Entre mas di 90 diferente pais cu participacion di mas di 4 mil tipo di bebidanan, Aruba su nomber ta bolbe resalta via Papiamento Rum cu ta logra gana un medaya di brons den e tan renombra competencia di The International Wine & Spirits, reconoci mundialmente ya pa 50 aña caba.
Esaki ta un competencia cu standardnan hopi halto unda expertonan global manera cumpradonan, productornan, sommeliers, distribuidor y influencersnan den e industria di biña y destileria ta evalua e diferente bebidanan pa yega na un conclusion riba excelencia.
Di biñanan pa champagne, gin, whisky, rum y otro ‘spirits’, tur ta keda evalua y re-evalua pa finalmente haya un premiacion den total di puntuacion y deteremina e posicion di cada ken den e competencia anual aki. Puntuacionnan ta categoriza den un midi di 100 punto cual pa Outstanding (98-100 punto), Gold (95-97 punto), Silver (90-94 punto) y Bronze (85-89 punto). E biaha aki den categoria di RUM e participacion tabata 23% mas hopi cu e aña anterior y aki ta unda Rum Papiamento a logra e reconocemento den Bronze.
E tipo di reconocementonan aki ta importante pasobra aparte cu e ta duna un motivacion y satisfaccion na e cas di destileria y e creadornan, e ta posiciona e producto cada vez mas visibel mundialmente y ta resalta e calidad y excelencia di e bebida. Pa Rum Papiamento cu ta carga e nomber di Aruba tambe, e logro di e reconocemento aki, ya pa 3 vez, ta un orguyo sin igual, mirando tambe cu ta trata di un bebida toch hoben compara cu hopi otro
casnan ya existente. Frans Sydow di Bodegas Rum Papiamento a comparti en reconocemento aki riba su social media hunto cu su famia. Pabien di parti di team XCLSV y di Aruba completo.
