E tin 15 aña trahando den e mundo radial y 10 aña cu Magic FM cu su programa Traffic Jam di dialuna pa diabierna di 2’or pa 4’or di atardi. E ta encanta su trabou, e contacto cu su publico ta constante. Aparte di ta un DJ na radio, e ta fungi como tal tambe na e mihor fiestanan rond Aruba, pues ya caba Jean Carlos Henriquez (37), su nomber original, ta loke nos conoce como un ‘household name’. Ta manera su bida ta un fiesta pero locual hopi no tabata realisa antes, e lucha silencioso cu sobrepeso cu DJ Vibes tabatin durante su bida. Algo cu a cuminsa, sin cu e mes a ripara.
DJ Vibes ta corda su niñez den bario di Dakota manera ta ayera; e ta e mas chikito cu 2 ruman. Deporte el a yega di experiencia pa 1 aña solamente, voetbal pa ta specifico y tempo cu e tabata na MAVO el a hunga basketball, pero mas como hobby cu amigonan band’i cas. E no tabata un mucha excesivamente gordo, pero tampoco e tabata un mucha flaco. “Mi ta corda vooral mi defunto tata tabata bisami semper “come mi yiu, no worry”, e ta conta. E ta admiti awe cu e hecho di no haci mucho sport y come malo, a hibe na crece y aplica un mal custumber den su forma di biba, cu a hibe na bira un persona cu sobrepeso. E trabou como DJ no tabata yuda tampoco.
“No tin hopi movecion combina cu come malo y anochi laat despues di toca tabata lo peor cu mi por a haci cu mi curpa ts bay come riba caya”. Cu edad di 36 e tabata pisa 201 kilo y cu sobrepeso, a bin problemanan tambe. Tur cos cu bo por pensa tabata dificil p’ami; mi a cuminsa sinti hopi dolor di lomba, pia y tabata “Mi auto estima tabata abou”, e DJ stima ta conta. Hopi vez el a cuminsa explora e posibilidad pa haci Gastric Bypass, operacion pa haci su stoma mas chikito p’asina yude baha peso, pero e magnitud di esaki tabata strobe.
Un yamado salvador
E DJ den su trabou ta keda aserca semper pa musica, pero aña pasa na September di 2015, el a keda aserca c’un propuesta completamente diferente. “Willeke Kok Di Coca Cola tabata trahando c’un gym pa haci un evento pa baha peso pa companianan y e tabata kier p’ami tambe participa representando Magic FM. E programa tabata yama Choose 2 Lose cu e gym Cuts & Curves. Mi a accepta y mesora a cuminsa duna mi 100 porciento na esaki. Berdad ta cu mi tabata fada den e curpa cu mi tabata aden. E tabata hopi motivante.
Nos tabata 25 persona c’un coach, un docter y nutricionista unda nan a sera nos un weekend den un villa, unda pa e weekend completo, nan a educa nos riba e consecuencia di sobrepeso y e beneficionnan di un bida mas saludabel y cu movecion. Mi rutina di training tabata tur dia dia 7’or pa 9’or di anochi unda unicamente diasabra so nos tabata liber pero ami tabata purba haci algo toch riba e dia aki”
Awe cu 25 kilo despues, DJ Vibes ta felis. Su meta ta 25 kilo mas ainda. E cambio ya ta visibel, su cara ta mas mas chikito y su pañanan di antes, logicamente nos ta sirbie mas. El a cambia su forma di biba unda e ta considera dos biaha kico e ta come, aunke tin biaha e ta dificil pero e ta keda pusha su mes. Tur mainta e ta lanta y cumpli cu su training. DJ Vibes ta bisa cu facil berdad e no ta pa haci loke el a logra, pero imposibel tampoco. El a ripara cu come saludabel na Aruba ta hopi caro como tambe falta mas informacion riba cosnan cu ta malo y henden no ta realisa. Su conseho pa otronan eyfor cu ta pasando den e lucha cu el a biba aden pa hopi aña ta; Bo por haya mil conseho pero corda cu na final, t’abo so para den bo mundo, ningun hende por yudabo si bo mes no kier yuda bo mes
Mi kier gradici tur hende cu di un of otro manera a yudami y ta yudando mi te dia di awe pa cu mi meta y danki pa e suport di semper; na Cuts and Curves gym ( Jacinto , Rashid, Sherly y su casa y full e Choose to Lose family ), na Magic FM, Erin Croes cu a lagami representa Magic y a push dimes, na Francis Gil y Nancy Maya. Na mi famia y my amigonan, danki di curason.
