Maite Delgado

“Mi ta lanta den un hogar hopi feliz y hopi uni, te ora mi mayornan a divorcia”, Maite ta conta y despues di esaki e ta dal e hari cu e ta asina famoso p’e. “Mi no ta hari paso e ta algo pret, sino paso e ta berdad”. E tin dos ruman homber y un ruman muher chikito. “Mi tata a casa despues y mi mester bisa cu mi ta sali sumamente bon cu mi madrastra. Mi famia ta un di e cosnan cu mas mi ta haya falta di dje paso nos ta un di e famianan Venezolano ey cu ta gusta topa pa come hunto, cushina, pasa e dia y haci hopi desordo, esey den mi famia ta ley”! .

Maite a traha sumamente duro durante su carera. Cuminsando como un hoben modelo, el a wordo aserca y a participa despues den e certamen di Miss Venezuela na aña 1986. Esaki tabata e aña cu a produci masha hopi mucha muhernan exitoso, cuminsando cu Barbara Palacios kende na final a keda corona como Miss Universe, tambe Catherine Fulop cu a bira un actriz famoso, Carolina Perpetuo cu ta un primera actriz, Raquel Lares cu ta locutora. Maite a keda como segunda finalista y e tempo ey el a representa Venezuela na Miss Turismo, cual el a gana. “Na momento cu mi a bolbe bek, mi tabata wordo invita pa tur cos, tur caminda nan tabata entrevistami, kiermeen cu mi tabata un cara hopi conoci durante e aña ey”. Asina a surgi e prome oportunidad di locual lo a bira un carera briyante. E tempo ey Venevision tabata en busca di un cara nobo, pa anima un programa cu nan kier a lansa estilo Good Morning America. Ya caba e canal tabata tin e reporteronan cu lo a yuda sostene e programa pero tabata falta e animadora.

E ta bisa cu tin un dicho na Venezuela cu ta bisa “si algo es para ti, ni que te quites” y esaki ta locual a pasa cune den su carera, simplemente e tabata t’ey na e momentonan crucial y na e lugar corecto, aunque trahando duro y semper cu hopi pasion. “Mi a keda selecciona como e animadora pa e programa y e tempo ey e tabata ‘live television’, no tabatin teleprompter y bo no por a bay bek y drecha nada, dus e tabata e mihor scol cu mi por a siña for di dje como animadora”. Durante su ilustre carera di 25 aña, Maite a bira un di e caranan mas famoso di e television Venezolano, cu programanan manera Complicidades cu el a haci pa mas di 5 aña y tambe e programanan mas mira di television Latino Americano manera Miss Venezuela y e antesala di esaki. Tabatin periodonan cu e tabata graba 3 programa riba un dia. Maite ta sinti su mes afortuna di por a forma parti di e television Venezolano den su “Era Dorada”, e periodo di añanan ’90 y principio di e siglo aki. “Nos tabata e scol di television y produccionnan grandi pa locual ta television Latino Americano/ Sur Americano y te hasta pa Mexico”.

Tabata despues di 25 aña di traha incansablemente pa Venevision c’un contrato lucrativo cu Maite a dicidi di “part ways” di forma amistoso cu e canal di television. “Ora bo ta traha cu pasion, bo por tin fama y placa, pero ami nunca a traha pa esey, aunke mi tabatin tur dos, semper mi a traha paso mi tabata gusta locual mi a haci”. E ta splica cu el a yega un punto cu Venevision na unda nan no tabatin e mesun interesnan mas, e situacion di Venezuela a haci cu medionan di comunicacion mester a censura nan mes y sigui traha manera nada no tabata pasando eyfo. “Nos no tabata e spiel mas pa sociedad na unda nan por a mira e realidad cu nan ta bibando aden, no tabatin placa pa inverti den produccionan di calidad y inevitabelmente, nos a perde e abilidad di ta e pioneronan den television Latino Americano manera nos tabata ta prome”

Maite no por a identifica su mes mas cu e canal y a dicidi cu si no tin pasion mas. E no ta huzga niun hende of critica nan posicion, alcontrario, e ta pensa cu cada ken tin su motibonan pa tuma nan desicion. Den su caso el a y ta sinti cu ora bo ta artista bo ta traha pa henter e publico, pero ora e situacion ta yega na un polarizacion y un radicalizacion asina grandi, bo mester tuma un banda. “Den
mi caso mi ta para na e banda contrario di e gobierno actual na Venezuela, mino por bira mi lomba pa e publico cu semper tabata tey pami y pretende cu nada no ta pasando.

“Ami a namora na ‘primera vista'”. Maite a mira su futuro casa, Alfonso, pa prome biaha na e aeropuerto di Miami. Alfonso e tempo ey tabata un professional tennis player kende tabata capitan di Davis Cup pa Venezuela y a participa den varios torneo internacional.

Naturalmente un persona asina conecta cu tur cos cu tin di haber cu media social y tambe cu noticia mundial y locual ta conciente di e situacion cu Aruba a biba recientemente na unda hopi Venezolano a busca refugio di e situacion na nan pais aki na Aruba. Maite ta pensa cu cada persona cu yega Aruba di exterior mester sa con pa comporta nan mes segun e leynan na Aruba y tambe mester ta ehemplar den nan comportacion. “Locual mi ta pensa tambe ta cu criminalidad no tin nacionalidad, tin ladron di tur rasa y tur nacionalidad y tur color, nos no mester marca un hende a base di su nacionalidad”. Tambe e ta kere cu ta importante pa no lubida riba esnan cu awor ta pasando den momentonan duro, pero cu tempo cos tabata bon, tabata asina importante pa Aruba, manera e Venezolanonan.

Mi ta pensa cu temponan ta cambia y sigur Venezuela lo lanta di e crisis cu e ta pasando aden actualmente y asina e turista Venezolano lo bira un biaha mas importante pa Aruba”.

Su amor pa Aruba ta conoci pa hopi tempo caba. “Na mi cas tempo nos tabata mucha, na Estado Falcon, semper tabatin un rol di keeshi Hulandes y manera bo por imaginabo, e keeshi ey tabata cumpra na Aruba”. For di tempo e tabata mucha e tabata bin Aruba cu su mayornan y despues ora cu e tabata un profesional riba su mes e tabata bin pa pasa vakantie akinan. Ya pa basta aña Maite y su casa tin un cas na Aruba y den pasado caba tabatin negoshi estableci akinan cu algun amigonan local. Durante e ultimo aña y mei el a practicamente muda pa Aruba, na unda sigur di cada luna e ta pasa 3 siman akinan. “Na mi cas semper nan a siña nos e siguiente frase “El que tiene tienda, que la atienda” y esey ta conta pa cas, negoshi y casa”!. Mirando e situacion na Venezuela y e complicacionnan cu esaki ta trece cune pa haci negoshi, su casa a dicidi di expande den exterior. “Cu e devaluacion di e Bolivar e ta bira cada biaha menos conviniente pa haci negoshi na Venezuela, nada no ta wordo produci eynan y pa colmo ora bo bay cambia e Bolivar pa cualkier otro moneda, e ta bal cada biaha menos”. Considerando cu nan tin propiedad akinan caba y tambe cu semper Maite a pensa di eventualmente bin biba akinan ora e stop di traha, nan a dicidi di expande aki na Aruba. Un oportunidad hopi biaha ta hiba na otro y asina a presenta su mes e oportunidad pa habri Le Garage Bistro. Hunto cu nan partner cu tin hopi experiencia culinario y ta run Flying Fishbone cu ta un di e restaurantnan mas exitoso na Aruba, nan a tuma e paso. “Mi ta enamora di e lugar y nada no ta hacimi mas feliz cu por representa Venezuela awor den exterior c’un negoshi asina y contribui na e economia di Aruba cu mi ta stima asina hopi”