Alexlindy, ‘Lindy’, no a pensa nunca cu su 28 aña e lo ta para su so como un mama soltera, dilanti di su mesun negoshi y cu tur e proyectonan den cual su dede ta poni riba dje na mes momento. Sentimientonan di felicidad, dado momento angustia pero tambe paz, cual a cuminsa cu embarazo y nacimento di su yiu muher Jane Elisabeth.
E mes a lanta den un hogar unda el siña e balornan grandi pa ethica y moral den bida. “Mi a crese cu siguransa, stabilidad, compashon y amor di tin un famia completo c’un fe grandi pa logra y surpasa tur obstaculo cu bida trece den caminda”. Un famia completo algo cu Lindy awor no tin e dicha di por ofrece su yiu como un mama soltera. “E no tabata na ami pa a scohe di ta un ‘single mom’; debi na circumstancianan di mi relacion cu tata di mi yiu cu mester a caba, esaki a bira e unico opcion cu mi tabatin. P’esey mi mester a dicidi pa ta fuerte suficiente, enfrenta e realidad aki y sigui bay dilanti cu mi yiu”, e mama hoben ta bisa. “ Y e base den cual el a crece ta locual e ta bisa di ta loke e kier laga atras pa su yiu. Na prome instante ora mi tabata sperando mi baby, mi tabatin e miedo di keda mira den un manera negativo. Pero desde e dia cu mi yiu a nace, e miedo aki a kita pasobra mi sa cu den mi curason, mi a duna tur cos di mi banda pa e relacion cu e tata di mi yiu por a bay dilanti, p’asina nos por a forma un famia pa nos yiu. Aunke kizas mi yiu lo no tin e seguridad di un famia completo awor, lo mi haci mi best pa por ofrece esaki un dia”.
Asina mes Lindy ta bisa di no tin problema pa laga e tata ta presente di un forma of otro den bida di su yiu. “E ta fundamental p’ami como mama pa duna mi yiu e oportunidad pa tin contacto cu su tata mas hopi cu por. E ta importante pa mi por tin un bon comunicacion cu su tata, aunke nos no ta hunto mas. Esaki ta p’asina por duna nos yiu un mihor calidad bida, pasobra na final, t’e felicidad di nos yiu ta locual ta mas importante”.
E prome simannan despues cu Jane Elisabeth a nace, tabata yena di un mescla di emocion, segun Lindy. “E tabata algo hopi nobo p’ami yen di felicidad pero alaves hopi duro tambe. Duro pasobra mi no a planea pa mi ta un mama soltera y sigur no tabata kier pa esaki a bay asina.
E parti aki ta locual a yenami cu hopi tristesa, tanto pa mi yiu como mi mes. Mi unico pensamento tabata cu e no lo bay crece den un famia”. Pero den mesun rosea, Lindy ta bisa di tabata sa con pa enfrenta esaki danki na e manera cu el a keda educa pa su mayornan y e sosten di su amistadnan. E tabata hopi duro, y ainda ta, pero tur dia mi ta lanta c’un fe den mi curason pa encurasha mi mes pa por sigui bay dilanti pa mi yiu. Un mama soltera ta haya ‘double the work’. Bo tin tur e responsabilidad bo so y bo tin hopi menos tempo pa bo mes compara c’un pareha cu ta comparti e responsabilidad of kizas t’ey eynan pa yuda nan pareha constantemente. E momentonan mas duro ta cu, por ehempel, mi yiu a caba di haya su djente y esaki a yenami cu felicidad pero alaves e tabata duro pasobra tabata nos dos so; asina ‘ki mi a bin na realisa cu su tata no ta bay ta presente den cada un di e ‘milestones’ den su bida”. Pero Lindy ta reconoce cu tin hopi momentonan special tambe; “e hecho cu mi ta pasa tur mi tempo cu mi yiu ta yenami c’un amor profundo cu mi nunca a yega di sinti”.
Palabra di sabiduria na Jane Elisabeth pa futuro:
“Semper kere den bo mes, y nunca give up. Tin compacion pa esnan rond di bo, y ‘be brave and always be kind to everyone, even those who do you wrong. And always remember that when life throws you lemons, I hope you drink enough coffee, put on your favorite designer heals on and handle it. Trust me, you can do it”.
Mama soltera & entrepreneur
Entre un baby nobo y su fase como un mama soltera, Lindy a saca tempo y a habri su boutique “Lindy Lifestyle Boutique” y a haya su forma con pa mescla esaki. “P’ami, e rol como mama semper ta bin na prome lugar; Pero door di ta un entrepreneur, mi tin e flexibidad pa ahusta e orarionan di mi negoshi cu ta dunami e libertad pa mi por tin mas tempo cu mi yiu; Si mi mester hiba mi yiu trabou, e ta bay cumi. Mi yiu muher ta hasta popular caba den caya grandi entre e comerciantenan”, e ta bisa cu humor. Desde cu Lindy a cuminsa cu su boutique, el a sa di crea eventonan pa mercadea caya grandi den un forma exitoso, creando fluho di clientenan tan desea pa comerciantenan. E kier simplemente haci su parti y tambe yuda.
Su ‘me times’?
“Aunke e ta dificil, como un mama bo mester percura pa ‘take care’ di bo mes den bes en cuando, sea ta relaha, drumi of baña bo so, lesa un buki, haci bo cabey of manicure pa por tin e sensacion di individualidad den bo bida y no perde bo mes”.
Futuro?
Amor; esaki no ta un prioridad den mi bida na e momentonan aki, pero sigur cu si un dia si amor drenta bek den mi bida, mi lo accepta esaki cu man habri.
