Den historia nos por recorda e rumannan Orvile y Wilbur Wright cu a inventa e aeroplano. Den tempo mas moderno bo por papia di Serena y Venus Williams den ramo deportivo. Na Aruba tambe tin ehempel cu Xclusivo mes a yega di ilustra manera esun di Chris y Omar Steve Lejuez. Tur ta lagabo pensa riba kico ta hiba cierto rumannan na tin un dinamica asina exitoso den bida y crece pareu.
Sea bo ta adora nan, of nan ta hacibo loco, rumannan ta hunga un papel grandi den e dinamica di un famia. Y mientras ta remarcabel ora c’un persona den famia ta alcansa logronan grandi, e ta ainda mas remarcabel ora cu dos of mas ruman ta haci esaki hunto. Awe nos ta combersando cu Ivo y JP Fernandes riba e tema aki.
“Apesar cu nada ta bayendo normal e aña ‘ki”, manera Ivo Fernandes mes a bisa, nan ta keda traha duro y for di distancia pa asina nan proximo proyecto mira luz di dia.
Esey ta un stacion moderno di gasolin na Cura Cabai cu ta programa pa habri den luna di October proximo. Hunto cu su ruman Jean Paul (JP), kende ta biba na Corsou, ta cargando e proyecto aki ademas di e operacion y gerencia di e stacion di gasolin na Paradera cu a habri na 2017.
Debi na COVID-19 y su conscuencianan, e ehecucion di e proyecto a complica. “Nos a encontra retraso den construccion, tecniconan cu no por a bin for di exterior, ekiponan cu no ta yega na tempo, inseguridad continuo den e continuidad den construccion, etc.,” asina Ivo Fernandes a comenta. Un situacion cu keto bay mester keda analisa hunto, riba un base diario, pa haci e ahustenan necesario. E rumannan ta pone aden e conocemento y experiencia cu ta basa riba mas cu 4 decada largo di trayectoria den e sector aki na nos isla ruman.
Ivo y JP semper tabatin un laso special cu Aruba, aunke nan mes a nace y lanta na Corsou. Nan mama ta di Aruba y for di chikito nan semper a wak nos isla como nan di dos cas. P’esey tabata mustra como un stap logico pa expande e negoshi familiar na nos isla. E duo, cu ta goza di un excelente comunicacion tanto den ambito familiar como profesional, kier bin cu un infusion di ideanan nobo den e mercado di stacionnan di gasolin.
Teniendo na cuenta cu haci negoshi cu miembro di famia ta algo delicado y cu no tur biaha ta bay bon, Xclusivo a puntra Ivo & JP kico ta nan formula pa traha hunto exitosamente. Nan a splica cu for di chikito nan a complementa otro, y esey ta continua te dia di awe. Fuera di esey nan ta kere cu factornan manera comunicacion y confiansa ta importante. Ambos ta percura pa keda riba mesun liña y bay tras di e mesun metanan.
Mientras tanto, e individualidad no ta bay perdi tampoco. Ya cu mientras Ivo tin un pasion pa e deporte di beach tennis y boto na Aruba, JP ta aporta grandemente na e conscientisacion di Autismo na Corsou. Ambos ruman ta destaca entre famia y amigonan pa nan ‘joie de vivre’ y ta den movecion constante.
