Emilia Lopez Henriquez no ta un desconoci den mundo di hospitalidad. Despues di a studia Orlando Community College na Merca y finalisa, el a bolbe bek Aruba na 2003 y a cuminsa traha na Marriott Stellaris Resort & Casino como concierge, y ta di eynan su pasion pa cu e industria di hospitalidad a cuminsa.
OPORTUNIDAD
Semper e tabatin un interes pa traha na The Ritz-Carlton di dia cu nan a habri na Aruba. “The Ritz-Carlton, Aruba ta un hotel luhoso y mi por bisa cu ta ful un otro experiencia, riba un otro nivel y p’ami ta un honor di por ta forma parti di e famia aki ya pa 4 aña y mei”. Emilia a scohe pa traha aki durante temporada di Pasco caminda cu e team di Solanio a bin come pa nan Christmas dinner na e restaurant caminda cu e tabata traha e tempo ey. “E manager y supervisor di Solanio a puntrami si mi lo ta interesa pa traha cu nan ya cu nan a wak hopi potencial den mi y lo mi ta e prome hende muher cu lo a forma parti den e team di Solanio pa dinner. No a tumami hopi tempo pa a dicidi y mi a tuma e posicion cual cu te dia di awe ainda mi ta traha den dje”.
E ARTE DI BARTENDING
‘Locual mi ta gusta mas di ‘bartending’ ta cu mi ta experimenta cu diferente sabornan unico, pero specialmente cu mi ta incorpora ingredientenan local den mi cocktails”. Hende homber hopi biaha ta domina e mundo di ‘bartending’ pero Emilia a sa di sobresali, kibrando asina e imagen aki. “E mundo di bartending no ta uno facil. E ta un mundo hopi interesante pero alavez ta rekeri hopi practica. Mi ta super contento di mira cu toch e parti aki ta cambiando. Serca nos na The Ritz-Carlton nos ta varios muhernan eherciendo esaki y den competencianan internacional tambe por mira cu mas hende muher ta competiendo”.
INSPIRACION PA PARTICIPA DEN E COMPETENCIA DI BARTENDING
“Pa bisa berdad, mi a bai competi djis ‘for the fun of it!’ Mi nunca a traha como bartender y ta gewoon un pasion cu mi tin por bisa ta un di mi hobby nan dus dos aña pasa The Ritz-Carlton, Aruba a organisa su prome competencia di bar yama Masters of the Craft. Esaki ta un iniciativa di Marriott International pa duna oportunidad na e trahadornan pa demostra nan talento den mixologia. Mi a dicidi di competi djis pa haña un tiki mas ‘knowledge’ den e area, sin cu mi por a imagina di sali e ganador di e competencia como e prome Bartender di aña di The Ritz-Carlton, Aruba na 2017”.
‘TEQUIPICA’
Emilia ta conta cu locual ta special di e cocktail cu el a crea yama Tequipica, ta cu el a incorpora 3 ingrediente local den dje cual nan ta e Pika di Papaya, yerb’i hole y Aruba su cerbes local Balashi. “E nomber a wordo escohi door di un colega dimi ya cu na e momento cu mi mester a manda tur informacion pa concursa den e competencia di e region di Caribe y Latino America, mi no por a pensa un nomber pa e cocktail y mi no tabatin hopi tempo pa brainstorm. Mi colega aki a menciona ‘Tequipica’ y el a zona super nice y a cuadra perfectamente cu e cocktail”.
E CONTEST
“Mi tin 3 aña concursando, cual 2 di nan mi a gana e titulo maximo y esey tabata e caso e aña aki atrobe despues cu aña pasa mi no a logra. Mi ta kere e nificacion principal ta cu determinacion y dedicacion bo por alcansa tur e metanan cu bo ta pone bo dilanti. E ‘highlight’ principal ta cu mi nunca a traha den un bar y toch mi a logra bay cu e titulo maximo pa 2 aña caba y cu esaki mi a logra motiva personanan pa participa na e evento y cual nan a logra yega te den final tambe”.
REPRESENTACION NA MEXICO
“E experiencia p’ami tabata uno inolvidabel, djis pa a logra ta den e top 4 semi finalistanan di full region Caribe y Latino America caba tabata un logro cu nunca mi a soña di yega. Ora cu mi hefe a bin surprendemi cu e noticia, mi a hasta yora di alegria. Adicional pa despues haya sa cu ami tabata e unico muher cu lo a competi na Mexico tabata gewoon un sentimiento cu mi no por describi. Sigur mi a sinti mi mes proud y accomplished”.
SATISFACCCION
Emilia ta conta cu e arte di bar ta uno hopi bunita y interesante. Y sigur tin hopi hende muher capacita pa participa na e evento nan aki. E satisfaccion mas grandi pa Emilia ta cu cu e guestnan ta sali for di e restaurant contento y satisfecho cu e servicio brinda na nan y sigur di por wak nan bolbe. Emilia ta sigui diferente trend den e mundo di Mixology. “Mi ta sigui varios bars di diferente pais cu ta hopi moderniza den e arte di Mixology p’asina mi por keda innova y bin cu cosnan unico pa cu mi cocktail creations”.
RUTINA & FUTURO
‘Mi por bisa cu mi orario di trabou no ta uno facil. Mi ta un mama soltera di 3 yiu cual ta rekeri hopi atencion y tempo, pero contento cu e sistema di trabou ta permitimi 2 dia off cu mi por pasa tempo cu nan. Mi trabou sa ta hopi flexibel ora ta yega na famia y ta percura pa tin un bon balans entre esaki.’
Otro aña Emilia lo yuda organisa e bartender competition na The Ritz-Carlton,Aruba pa haci esaki mas grandi. Emilia lo kier tin su propio bar caminda cu e kier bin c’un bar c’un concepto unico y moderno cu no tin aki na Aruba ainda.
