E tabata un decision dificil y nos a warda mas tanto cu tabata posibel, pero na final e tabata inevitabel”, asina organisadornan a splica. Normalmente registracion ta habri na april, esey ta nifica cu lo a tuma placa di hende, solamente pa despues mester debolbe esaki, fuera di ticketnan di avion, reservacion di hotel cu participantenan probablemente lo a perde. Ademas, “e ta un evento cu full stadium, musica y hendenan pasando bon. E lo tabata simplemente imposibel pa haci esey bou di e reglanan actual di distanciamento social”. Organisadornan no por sa kico lo permiti of no na november.
Normalmente e preparacion pa e siguiente aña ta cuminsa prome cu e edicion prome ta caba. Na e temponan aki normalmente e organisadornan lo tabata yen di trabou, y esey ta sinti straño. Afortunadamente no tin compromisonan financiero pasobra no tabatin inscripcion, ni acuerdonan di patrocinio concreta. E consecuencia mas grandi tabata pa Beach Tennis Aruba cu semper sa haya ola di inscripcion nobo despues di e evento grandi. Mas importante e aña aki ya cu e cantidad di miembronan a bay atras desde inicio di e pandemia.
Organisadornan ta afirma cu e continuacion di e evento no ta core peliger. Ta spera cu esaki por ta otro aña, pero atrobe, esey no ta den nan man. Tur cos ta depende di e situacion y e regulacionnan publico. Organisa e evento sin publico no ta un opcion. Un posibel obstaculo ta cu e patrocinadornan principal no ta conta cu e fondonan necesario pa e evento. E Aruba Beach Tennis Open ta un di e eventonan di mas grandi den e calender internacional di Aruba. Den pasado Aruba Tourism Authority manifesta su confiansa den e evento, ya cu e tin un di e ROI (Return On Investment) di mas halto cu un gran promocion pa nos isla den mercado europeo y latinoamericano.
Campeon Femenino 2020, Giulia Gasparri a bisa cu e ta hopi tristo cu Aruba no lo tuma luga e aña aki, no solamente pasobra e kier defende su titulo, pero “tambe pasobra Aruba ta mi torneo faborito!” E ta compronde cu no ta existi e condicionnan pa organisa un evento asina e aña aki, y pesey mester tin pasenshi te otro aña.
Aksel Samardzic ta sinti’e malo pa e organisadonan, pa Aruba, pa e deporte, y naturalmente pa su mes. E ta miho hungado di Aruba den beach tennis cu e rank actual di #11 na mundo. “Pa mi e ABTO ta e miho torneo na mundo, no djis pasobra e ta na mi isla, pero dor di con e ta organisa. Hunga center court dilanti tur hende, poniendo Aruba riba e mapa di e miho manera posibel; ta algo cu ami ta anhela. Nan lo haci falta e aña aki pasobra nan ta un di e grand slams, si no ta esun di mas grandi. Mi ta compronde e motibo pakico nan mester a cancela. Salud prome cu tur cos. Nos ta sigui entrena y sigui padilanti, haciendo loke nos por pa participa otro aña.
Un nomber cu a bira masha conoci na Aruba ta esun di Calbucci. Su solo mencion ta hibabo bek na e anochinan di final yen di emocion. Alessandro Calbucci a hunga den 9 final di e 10 torneo di Aruba Beach Tennis Open cu el a participa aden. Xclusivo a papia cune y el a expresa su sentimentonan pa cu e cancelacion di e torneo.
Mescos cu Aksel, e tambe a wak e decision aki bin. “No tabatin otro choice. Ta imposibel pa organisa dor di Covid y tur e limitacion di buelonan.” BTA a comunica na tur e hungadonan di nan decision na tempo. “Mi ta bay haya falta di e evento aki hopi. Mi no ta jong mas y cada aña, cada edicion, e ta unico pa mi. E ta e evento di mas dushi na mundo pa un hungado di beach tennis. Aruba ta nos Wimbledon.” Calbucci a aña cu na Aruba bo ta pasa bon te hasta ora bo ta perde.
Tambe el a splica cu no ta Aruba so ta hay’e den e situacion dificil aki. Na nivel internacional, tin un gran confusion caminda e federacion no tin un strategia consistente y cada bes ta bin cu fechanan nobo. “Pero si bo tin e hungadonan na pecho, e ta mas facil pa tuma e decision mas corecto y husto, manera BTA a haci. Nan a cancela manera a ripara cu no por a garantisa 100% di e organisacion. Nos ta aprecia hopi nan honestidad y actitud.” Por ultimo Calbucci a bisa cu ta spera di ta bek na Aruba lo mas pronto possible cu e deseo di por ta tin dos evento den 2021.
“Pero ban keda positivo, asumi cu tur problema lo soluciona y tur hende lo por disfurta di e miho evento di beach tennis y esun di mas grandi na mundo, cu e miho hungadonan y e miho ambiente, aki mes na Aruba!” BTA a indica di lo purba organiza un torneo mas chikito na e Beach Tennis Aruba Club e aña aki ainda, si e condicionnan ta permiti.
