Janiro Eisden

E nomber ta conoci pa basta aña caba. Desde su tempo hunto cu Basic One, pa su lansamiento como solista, Janiro G. Eisden ta un artista cu bo no por kita mas for di e panorama musical di nos isla.

For di e bario di San Nicolas unda cu el a lanta, Janiro, Ataniro manera actualmente e ta conoce musicalmente, ta un hende di tur hende. Cu añanan, Janiro a keda crea hits no obstante con hopi e mundo musical ta cambiando. Cu su mas reciente ‘Sin Webo ‘N Tin Fiesta’, Janiro ta demostra atrobe kico ta hacie diferente for di tur otro. Sera conoci mas di serca cu Janiro, Ataniro La Leyenda…

Janiro ta conta cu el a lanta den e bario di San Nicolas. Un bario cu semper e ta carga cune unda cu e bay y den tur locual cu e haci. M’a lanta den cas cu mi mama y tata y mi ruman muher. Basisschool mi a bay na St Michael school, Mavo mi a bai John Wesley, despues MTS- Cesar Terzano (Bouwkunde) djei mi a bai ROC Utrecht na Hulanda y studia Social Pedagogische Werker.”

Locual mas Janiro ta corda di su infancia y hubentud ta con e tabata riba caya tur dia y asina mes tabata haci cosnan sano, manera hunga wega di Kiniki, core bais di San Nicolas pa Playa, baila Hip Hop/Street Dance riba caya dilanti cas, haci tur tipo di deporte y hopi mas.

Di chikito Janiro tabata sa cu e por a canta pa motibo c’un maestra di scol, juffrouw Lila, semper tabata bisa su mayornan cu e gusta su voz y e kier pa e canta den su koor.
‘Mi no tabata gusta canta paso mi tabatin e pensamento cu cantamento ta pa mucha muher. Na aña 1991 na MAVO mi tabatin un amigo den klas cu a bin for di Hulanda cu e cultura di Hip Hop. Na San Nicolas nan a organisa un ‘school talent search’ y mi amigo Dino Dirksz a bisami ban rap pero na Ingles.

Y ta asina nos a scirbi nos mesun cancion y traha nos mesun beat serca un DJ y bai presenta. Asina ey cos a cuminsa den Bonaire Club na San Nicolas.’

‘M’a studia na Hulanda pa motibo cu eynan tin mas oportunidad pa bo escohencia den estudio. Mi a traha casi 10 aña den verslavingzorg na Aruba y mi a sinti cu mi mester a sigui crece den educacion. Y mi a dicidi di haci esaki. Mi a bai studia bek cu 27 aña. Actualmente mi tin 8 aña trahando na DPL(Departamento pa Progreso Laboral) den e departamento di Job center.

Mi funccion ta Traject Arbeidsbemiddelaar, mi ta traha hunto cu Reclassering, Sociale Zaken y otro instancianan cu kier pone personanan riba mercado laboral. Mi ta busca trabou pa personanan tambe cu no ta mara na un instancia.

Pa Janiro, combina su trabou artistico no tur ora tabata facil, pero cu añanan el a siña con pa haci esaki. ‘Na prome instante e tabata poco dificil pero despues di añanan haciendo esaki bo ta custumbra. Mi tin añanan sin bay un vakantie pa motibo cu tur mi dianan di vakantie mi ta uzanan pa viaha y haci presentacionnan internacional.’ Asina ‘ki Janiro ta demostra tambe cu no solamente e ta un artista local, pero semper a sa di representa Aruba intenacionalmente tambe.

Pa Janiro, crea cancionnan cu ta pega na tur radio, ta un arte.
E ta un don cu Dios a dunami cu mi ta agradecido na dje. E ta un talento cu poco di nos ta nace cune. E bendicion aki ta uno cu tin biaha mi mes ta sorprende mi mes, Paso awendia pa bo sobresali, bo mester ta mas c’un musico.

Farandula a cambia por completo. Awendia musica ta mara na hopi cos mas cu djis toca un instrumento of djis tin un bunita stem. Musica ta mara na fashion, bo imagen y hopi mas.

Despues di varios aña di noviazgo, Janiro a casa na 2016 cu Nicole Pop cual e tin un famia cune. Pa Janiro nada no a cambia desde cu el a casa. Tur cos a keda mesun cos. Eigenlijk e comprension a bira mihor. Pa motibo cu nos tin 15 aña hunto, e sa tur cos cu ta come y bebe rond di un artista.

E sa ora di bay duna show ta un trabou e ta. No ta di 8 ora pero ta uno basta intensivo toch y ta dunami mi trankilidad.

Janiro su ‘challenge’ y su deseo di mas grandi ta pa por biba mas largo cu e por y brinda su famia tur cos cu nan merece na e mundo aki sin cu nan mester pasa den ningun clase di dolor of circumstancia nan di sufrimento pa falta di e cabes di cas of bon tata.

‘Esey ta parti di profesionalismo. C’un tiki educacion bo mester por sa kico por na trabou y kico no. Den mi bida priva tambe mi ta super cauteloso pa motibo cu mi no ta solamente un trahador di DPL pero mi ta un figura publico tambe.

Y si bo kier of no, un gura publico, e hende nan ta mir’e cu diferente ‘wowo’. Nan ta lubida cu nos tambe ta hende.

Mi no ta tuma nan na malo ta p’esey mi ta cauteloso den hopi aspecto. Nos niun ta perfecto pero si den cierto situacionnan door di nos imagen, nos mester ta ehempelnan clave pa comunidad.’

Janiro ta desea di wordo reconoci rond mundo como artista Arubiano. ‘Lo mi conoci rond Mundo den e idioma Ingles of Spaño cu mi propio estilo di musica y mi voz unico cu mi tin, sin ayudo di ningun artista conoci internacionalmente p’asina demostra cu placa ni fama no por surpasa e don cu Dios a brinda nos. Mi a sali 1 den zomer carnaval na 2007 cu Cayente Cayente.