Jeremy Garcia ta un otro Arubiano cu recientemente a participa den The Voice of Holland. Siendo un studiante Jeremy tambe a wak e oportunidad pa participa den e programa aki cu ta asina popular. Sera conoci cu e Jeremy cu aparte di ta un studiante, ta biba su pasion cual ta musica aya na Hulanda.
Infancia
Jeremy tin 22 aña di edad y a lanta den bario di San Nicolas, serca di Congoweg. “Mi a lanta na mi wela su cas, den un famia cu hopi amor y respet pa otro locual a siñami respeta hende mas grandi cumi. E recuerdo di mas bunita di mi infancia tabata ora mi a canta pa Reina Beatrix di Hulanda ora mi tabata canta na YMCA na San Nicolas. Esey tambe tabata e dia mas nervioso di mi bida.
Descubrimento di su talento
Jeremy ta conta cu el a cuminsa canta ora e tabatin 7 aña na YMCA San Nicolas ora e tabata bay Traimerdia. “Eynan tabatin un señora cu tabata dunami les di canto tur diahuebs hunto cu otro muchanan. Cu 11 aña mi a cuminsa toca piano den misa y mi a siña esey basta liher. Cu 12 aña mi a compone mi prome cantica”. Cu 18 aña Jeremy a cuminsa tuma musica na un manera mas profesional. “Mi a haya un trabou na Hard Rock Cafe pa canta eynan y esaki a bay asina bon cu nos tabata cantando eynan 6 biaha pa siman.
Eynan mi conocemento pa entretene hende a bira mihor door di “trail en error”. Djis di comete eror y siña di esaki paso mi no tabata sa full kico pa haci den cuminsamento”.
Studiando pa haci di su pasion su trabou
“Aworaki mi ta bibando casi 3 aña na Hulanda y mi a kies pa studia pa ‘Music Producer’ pasobra mi kier a avansa den grabamento y con pa ‘mix y master’ musica p’asina mi por graba y saca mi mesun canticanan na un nivel mas halto”. Como hopi studiante studiando na Hulanda, Jeremy tin un trabou banda di su estudio. “Aworaki mi sa traha tur caminda cu mester di musica, pero mi tin un trabou vast na un cocktailbar yama George Cocktailbar. Aki mi ta traha tur diabierna caminda cu mi tin posibilidad di no pa djis saca mi cara como artista, pero tambe showcase otro ‘upcoming artists’ cu no sa haya e oportunidad pa canta na cierto lugarnan. Banda di esaki mi ta bezig ta cabando mi album pa no solamente hende cu ta compronde Ingles pero tambe Papiamento”.
Participando na "The voice of Holland"
“Desde cu mi a yega Hulanda, mi meta tabata pa participa den The Voice Of Holland pa mi por support y pusha mi isla dilanti. Tambe pa mi por haya un ‘boost’ como artista na Hulanda, por bira mas conoci y keda reconoci cu e fin di haya oportunidadnan pa toca cu artistanan grandi. Mi a pasa den e ‘Blind Auditions’ caminda cu tur 4 stoel a bira p’ami y mi por a sigui pa The Battles cu tambe a bay bon pero lamentablemente te eynan mi por a yega den e programa aki”. Jeremy ta añadi: “Honestamente, mi mester a pasa den 3 audicion prome cu mi por a haya un ‘si’ dus mi mester a canta varios cantica pa mi por a mustra nan cu mi por domina mi mes y un stage pa canta. Tambe mi tabatin dianan pa practica mi so y tambe pa practica cu e ‘zang coaches’ pa wak con mihor mi por a laga e cantica zona”.
Locual Jeremy a siña di e experiencia aki ta con pa dedica tempo na kico e ta kere den dje y pa semper keda su mes pasobra den e mundo di artista y cantante, hopi biaha bo lo por perde bo mes y lubida ken bo ta como persona. “Ta importante pa bo ‘always stay yourself’”.
“Despues di haci mi audicionnan, mi a bay cas y nan a mandami un email un par di dia despues bisando mi cu mi ta den The voice of Holland. Eynan ami a bira loco paso mi tabatin dos aña so na Hulanda y mi a logra algo asina grandi pa mi por sali riba The Voice. Dus di ber- dad mi ta hopi bendishona di por a haya e oportunidad aki”.
Pa Jeremy como Arubiano participando den The Voice of Holland, el a sinti mas cu orguyoso cu di berdad e por a sali den e programa aki y cu e por a saca cara di Aruba dilanti den exterior.
“P’ami tambe esaki ta nifica cu Arubianonan tin talento paso nos tin hende cu no sa aprecia nos hobennan riba Aruba pero pa wak di berdad cu nos tin talento, sin importa ki sorto di artista bo ta”.
Futuro musical
“Awor mi lo kier caba mi scol y sigui un estudio na nivel di HBO den musica pa mi lo por sigui desaroya mi talentonan y mi coneccionnan aki na Hulanda”.
Jeremy su conseho ta pa sigui e dicho cu el a traha cu ta bisa: “If I sleep somebody else will accomplish my dream for me”. “No drumi riba bo soñonan paso bo nunca sa con leu bo por yega cu bo talento si bo kere den bo mes.’
So stop sleeping and start doing, you got this!
NOMBER COMPLETO: Jeremy Esteban Garcia Avila EDAD: 22 aña ESTUDIO: Albeda Muziek Producer PROFESION: Full time singer/songwriter BARIO: San Nicolas
