Kimberly Joanne Hoo

Kimberly Joanne Hoo (32) un enfermera, specialisa como ‘Intensive Care Nurse’. Na 2019 Kimberly a tuma e decision pa lanta su mesun negoshi, ‘NursAbility’. Cu esaki, Kimberly kier brinda esnan di bishita na nos dushi isla e cuido y guia cu nan mester pa si nan bira malo repentinamente of mester di cuido. Awor cu nos ta den un pleno crisis mundial, e panorama completo a cambia y esaki ta pone tur hende para keto, incluyendo Kimberly.

“Mi a cuminsa cu e opleiding di verzorgende (MBO-opleiding na Maastricht) y despues mi a stroom door pa verpleegkundige niveau 4 (MBO ROC na Eindhoven)”. Despues di esaki Kimberly tabatin ambicion pa sigui studia y a scohe pa stroom door pa haci su estudio HBO Verpleegkunde na Fontys Eindhoven. “Ora mi a bolbe Aruba bek, mi a haya e oportunidad na Dr. Horacio Oduber Hospital pa haci mi specialisacion den Intensive Care. Mi a scohe pa enfermeria paso semper mi tabata un persona cu ta gusta ta den contacto cu hende y duna un man unda cu tin mester. Mi ta kere tur hende tin un “gift” pa haci algo y den mi caso e trabou di enfermeria no ta solamente un trabou pero mas un pasion cu Dios a bendiciona mi cune. Mi no ta wak mi mes ta haci algo diferente cu no ta e trabou aki”

NursAbility ta duna servicio di enfermeria priva y a keda lansa na Juli 2019 y ta pa turista y local. “Na e momento cu mi a cuminsa traha na HOH mi a ripara hopi liher cuanto turista ta yega eerste hulp y tambe cuanto di nan ta wordo opgenomen. Hopi di nan ta bin pa cosnan cu por a keda atendi door di un enfermera cual por a preveninan di warda pa un cierto tempo na hospital. Mi a wak con nan “vacation feeling” ta keda kita di nan na momento cu nan yega hospital. Ora mi a wak esaki pasa diferente biaha, mi a pensa cu cuido pa turista mester por bay hopi mas facil y eficiente. Pa e motibo aki mi a cuminsa haci research y asina “NursAbility” a keda crea. Na e momento cu mi a lansa NursAbility, mi a haya hopi reaccion di localnan tambe puntrando mi si NursAbility tin servicionan pa nan tambe. Asina mi a cuminsa tambe cu diferente ‘care packages’ pa hendenan local”.

Kimberly su vision pa NursAbility ta pa duna cuido excepcional na turista y hendenan local. Aki por pensa riba cuido basico te cu cuido specialisa. “Cualkier nurse assistance of servicio c’un persona tin mester nos ta ofrece den e comfortabilidad y conveniencia di nan mesun acomodacion of hogar.

“Nos como enfermera semper ta na riesgo pa keda contagia cu diferente virus paso nos ta exponi na esaki diariamente durante di nos trabou. Apesar di e riesgo aki, cada un di nos a haci un promesa pa duna cuido no obstante e situacion cu e pashent ta aden. Awor cu COVID-19, e promesa aki cu cada un di nos a haci como profesional ta sigui. Mi ta kere cu mundialmente hendenan a bin realisa ki importante e ta pa simplemente laba bo man y proteha bo mes”.

“Den mi opinion e cos di mas importante ta pa keda trankil y sigui protocolnan cu ta keda anuncia via di DVG. Ora bo ta sinti panico y miedo, e no ta yudabo cu nada, mas bien e por hacibo malo. No enfoca riba e chaos pero enfoca riba e solucion cu ta: no sali for di cas si no tin mester, sigui protocolnan di hygiena cu mester tuma pa combati esaki, educa bo yiunan tocante e asunto aki pa nan tambe ta na altura. P’ami personal mi fe den Dios tambe ta hunga un rol grandi den esaki”.

Nomber completo: Kimberly Joanne Hoo

Edad: 32

Estudio: Bachelor’s Degree in Nursing, specialisa como Intensive Care Nurse

Profesion: Managing Director di NursAbility