Den un post cortico via su pagina di instagram, Anouk Eman, miss y modelo local a anuncia cu el a haci un test di Covid-19 y cu esaki a sali positivo.
“Tabata dialuna caba c’un persona cu mi tabata den contacto cune a bisami cu el a bay haci un test di covid-19 y a sali positivo pa esaki e dia despues. Mesora mi a cancela tur trabou cu mi tabatin pendiente y a haci mi test wardando e resultado cu a drenta positivo awetardi. Mi sintomanan mes ta hopi leve y mi ta djis sinti mi curpa un poco kibra”, Anouk a bisa nos di Xclusivo Magazine Online.
E miss y modelo a opta pa comparti e resultado di su test pa crea consientisacion cu e virus aki por yega na tur hende y a priminti di sigui informa su siguidornan di e proceso cu e lo tin cu bay pasa aden pa recupera. “E erg di esaki ta cu e persona aki casi no tabatin sintoma cual ta mustrabo cu por tin hende eyfor cu no tin sintoma atall pero toch ta cargando e virus aki, sin cu nan mes sa”.
Anouk su pareha Marksonn Maduro, kende ta propietario di 2 bar, bou conseho di DVG a bay den cuarentena pa e siguiente 2 simannan y lo tin cu ta pendiente si e mustra sintoma pa e ora bay haci test.
E casonan di Covid-19 localmente a conoce un aumento drastico den e ultimo 3 dianan haciendo cu gobierno a anuncia medidanan nobo.
