Naci na Colombia, Estefania (22) a haci deporte como adolecente na su pais caba. “Mi tabata hunga Rugby, cu tabata masha popular na Perreira, unda mi tabata biba. Ora cu mi a yega Aruba, mi a keda e prome aña sin haci nada pero despues si mi tabata sinti cu mi mester a cuminsa move y haci algun tipo di deporte”, Estefania ta cuminsa conta.
Bodybuilding pakico no?
“Despues cu mi a conoce Rene Wild mi a cuminsa papia cune pa guiami con pa mantene mi curpa fit y pa e yuda mi entrena. Unavez den gym, mi tabata mira e pashon cu hopi hende tabata hinca den nan entrenamento y mi curiosidad pa e deporte di bodybuilding a cuminsa spierta.
Mi a haya sa cu Rene tabata un experto den prepara hopi hende den e deporte aki y asina mi a haya e motivacion pa purba, pakico no?
E prome cambio p’ami tabata mi forma di come. E alimentacion ta ensera hopi disciplina y dedicacion. E clase di alimentacion pa un competencia den comparacion uno pa mantene, subi of baha di peso ta full diferente.
Disciplina & decicacion e unico receta pa logra
“Mi tabata train prome 4 vez pa siman despues mi a aumenta esaki pa tur tur dia den siman. E parti di alimentacion tabata keda un reto paso aunke Rene ta dunabo e guia, tin vez bo ta hayabo cu bo ta cansa, paso bo ta keda hende. Por ehempel bo mester come 6x pa dia y tin momento cu simplemente bo no kier come mas mientras tin otro momento cu constantemente bo ta sinti hamber.
Tin momento cu bo ta fada di come e mesun cosnan y bo ta hayabo ta bira creativo con pa haci cambio sin afecta e tipo di cuminda cu bo tin cu come pa haya e nutricion pa bo curpa por desaroya. Mi ta corda e ultimo lunanan prome cu e competencia tabata bira cada vez mas intenso. Tabatin momentonan cu bo ta pensa pa ‘give-up’ paso bo ta haya e reto cu e cuminda y caloria ta baha mientras e entrenamento ta bira mas duro. Pero ora bo ta wak e resultado, bo ta motiva bek. Mi tin cu bisa cu ora bo ta riba e escenario ta competi, nada mas ta importa.
Goal
Mi kier sigui competi y yega na e punto final di desaroya mi curpa den perfeccion. Mi meta ya yega na mi Pro Card y bira un personal trainer. Mi ta admira muhernan cu ta den gym y ta train nan curpa paso e ta tuma hopi disciplina. Nunca ami a pensa cu mi por haci riba un nivel asina leu. E ta un bon experiencia pero e ta un deporte cu ta costa hopi. Sigur si bo ta comprometi cune.
E ta un deporte caro paso e ta tuma un preparacion di sigur 6 pa 5 luna c’un nivel di alimentacion hopi preciso pero si bo ta comprometi, aunke bo a cuminsa, bo por logra. Mi a participa na 2 competencia te aworaki; Mr. Aruba na 2017 unda mi a keda na prome lugar y Ben Weider na 2017 unda mi a keda na di cinco lugar. Un cos cu mi por bisa cu e ta posibel.
