Michelle Hooyboer Winklaar – 6 luna leu di su salida fo’i politica

Mayoria famia y amigonan a consehami pa no haci’e. E motibonan principal tabata e imagen cu politica tabatin y cu te ainda ta existi; e style mas bieuw di haci politica unda lo keda insulta y ataca door di esnan cu kier purba score politicamente”, Michelle ta cuminsa ta bisa. Su prome sabor di politica tabata durante e prome campaña pa eleccion.

“Mi no a lanta den e mundo di politica y pesey kizas e no ta bin natural p’ami, pero mi a purba hacie na mi manera y trece e politica cu p’ami, tabata pas cu mi manera di pensa y haci”. Un di e fenomeno mas directo cu Michelle no a scapa di dje tabata esun di e grupo di votadornan cu ta ‘vota’ segun ‘fabor’ cu nan por haya di e politico. “Mi contesta semper ta hopi simpel: Mi no ta traha riba base di haci “fabor”. Tur hende cu tin derecho riba algo mi ta sigura cu e ta keda cumpli. Si esey no ta e caso, e ora mi ta splica pakico tambe. E no ta facil tur biaha pasobra hopi hende ta custumbra cu esaki ta parti di ‘e politica’ pero e ta necesario pa kibra e tendencia ‘ki”.

Saliendo for di sector priva, Michelle ta resalta cu no tabata facil pa traha den e sistema di sector publico, pero el a dicidi cu e no ta bay adapta sino, sigur den su ministerionan, cambia e forma di traha. “Hopi biaha den gobierno no ta traha riba base di “deadlines” of project management. Den sector priva, ta traha cu metanan y e accionnan concreto cu ta yega na e metanan aki unda ta monitor y raporta tur cos. Esaki ta e sistema cu ami a introduci y a yuda nos cumpli cu varios meta durante e ultimo 8 añanan”. Pero di tur e cosnan cu mas molester a causa Michelle durante e 8 añanan den politica ta locual ta bin aserca na e hecho di ta un hende muher den e ramo aki.

“Como e unico minister femenino durante e ultimo 8 añanan, bo no por keda sin ripara cu bo ta keda trata diferente cu bo coleganan masculino den cierto areanan. Lamentabelmente tambe otro hende muhernan mes ta esnan cu ta ataca mas fuerte. Como un hende muher den politica, tin 3 manera cu bo por wordo silencia/ataca/neutralisa door di Oponentenan: defama sexualmente door di pone bo reputacion y moralidad den cuestion; pintabo como bobo y cu bo no sa nada y ultimo, insinua cu bo ta corupto. No mester di prueba awendia, simplemente acusa y ripiti esaki ta suficiente. Tambe tin un tendencia pa pensa cu semper hende muher den politica mester carga sierto responsabilidad pa areanan social y tur cos cu tin cu haber cu mucha. E fenomeno aki yama “genderization of responsabilities”.

Claro como un hende muher y mama e areanan aki ta touch bo profundo, pero e ta irealistico y inhusto cu tur esaki semper mester cay riba e hende muher so. Nos tin cu sigui educa nos comunidad cu hende homber tin cu carga nan “share” di e responsabilidad pa temanan cu tradicionalmente ta mira como asunto di hende muher. Asina so nos por logra yega na un miho balansa entre e generonan”. Si papia di e cos mas desagradabel banda di puntonan menciona ariba cu e minister ta bisa di a experencia tabata un menasa cu a yega mucho serca di cas. “Basa riba un mentira di oponentenan politico, un hende a scirbi un carta y mandami na mi cas unda nan a menasa mi yiunan. Esey tabata un momento hopi scur den mi carera politico”, e ta splica.

Comparando su prome termino na e di dos, definitivamente e di dos ta sinti mihor pa Michelle, mirando cu pa esey e tabatin 4 aña di experiencia acumula. E cartera di enseñansa compara cu esun cu e tabatin prome di Asuntonan Social y Economia ta mas autonomo, grandi y ‘tangibel’ mientras e otro bo ta depende di otro carteranan pa un funcion mas optimal. E cartera di turismo tabata uno cu na inicio di e prome termino tabata masha den discusion cu esaki lo tabata un interes p’e minister. “Ora cu mi a keda aserca pa drenta politica, a puntrami pa eventualmente carga responsabilidad pa turismo. Despues cu elecion 2009 a pasa mi a keda informa cu esaki no por a pasa mas pasobra no tabatin “dragvlak” p’e, cu ta cosnan cu por pasa den politica.

Aunke esaki a wordo treci padilanti atrobe na 2013, p’ami e tabata un gepaseerd station y mi a scohe pa e area di Enseñansa, un cartera cu mi ta contento mi a tuma”.
Kico ta e clave pa exito di un minister segun su percepcion? “Un minister no ta solamente maneha un cartera, pero ta lidera hende pa traha pa yega na metanan. Pa haci esaki, “the devil is in the details”, y mester ta envolvi for di e planning pa e ehecuccion”.

“E ta dificil awendia pa separa “Fact from Fiction” vooral ora e news cycle ta asina cortico y social media ta domina asina atencion. Pues hopi biaha no ta den bo man si bo ta wordo involucra den storianan of bo ta wordo laga afor”, Michelle ta reacciona riba noticianan cu ta sali constantemente di su gabinete y tin biaha hasta di su persona. Un di nan cu a resona hopi tabata otorgamento di maneho di seguro pa studantenan den exterior cu lo a keda otorga na su esposo kende ta traha den e mundo di seguro. “Esaki ta un fabricacion 100% crea door di opositornan politico. Un storia fabrica den un corant liga na oposion, ripiti mil biaha, despues ripiti door di lider di oposicion mil biaha.

Na momento cu e storia a keda fabrica cu e compania cu a gana e bid no tabata existi y cu simplemente tabata algo riba papel cu mi casa tabata doño di dje, mi no a dun’e mucho atencion pasobra mi a pensa cu e ta asina “far-fetched” cu e berdad lo sali na cla hopi liher. Specialmente mirando cu den un aanbesteding ningun momento un Minister ta esun cu ta selecta e compania cu ta gana y tin un proceso cu ta envolvi varios hende. Tabata te ora e yega na formalisa e escohencia, e ta yega serca e Minister pa ‘signoff’.

Mirando cu mi casa ta traha pa un compania di seguro, mi a anticipa cu politiconan cu ta usa tacticanan barata lo por a usa e simpel hecho ey pa crea storia, mi a opta toch pa kibra e monopolio cu tabata existi den seguro di studiante na Hulanda. Cu e desmantelacion di e monopolio cu a existi pa mas cu 25 aña cu seguro di studiantenan, e sumanan cu ta pagando awor a baha cu 4 miyon Euro djis den 1 aña di tempo! Mi persona a entrega tur documento na Parlamento di Aruba y specificamente na lider di oposicion. Te dia di awe no a bin ningun preguntanan mas for di e fraccion cu ta oficialmente con ta trata cualkier asunto cu tin pregunta of duda riba dje. E ta un muestra di e parti scur cu ta keda existi den politica”.

“Mi ta hopi orguyoso di hopi cu a wordo logra ambos den e cartera social y di enseñansa; mi ta sumamente orguyoso di mi team, relativamente chikito, pero sumamente dedica na traha na bienestar di nos pais, sin interes personal.

Den e ultimo 4 aña mas cu 35 miyon florin a keda inverti den renobacion y construccion di scolnan, cu nos a logra habri porta pa nos studiantenan na 8 universidad/college na Merca y Canada cu no tabata existi antes, nos a logra cambia e sistema pa accepta studiantenan na HAVO na un manera mas husto cu a resulta cu mas studiante ta drenta, ambos for di basisschool y for di MAVO.

Tambe mi ta hopi contento cu e opcion di enseñansa na Ingles pa studiantenan 17 aña+ awor a bira un realidad, y mas studiante cu no a logra den e sistema tradicional awor por logra haya un GED diploma den un programa acredita.

Nos ta yegando na e fase final di introduccion di 2 ley importante; ley di Functiehuis cu ta regarda salario y schalering di Maestronan y otronan trahando den Enseñansa. Y di dos ta e ley cu lo supervisa calidad di crechnan (kinderopvang) na Aruba. Mi ta spera cu esaki lo pasa muy pronto. Proyecto Scol Multilingual ta yegando su fase final na fin di e aña escolar aki. Esaki ta e momento cu lo midi su efectividad pa e studiantenan cu a ricibi Enseñansa den 4 idioma, cu instruccion primordialmente na Papiamento, specificamente e transicion for di idioma di instruccion di Papiamento den 4de klas, pa idioma di instruccion na Hulandes den 5de klas.

Lo mi a desea di por ricibi e rapport aki pa comfirma e efectividad di scolnan multilingual y mira e programa aki expande pa otro scolan y hasta introduci un opcion di idioma di instruccion na Ingles den scolnan primario, cual ta wordo pidi masha hopi mes. Mi ta kere ta un derecho fundamental pa muchanan siña den nan propio idioma, of e idioma cu mas nan por expresa nan mes. Esaki lo bira un proyecto pa e siguiente Minsiter di Enseñansa. Enseñansa no ta un struggle pero si e ta un area facil pa critica of crea critica. E ta loke bo por yama den politica “Low hanging fruit”, facil pa cosecha. Pakico? Pasobra e ta un area sumamente importante cu semper lo tin reto den dje. E ta e cartera mas grandi den presupuesto, alredador di Afl. 280,000,000 pa aña.

Tin 21,000 studiante y 1,800 maestro. Pone riba dje tur mayor/famia. Pa tene tur grupo cu tin di haber cu Enseñansa contento ta hopi dificil pa mi no bisa imposibel. Semper lo tin espacio pa mehora. Mester reconoce si cu e presupuesto di enseñansa ta representa alredador di 21% di henter e presupuesto di Gobierno. E ta un di e percentahenan di mas halto den mundo. (Hulanda ta 12% y Merca 13%). Hopi ta papia di cambio den enseñansa pero ora e momento yega, ta haya hopi resistencia. E realidad ta cu loke bo ta haci awe den Enseñansa bo ta wak e resultado añanan despues. E tendencia actual ta cu kier wak cu tur cos short-term y cu quick fixes.

Michelle ta sigura cu e decision pa retira di politica no tabata uno tuma di un dia pa otro ni tampoco tabatin di haber cu ningun diferencia di opinion di maneho den su gabinete. “P’ami personalmente, 8 aña como Minister ta suficiente y nunca mi a aspira di ta un ‘Career Politician’ pa cuminsa. Tur decision cu mi a yega di tuma, semper mi a pensa riba con esaki lo afecta mi famia. E bida como un politico y e bida di un “public life” tin su efecto impactante, vooral ora tin yiunan mas chikito. (Michelle ta casa cu Detlef Hooyboer y tin dos yiu, Donovan di 11 aña y Morgan di 9).

Mi ta hopi gradici na e sosten cu mi a ricibi durane e ultimo 8 añanan, principalmente e personanan cu a yudami durante 2 campaña y a hacie solamente pasobra nan a kere den mi persona y loke mi ta para p’e sin nunca puntra pa nada acambio. Awendia esey ta dificil pa haya”.

Solamente cu dedicacion y hard work bo ta logra haci bo soñonan realidad. No tin shortcuts y tur cos cu ta wordo logra sin e esfuerso berdadero mayoria biaha ta cosnan cu no ta duradero. E bon noticia ta cu e ingredientenan pa exito ta existi den nos tur, pues e ta simplemente rekeri un compromiso cu bo mes”.

“Cu algun cos si y otro cosnan mi ta kere cu mi no a simplemente “follow the team”.

“Aruba ta mi cas awor y aunke mi ta orguyoso cu mi historia y link cu Canada, mi no tin plan awor pa bai biba otro caminda”.

“Si, di mi yiunan pa bira nan chef, driver, coach y huiswerkbegeleider :)”.

“Ainda mi no a pensa den cual area mi lo cuminsa explora oportunidadnan”.

“Na e momento aki mi tin short term plannan so cu ta tuma un tiki tempo off, algo cu nunca mi a haci desde dia mi a cuminsa traha; cu mi 16 aña mi a hayami prome part-time job na un compania di real estate como receptionista. Asina mi a spaar pa cumpra mi prome auto secondhand. E tabata un Buick Riviera color geel!

Haha, ta hopi conseho mi a yega di ricibi for di hefenan, amiganan y mi mayornan. Mi ta kere e miho ta “No one is coming to save you, there is no knight in shining armour. If you want something in life you have to work harder than you ever imagined you could. Then wake up the next day and work even harder”.