Mary-Anne y Urvin Croes no ta un pareha desconoci. Mayoria biaha bo por wak nan na White Modern Cuisine. Mary-Anne bo lo topa saludando bo na entrada mientras Urvin bo lo wak na final di bo bishita na nan prestigioso restaurant. Hopi ta puntra nan mes kico ta e secreto di e restaurant aki pero e pregunta no mester ta kico, sino ‘kende’. Laga nos sera bo conoci cu e secreto di e exito di e restaurant aki.
Infancia
Urvin su lombrishi dera na Santa Cruz y biba na Sero Blanco. ‘Mi a lanta den un famia harmonioso cu ta pusha nos pa logra tur cos cu nos ta desea den bida. Mi tabatin un infancia hopi travieso, loco y tabata purba haci tur cos cu ta imposibel pa haci; por ehempel hunga ninja turtle, bula for di dak etc.’
Di otro banda, Mary-Anne semper a biba na Noord. ‘Mi a lanta den un hogar unda diciplina y respet ta hopi importante. Mi mayornan semper a dunami tur cos cu tabata den nan alcanse. Mi a lanta cu e mentalidad cu famia semper ta na prome lugar. Como mucha mi tabata un poco travieso(no mescos cu Urvin si). Mi tabata hunga hopi pafo cu mi ruman homber. Tambe mi tabata pasa atardinan na mi wela, cu tambe a siñami norma y balornan, cu tambe a yuda pa mi ta ken mi ta awe’.
Transicion di noviazgo pa matrimonio
Urvin y Mary-Anne a conoce otro na Hulanda, temporada di nan estudio. Urvin tabata biba den cas hunto cu amiganan di Mary-Anne. Mary-Anne semper tabata bin ‘chill’ na cas, nan tabata cushina hunto, hunga wega nan etc. Nan tin 13 aña hunto, cual 5 di e aña nan aki nan ta casa. ‘E momento cu nos a dicidi cu nos ta hiba e relacion na un “next level” ta ora nos tur dos a ripara cu e no ta djis un relacion pasahero, pero tabatin feelings nan cu a desaroya y crece entre nos cu a haci nos relacion drenta e fase di amor.’
Urvin ta conta cu e experencia mas valioso den su bida ta ora cu el a bay representa Aruba cu ‘Aruba Culinary team’ y a gana hopi medaya. Y tambe ora el a haña su SVH diploma den su man. SVH ta un diploma Hulandes caminda cu esnan cu tin esaki a pasa tur test pa cu traha den horeca.
Mary-Anne ta bisa cu su experencia di mas importante di su bida ta na momento cu el a ricibi su diploma di Farmakundige cu su yiu homber den su brasa. Esaki tabata un momento inolvidabel pa Mary-Anne cu a apenas a caba di studia
Business 'not' as usual
“Na promer instante nos tabatin White Modern Cuisine so, aki nos tabata traha tur dia cu otro. Na promer instante esaki tabata hopi dificil, ya cu nos tur dos ta “koppig” y tin mesun manera di pensa. Aki mes nos a siña traha cu otro y a realisa cu no mester laga problema di trabou bin cu nos cas. Actualmente ainda nos sa traha cu otro na White Modern Cuisine.
Aki masha poco nos sa tin discusion y ora esaki ta e caso, nos ta percura pa laga esaki na trabou”. Pa Mary-Anne y Urvin e parti di no ta wak otro henter ora ta work out hopi bon. “Jammer genoeg nos no tin mucho tempo pa pasa cu otro, pero nos ta percura pa haci e tiki tempo ey quality time pa nos mes y nos yiunan”.
Mary-Anne ta sigui bisa cu e exito di nan matrimonio ta “Pa tin un matrimonio unda cu bo ta sintibo comodo den tur sentido. Unda bo por ta bo mes y wordo acepta door di bo pareha. Naturalmente cu confiansa, comunicacion y comprondemento pa otro ta e aspectonan esencial den esaki”.
Mary-Anne y Urvin nan negoshi ainda ta den proceso y tambe ta encera diferente aspecto. Locual ta semper un exito ta e dedicacion cu ambos tin pa nan restaurantnan. Traha den un bon atmosfera tambe ta esencial pa cu e exito aki.“Y den nos caso, Urvin su dushi cuminda” Mary-Anne ta bisa.
Locual pa Mary-Anne y Urvin ta importante ta pa semper na final combersa cu otro di con e dia a bay, con a bay cu e muchanan, kico ta riba schedule pa e siman. “Lo mas importante ta pa pone otro hari y brasa otro, bisa otro tur dia con hopi bo ta stima otro”.
Conseho
“Nos conseho ta pa semper ta bo mes den un relacion. Compronde otro y confia otro. Tur obstaculonan dificil ta pasahero. Tur problema tin solucion y tur fayo por wordo pordona. Prepara boso mes mentalmente pa dedicacion y sacrificio. Vooral den e mundo di Horeca cu bo no tin Pasco, Aña Nobo y mas dianan di fiesta. E tempo liber cu tin habri, haci mas uso di dje pa disfruta di otro y di famia”.
NOMBER COMPLETO Urvin Darrell Croes - Mary-Anne Lisette Werleman EDAD Urvin 38 aña, Mary-Anne 34 aña ESTUDIO Urvin – SVH Gespecialiseerde Koks Opleiding, Mary-Anne - Farmakunde PROFESION Urvin – Executive Chef, Mary-Anne – Operations Manager
