Contrario na conseho cu DOW a duna Gobierno di Aruba, e decision a cay cu ta permiti e importacion di seis container di klapchi pa 2020. Esaki a keda confirma dor di vocero di Cuerpo Policial, Lito Lacle, kende a indica cu ya permisonan pa benta a keda aproba y actualmente DVG ta trahando riba e medidanan di precaucion den relacion cu COVID-19. E procedura lo inclui p.e. barera di Plexiglas pa no tin contacto directo cu publico.
Manera indica den prensa, un cantidad grandi di klapchi a resta for di e temporada di benta den December 2019. E stock aki ta almacena na e deposito na Wela y ta consisti di mas o menos 11 container. Teniendo esaki na cuenta, y probablemente un poder di compra debilita pa e crisis economico, importadornan a pidi pa importa e biaha aki, solamente 6 container adicional.
E conseho negativo di DOW tabata parcialmente basa riba kehonan creciente over di contaminacion na medio ambiente, consecuencia pa oido y molester pa mascotanan. Probablemente Pais Aruba a evalua esey hunto cu e popularidad di klapchi y su luga de nos tradicion di fin di aña, mas ainda den un 2020 caminda hende ta hambra pa celebra y ‘core cu fucu.’
Mientras cu esaki lo ta bon noticia pa hopi, y malo pa otro hopi mas, ta confirma cu ciere di 2020 lo tin klapchi. Esaki ta nifica tambe cu un Meta Corporation (celebrando 100 aniversario) lo por tene su tradicional pagara riba L.G. Smith Boulevard y Setar por tin su vuurwerk show. Ta hopi importante si pa recorda cu, aunke klapchi ta trece un entretenimento grandi pa hopi de luna di December, no mester lubida di tene precaucion y sigui tur e recomendacionnan pa evita accidentnan cu por trece desgrancia y dolor.
