Visionario
Tempo cu Ewald Biemans a yega Aruba mas di 50 aña pasa, Aruba tabata un isla virgen, pristino y practicamente “untouched”. Cu e entrada di e industria turistico y yegada di trahadornan di exterior, Aruba su importacion a subi y tambe nos cantidad di sushi y polucion. Ewald a realisa hopi tempran c’un cambio mester a tuma lugar y a cuminsa hopi tempran na haci ahustacionnan cu awe ta haci cu su Resort Bucuti y Tara tur dos tin e Green Globe Platinum y e Travelife Gold Certification. Ewald Biemans mes a keda reconoci tambe cu e Gold Adrian Award na 2017 como un lider den turismo sostenibel.
Haciendo e diferencia
Biemans tabata un di e doñonan original di Manchebo Beach Resort y ta responsabel di a planta mayoria di e palmanan den e area. Na final di añanan ’80, el a construi locual awor ta Bucuti como un “wing” nobo pa Manchebo. Na 1991 el a split y a sigui cu Bucuti su so, pero c’un vision hopi cla di locual e kier a crea. Su preocupacion mas grandi tabata ta cu si laga Aruba bay, e lo bira un lugar sushi na unda ningun turista lo desea di pasa su vakantie mas, manera a pasa cu otro islanan den Caribe.
Cambionan den su hotel cu e tempo ey tabata revolucionario tabata separacion di awa di douche y awa di toilet, motion sensor pa lus, separacion di sushi pa recyclahe cu reduccion di sushi di mas di 60% y prohibicion di uso di disposable plastic den e resort, cu excepcion unicamente di saco di sushi. Esaki tur prome cu ningun ley of maneho di gobierno a keda implementa encuanto e tema aki.
Na cuminsamento sigur no tabata facil mirando cu el a encontra resistencia di gobierno y tambe instancianan cu tabata mira e programa como un manera pa un negoshante enrikese su mes door di spaar energia y busca productonan den bulk. Tur producto cu tabata produci energia alternativo of tabata spaar coriente por ehempel tabata sumamente caro. Tambe tabatin resistencia pa instalacion di aparatonan cu por a produci energia solar of di biento.
Poco poco cu hopi pasenshi y perseverancia a logra educa e comunidad y esnan envolvi encuanto e tema aki. Asina a forma gruponan di hotel interesa pa keda certifica, a duna educacion y informacion na scolnan y a lansa campañanan pa educa comunidad.
Viaheronan cu ta conciente di sostenibilidad ta esnan cu ta sa cu nan mester actua responsabel door di disfruta di Aruba su naturalesa sin impacta of destrui locual ta atrae nan na nos isla. E turista mes ta hopi conciente di e daño cu e por causa. Comunidad di Aruba mes ta forma parti clave pa un programa asina por funciona.
E hotel ta promove arts y crafts local, produccion di productonan local y agricultura y ta posee e cantidad mas halto di certificacion relaciona cu sostenibilidad den nos region. Na aña 2016, Bucuti te hasta a keda reconoci como e “Most Sustainable Resort in the World” for di Green Globe. Tur esaki danki na e vision pionero di Ewald Biemans. Aruba mester di 100 Ewald Biemans mas y nos ta mra esaki.
