den salud (yiunan di tera), cu a studia den Region di un forma responsabel, elevando calidad di cuido unda nos pashentnan ta sali beneficia. Esaki ta e prome biaha cu e tema aki ta haya e atencion mereci y prioridad, e proceso legislativo a start y ta canando bon, pues nos tin tur con ansa cu nos lo logra e meta aki durante e periodo di gobernacion actual”

“Si mi mester bay bek 6 aña atras mi no lo por a imagina cu na e momentonan aki mi lo ta trahando manera un consehero riba e topico aki pa e bira un realidad. Aparte di e reconocemento, Aruba mester crea un National Health ManPowerPlan (NHMPP),‘Plan Laboral Nacional di Salud’ (PLNS) pa por tin overall view di e ‘vraag en aanbod’ riba tur e profesionan den area di salubridad (medico, apotheker, dentista, enfermero etc.). Esaki lo duna guia na studiantenan cu lo kier haci un carera den area di salud. Nos mediconan incluyendo esunan na Hulanda tin dificultad pa haya cupo pa specialisa den exterior. Cual tambe ta otro factor cu mester crea convenio cu diferente pais pa facilita esaki, mirando cu Aruba tin escasez den cierto specialismo. Aruba mester duna e studiante/stagiaire e oportunidad di ‘loop stage’ na Aruba independientemente di cua universidad e ta atende na Hulanda, ademas crea convenio pa nos yiu di tera den region por bin loopstage na Aruba tambe. Nos mester brinda nos yiunan di tera e privilegio di ta e ‘First choice’, mescos tur otro pais ta haci cu nan yiu di tera. Dunando e oportunidad aki e medico por spaar placa pa por specialisa of realisa e BIG traject si ta desea. Tur esaki lo agranda e posiblidad pa nos yiu di tera bin labora na su pais natal. Asina nos pashentnan por wordo atendi door di mas dunado di cuido local”.

FUTURO COMO PARLAMENTARIO

Parlamento ta e organo di mas halto den nos constitucion, caminda cu e ta un trabou di responsabilidad enorme. Cada desicionan tuma door di e parlamentarionan tin efecto a largo plazo cu e comunidad tin cu biba cune, unda semper porvenir di Aruba mester predomina y no interes propio. Dellanire ta di opinion c’un parlamentario mester ta efectivo y eficiente hibando debatenenan di nivel, p’asina cumpli debidamente cu su tarea di controla gobierno. “Como un ‘young female professional’ mi ta sumamente honra di bay asumi e posicion den parlamento, representando e voz di pueblo”.

Algun di e cambionan cu Dellanire ta spera di trece den su funcion como parlamentario pa crea un balansa entre e cantidad di candidatonan masculino y femenino capacita riba lista di partido. Alabes mas hoben profesional den politica. Durante eleccion di 2017 a participa 140 candidato unda 40 candidato (28%) so tabata hende muher.

“Mi lo desea di wak mas hende muher capacita den politica/parlamento. Aruba tin hopi hende muher capacita, ehemplar pa tuma e reto aki. Na Aruba hende muher ta representa mas di e mitad di e populacion. Durante e eleccion aki 59.430 persona a haci uso di nan derecho di vota, unda 14,331 di e votonan a bay pa un candidato femenino. Esaki ta representa un 24.1 % so di e votonan total. Mi lo desea pa mas hende vota pa un hende muher, nos mester empodera hende muher, esaki ta di suma importancia pa e avance di hende muher en general. Mas debatenan di nivel, al caso y no riba aspectonan personal, sino mas bien riba kico e politico tin di ofrece, su capacidad intelectual, si su plan ta realisabel y ta abase di e necesidad di e pais. Pa nos comunidad haci uso di nan derecho di voto, hopi hende ta keda sin vota.

Un voto ta haci cambio y e ta e deber di e votador pa eherce e derecho aki pa determina e futuro di nos pais. E arena politico mester ta uno ehemplar unda mester tin respet pa e organo palamentario lo cual ta esencial.

Mi lo sugeri por ehempel un ‘code of conduct’ pa tur e parlamentarionan. Asina crea confiansa y respet pa e organo palamentario manera debe ser, locual sigur mester por. Nos mester traha pa un Aruba uni y harmonioso. Un Aruba unda ningun hende ta wordo discrimina of privilegia. Un Aruba basa riba igualdad y oportunidadnan igual”.

Nos mester mas hende muher capacita den politica/parlamento”

Temanan cu Dellanire lo profundisa su mes aden ta salud publico (prevencion, hielprik pa recien nacinan, medicina alternativo, bienstar di bestia, medio ambiente, derecho nan igual, entre otro. Un di e temanan cu ta ‘hot topic’ aworaki den politica, no solamente na Aruba, pero tambe rond mundo ta e tema di cannabis medicinal. “Cannabis medicinal no ta algo di awor, siglonan atras esaki tabata wordo usa manera medicina caba. Awendia cannabis medicinal ta conoci pa alivia/ controla dolornan cronico.

Unda nos sa cu e ta mas safe cu ‘opiates’, ta imposibel pa overdose y e lo por remplasa por ehempel un Advil of otro medicamento anti-inflamatorio ‘non-steroidal.’ Otro beneficionan conoci ta cu e por alivia insomio, ansiedad, glaucoma, hasta epilepsia entre otro. Mi ta di opinion cu nos pais mester percura pa nos dunado di cuido haya educacion riba e topico aki, pa por tin un opinion propio y por educa nos pashentnan. Nos mester yega na e punto unda e scogencia di tratamento ta di e pashent. Unda e medico por splica beneficio y desventaha di cada opcion di tratamento y laga e pashent dicidi, involucra e pashent den e decision aki, na final di dia e ta sinti e sintomonan y ta su curpa”.

GOALS COMO PROFESIONAL

Dellanire su goals como profesional ta pa ta orguyoso cu cada decision cu e tuma, asina na final di dia bay cas satisfecho, haci lo corecto pa tin un consenshi limpi y ehemplar. “Semper keda desaroya habilidadnan nobo, specialisa den un area di salud, crece den e arena politico. Sirbi mi pais di e miho forma cu ta posibel indiferentemente den cua ramo, sea medico of politico. Pa hunto construi y laga atras un miho pais cu nos a hereda.Bo por logra bo metanan cu dedicacion y perseverancia”.

Nomber Completo: Dellanire Yecenia Maduro

Edad: 29 (25 juli 1990)

Estudio: Medicina

Profesion: Medico General

Cover