Organisacion Women empOwering Women (WOW) ta organisa debate cu politiconan femenino

Den preparacion pa Eleccion Juni venidero, organisacion Women empOwering Women(WOW) a organisa un Debate cu politiconan femenino pa nan miembronan. E enfoke di e debate aki tabata pa duna realce na informacion cu lo yuda miembronan vota conciente durante eleccion Juni venidero. Debi na limitacion di tempo pa cu e debate por a escohe 6 politico femenino y 6 topico di interes. Pa escohe e topiconan di interes y ken lo forma parti di e Debate, miembronan di WOW a completa un encuesta anonimo.

Y e top 6 ‘Topiconan di interes’:
● Educacion
● MedioAmbiente
● Finansas Publico
● Economia
● Igualdad di Genero
● Belasting

E Debate a tuma lugar den un sala di The Cinemas di Renaissance Marketplace, unda cu miembronan di WOW mes a coordina y modera e evento. Debi na limitacion pa cu internet/wifi den e sala WOW a opta pa graba e Debate pa asina publica esaki riba plataforma di Facebook di WOW Aruba y haci e informacion aki disponibel pa publico.

E idea ta pa e contenido yega na mas hende muhe y asina encurasha pa sa mas di e vision di cada politico femenino. Pa eleccion 2021 nos tin un total di 58 hende muhe participando y e ta keda na nos pa sostene nan, asina so nos lo por yega na igualdad.

Por ultimo, organisacion Women empOwering Women kier extende palabra di elogio na e 58 representantenan femenino den politica na Aruba pa haci uzo di e oportunidad pa promove y stimula mas participacion di hende muhe den politica, pa asina nos yega mas serca di un representacion igual na Aruba.