Team Xclusivo Magazine a haci un encuesta di 3 dia riba e pregunta si ta di acuerdo pa kita e cartera di Minister Lopez-Tromp, despues cu e decision aki a keda anuncia pa Minister Evelyn Wever-Croes. Mesora e votacionnan a drenta cual a conclui awe mainta cu 87 porciento contra y 13 porciento pro e posicion aki.
Mientras cu pa 8’or di awe mainta Marisol Lopez Tromp lo ta den parlamento pa atende e moshon di desconfiansa di parlamento contra su persona y cu ta menasa na retire como minister, na su yegada ayera for di Hulanda el a bisa cu e ta cla pa bay defende su posicion completamente.
Bo ta di acuerdo cu e decision di gobierno pa retira cartera for di Min. Marisol Lopez-Tromp?
IMPASSE
E impasse cu a conclui na e reunion publico di awe mainta a cuminsa momento cu Andin Bikker hunto cu parlamentarionan Howell y Maduro a tene un conferencia di prensa dia 5 di Juni 2020, señalando cu nan partido POR ta retira tur confiansa den nan colega minister di partido. Entre motibonan duna e tempo ey tabata e decision pa pidi proteccion contra creditornan di Serlimar via surseance van betaling y pa falta di comunicacion.
Aunke e tempo ey a duna un deadline pa e retira den 3 dia, a bin un proceso di mediacion pero cu finalmente a conclui dia 27 di Juli, ora cu lider di POR a bolbe sali afor bisando cu lo no reuni mas den ministerraad si Lopez-Tromp lo ta presente y a usa e ‘vertrouwensregel’ indicando cu no tin base pa continua e relacion di trabou cune mas. Aki Bikker usa motibonan e.o. cu e minister lo a ridiculis’e den prensa y decision di Lopez-Tromp riba asunto di UTV’s y spearfishing. E situashon aki a pone prome minister Evelyn Wever-Croes anuncia cu e ta kita cartera di Minister Lopez-Tromp pa bienestar di gobierno, mientras cu simannan prome a bisa di lo no mete ya cu tabata trata di un asunto interno di Partido POR y no di gobernacion.
Awe Marisol Lopez-Tromp a bisa di lo t’ey pa contesta tur pregunta y cu e lo kier tende di cada parlamentario nan motibo pa retire como minister. Comunidad lo por sigui e reunion publico aki via medianan local y canal di parlamento di Aruba mes.
