Durante temporada di fin di aña, Organisacion Women empOwering Women (WOW) a colabora cu diseñador grafico local Josi Coutinho pa crea e ‘Empowering Christmas Cards Project’.
E projecto aki a consisti di 4 ‘christmas cards’ cu mensahenan di inspiracion pa empodera e hende muher. A lansa e carchinan na benta durante luna di December pa asina recauda fondo pa Ortopedagogisch Centrum. Miembronan di nos Committee a escohe e organisacion aki como cu ta brinda asistencia na hobennan.
Ortopedagogisch Centrum ta un centro cu ta ofrece tratamento y guia na hobennan cu problematica psicosocial unda cu den un termino corto por siña habilidadnan necesario riba diferente areanan di desaroyo y asina funciona na un manera independiente y adecua den nos comunidad.
E centro aki ta enfoca riba engrandece e habilidadnan di e hoben, yudando e hoben alcansa metanan importante den su desaroyo. Trayectoria di guia ta den faceta pa asina gradualmente trece cambio den conducta unda cu na final e hoben ta cla pa funciona den un manera independiente den seno familiar y den nos comunidad.
Head of Communications, Rocío Burgos hunto cu Head of Empowerment, Kareline van der Linden a haci entrega di e donacion na Director Dynia Abath-Muller di AWG. 1000,- den forma di ‘gift cards’ di Dyon Center pa material pa nan projectonan y actividad diario hunto cu e hobennan.
Nos ta desea di extende palabra di gratitud na tur esnan cu a cumpra e carchinan y asina contribui na e bunita causa aki.
Na banda di esaki, a haci un donacion na Fundacion Hende Muher den Dificultad y Tienermoeders Huis Aruba. E donacion tabata pa felicita e organisacionnan aki cu ta traha ariba e formacion di hende muher den nos comunidad. Nos ta encurasha mas organisacion den nos comunidad pa aserca instancianan y asina brinda apoyo y sosten den e temporada aki yena cu reto.
