Un poco luz den un tempo di scuridad pa hopi. Xclusivo Online a haya confirmacion cu e tan gusta parke di luz na San Nicolas lo ta un realidad e aña ‘ki atrobe. Esaki segun Selma Helder, vocero di Fundacion Juventud Uni Seroe Preto, kende a bisa cu Aruba lo por disfruta di e atraccion tradicional aki di fin di aña, maske cu e biaha aki e lo ta diferente.
E fundacion a haya OK for di Prome Minister Evelyn Wever-Croes, como hefe di Crisis Team, pa dal bay. A pone si diferente condicion pa cu esaki, como por ehempel, cu mester tin suficiente staff na e sitio pa controla cu ta cumpli cu e protocol di siguridad, sanitizer, etc.
E ‘luz berde’ aki for di autoridadnan a habri caminda pa e grupo a sinta bek na mesa pa explora con por logra proyecto ainda. Esaki ta despues cu bek na juni a anuncia atrabes di nan pagina di Facebook ‘Casita Di Luz’ cu, a raiz di henter e situacion di e pandemia, tabata imposibel pa nan organisa e atraccion.
Entre e decisionnan cu e fundacion, lidera pa Marcelo Wout, a tuma; ta cu no tin tempo pa bin cu un tema nobo y lo decora mescos cu aña pasa. E celebracion grandi di 35 aniversario cu lo mester a tuma luga e aña aki, tambe nan ta pospone pa e proximo temporada.
Bishitantenan no por baha, pero si por haci un ‘drive by’; kier men sea ta den nan propio auto, den van of bus, por pasa dilanti di e seroe y admira e luznan kedando semper paden di e vehiculo. Na e sitio no ta bay tin acceso na baño, benta di cuminda y bebida, ni tampoco presentacionnan di musica en bibo.
Tur esaki ta pone cu e fundacion no tin mester di tanto recurso, manera den añanan anterior. E presupuesto pa 2020 ta di 5 mil Florin, y pa esaki a manda un carta solicitando donacion na Setar N.V. for di kende ta sperando contesta.
Helder a indica cu e compania a duna indicacion positivo, pero no pendiente di un confirmacion p’asina por cuminsa cu e trabounan. Tambe el a menciona cu Casita di Luz na Seroe Preto lo ta e unico atraccion di luz pariba di brug pa fin di 2020, ya cu nan a compronde cu Grot di Lourdes, ni Divino Niño, ni cas di famia Ras na Palo Marga lo bay decora.
Casita di Luz na Seroe Preto ta spera di por tin nan cendemento y apertura oficial riba e prome diasabra di December cu ta dia 5. For di awor, ta gradici tur e comentarionan di entusiasmo y apoyo ricibi, y ta pidi comprension y cumplimento di parti publico pa e reglanan stipula pa e biaha aki.
