For di centro di ciudad pa area hotelero y di pariba te panoord, Aruba completo ta afecta pa cantidad grandi di sangura. Xclusivo Online a contacta Gele Koorts Muskietbestrijding (GKMB) pa haya sa kico ta e maneho cu ta hibando pa contraresta e molester cu tin e potencial den bira otro menasa pa salud publico. Director di GKMB, Luis Tchong a indica cu durante ultimo par di siman e yamadanan pa e departamento a aumenta drasticamente, loke ta refleha tambe riba social media.
E plan di accion actual di GKMB ta pa atende tur yamada cu ta ricibiendo di ciudadanonan, registra e adres y despacha un unidad cu ta bay controla si e cas mes por tin algun criadero. Si esaki no ta e caso, ta tira bista riba bisiñanan y espacionan publico den e area. Riba pregunta di Xclusivo Online si tin un bario of barionan specifico cu tin hayando mas yamada, Tchong a indica cu e kehonan ta bin for di tur distrito.
E motibo principal di e cantidad grandi di sangura ta varios. Na prome luga tin e temporada di yobida frecuente cu no ta duna chens na e plas y otro cantidadnan di awa almacena pa seca riba nan mes. Tambe tin e hecho cu ainda no ta tur persona ta consciente di luga of obhetonan den nan cura cu por ta colecta awa y bira criadero.
Por ultimo, Tchong tambe a menciona e tendencia creciente den actividad di agricultura. Sea cu ta haci’e pa negoshi formal, entrada extra of como hobby, esnan cu ta planta ta probecha yobida pa warda awa den hemchi y barinan y no semper ta tapanan bon. Personal di GKMB a yega di haya hende ta warda aw ate hasta den freezer biew caminda a constata cu tabatin criadero.
Adicionalmente GKMB ta atendiendo brote di sangura registra na area di hotel tanto na e high rise, como low rise. Un di e puntonan aki ta e pas patras di South Beach Center caminda e awa no tin afvoer ni pisca cu por yuda combati e sanguranan dor di come e larva. Director di GKMB a splica cu ta fumigando na e areanan aki, mescos cu na Savaneta/Mangel Halto y Pos Chikito. E fumigacion ta tuma luga den ora trempan di mainta pa asina no crea un molester pa turistanan.
Xclusivo Magazine tambe a puntra GKMB dicon no ta haci uso di e truck di huma pa pasa fumiga den e diferente barionan. Riba esaki e director a duna di conoce cu tin varios motibo. Prome cu tur cos, e spuitmento di kimico tin su efecto negativo riba medio ambiente, mescos cu pa mascotanan, y ta mata solamente e sangura, pero no ta elimina e criaderonan; kier men e problema ta sigui. Por ultimo, e sistema aki ta traha contra e esfuerzonan di conscientisacion pa nos tur ta pendiente di e criaderonan rond di nos cas.
Tchong a indica cu GKMB su funcion original ta pa controla e criadero di sangura den areanan publico riba e isla. E ciudadano mester pone di su banda pa controla den su cura di cas y yuda combati criaderonan di sangura. “Tin biaha e por ta un simple coi hunga di mucha,” Tchong a bisa.
Pa GKMB e truck di huma ta e medida di mas drastico, emplea solamente ora cu ta registra un brote di malesa manera Dengue, Zika of Chikungunya. Si abo tin molester di sangura controla cu e criadero no ta den bo mesun cas. Tambe por yama GKMB na 585-3333.
