Ongoing traumatic relationship syndrome (OTRS)

OTRS (Ongoing Traumatic Relationship Syndrome / Cassandra Phenomenon) ta un syndrome, cu por afecta un hende durante un periodo largo den cual e ta suheto na impactonan psychologico traumatico repetitivo den contexto di un relacion estrecho, por ehempel un relacion di pareha. E impacto ta mas serio pa motibo cu e stress traumatico ta wordo causa continuamente den intimidad di e hogar, y pasobra e hendenan rond tipicamente ta nenga di acepta e realidad di locual ta pasando.

Symptomanan di OTRS ta manifesta nan mes entre otro como problemanan di salud relata na stress. Nan ta sosode durante un periodo prolonga a consecuencia di (falta di) reaccion di e pareha, kende tipicamente ta sufri di Asperger’s Syndrome/ Autism Spectrum Disorder (ASD). Pues, e persona cu OTRS ta comparti bida diario cu un pareha cu tin limitacion pa ta reciproco den un relacion.

• No por coresponde su pareha
• No por demostra empatia of compasion
• No por pone su mes den sapato di e pareha
• Tin dificultad pa comunica mutuamente
• No por reconoce e realidad di e pareha ni su actitud
• No por mira e pareha su intencionnan y emocionnan
• Tin dificultad pa siña for di su propio experiencia
• No por analisa situacionnan compleho
• No por alimenta un relacion
• No por mira su propio responsabilidad pa su accionnan
• No por negocia, yega na compromiso of resolve conflicto
• Ta hopi ocupa cu su propio necesidadnan
• Tin capacidad inadecua pa controla su propio impulsonan

Symptomanan di OTRS ta similar na esnan di personanan cu continuamente ta wordo exponi na tortura emocional y psychologico. Esakinan por ta entre otro: malesanan fisico, problema di salud pa motibo di stress, depresion, miedo, perdida di auto-estima, duda den realidad, soledad, cansancio, isolacion social involuntario, etc.

Locual ta haci bida cu OTRS aun mas duro ta e hecho cu hopi biaha e entorno di e persona cu ta sufri a consecuencia di esaki, incluyendo profesionalnan manera therapista y dokter no ta tuma su caso na serio of ta trata na minimaliza esaki. E persona aki tipicamente lo bay warda hopi tempo prome cu e informa famia y amistadnan of kizas nunca lo papia tocante locual ta pasando na cas, soportando den soledad su sufrimento, pasobra e ta sinti cu e no lo wordo comprondi of cu otronan lo pensa cu e ta gaña of no ta stima su pareha. Si e pareha di un persona cu ta sufri di Asperger’s Syndrome, purba acerca otronan cu su problema, e reaccion tipico lo ta, cu niun hende lo kere. “E ta asina bon hende!” lo ta e contesta. Y en realidad, e hecho cu e ta keha di su situacion no ta nifica cu su pareha no ta un bon hende of cu e ta ponele sufri cu mal intencion. Absolutamente cu no. Ta obvio cu e no ta haci’e intencionalmente, cu e hecho cu e tin su limtitacion no ta su culpa, pero di otro banda e pareha tambe ta sufri pa motibo cu su necesidadnan y expectativanan di un relacion kizas nunca lo por wordo cumpli. Y pa por biba cu e hecho aki, e mester di ayudo profesional di un therapista cu ta tume na serio.

Cassandra tabata un muher den mythologia Griego. E muher aki tabata tin habilidadnan profetico, semper tabata papia berdad y tabatin e don di prediccion. Pero e Dios Appollo, como venganza na momento cu Cassandra a nenga su avancenan, a maldicione di tal manera cu ningun hende hamas lo bolbe kere den dje.

Pa mas informacion, bishita www.livingwithaspergerspartner.com