Elliott Loonstra para athlete

Elliott a lanta y crece den e barionan di Playa y Dakota. El a bai International School for di basis te voortgezet onderwijs y despues di esey el a bai Loyola University na New Orleans y Universidad di Aruba. Na momento cu el a termina su estudio na Loyola, el a bolbe Aruba y a bai yuda den e negoshi familiar pa algun aña pero eventualmente el a scohe pa bolbe bai studia na Universidad di Aruba tumando e lesnan den Hospitality y Tourism management.

Despues di esaki el a bai traha na Brouwerij Balashi pa sirbi su interes den cerbes y con esaki ta wordo traha. “Mi ta bin di un tremendo famia, hopi relaha y ‘open minded’, mi ta stima nan masha hopi mes, mi mama ta cushina super bon y e ta hopi artistico mientra cu mi tata ta super bon den construccion y cu articulonan electronico”. Elliott tin un ruman homber cu ta biba na Aruba y un ruman muher cu ta biba na USA.

Elliott ta falta su man net bou di su elleboog, e tin un pida voor arm, pero no mucho. E no ta un caso accidental, nunca e no a perde su brasa, simplemente el a nace asina. El a cuminsa cu Teakwondo tempo cu e tabata hopi jong y a practica pa 2 aña, eventualmente el a stop. Hopi aña despues su coach actual, Luciano Mazzeo, a tope na su cas y a puntr’e si e lo ta interesa pa practica Taekwondo atrobe.

“Tabata na un punto di mi bida cu mi tabata kier a practica Arte Martial atrobe dus mi a bai di acuerdo cune pa bolbe purba y for di eynan mi tin awor mas o menos 7 luna ta train hopi duro. Nos a caba di bin bek di nos prome competencia internacional”, e ta conta c’un entusiasmo visibel. Elliott no ta completamente sigur con e disciplina aki ta ‘ fit’ asina bon cune, pero e ta disfruta di e desafio di competi, di siña e diferente tecnicanan y formanan, e hecho cu e ta keda den bon forma fisico y e hecho cu e por representa su mes y Aruba. E deporte a dune un proposito!

E weganan Para- Pan Am Open tabata su prome experiencia den e mundo di Para Taekwondo of competencia internacional por lo general, e punto di bai un competencia asina tabata pa haya experiencia den e tipo di competencianan asina. “Despues di a bolbe di e competencia mi tabata sa cu mi lo kier train mas duro pa e competencianan cu tin den futuro y inspira hendenan rond dimi pa sali y purba haci cosnan cu nan no ta kere nan por”. No tin hopi para- athletes na Aruba cu Elliott sa di nan, pero e ta pensa cu e ta hopi importante pa apoya e poconan cu tin paso un para-athlete ta pasa hopi trabou pa logra domina e disciplina cu e ta competi den dje y e ta un sacrificio personal hopi grandi.

E meta cu ta mantene Elliot personalmente motiva ta pa yega e Paralympics Tokyo 2020 na Hapon, e idea di yega na e evento mas magno den deporte y representa su pais. ‘Mi training ta bayendo hopi bon, mi ta mira hopi progreso y mi ta siñando hopi cos nobo”.

Eliott ta train 5 dia pa siman, Dialuna, Diaranson y Diabierna e ta train pa dos ora y Diamars y Diahuebs solamente atardi. E mester a haci algun cambio den su estilo di bida, particularmente su forma di come, e mester a come hopi mas sano p’asina e por a haya un mihor forma mas liher. “Un parti fastioso ta cu mi no por topa cu mi amigonan mesun hopi cu normal, pero nan ta compronde pakico y nos ta traha tempo ora cu por”.

E ta spera di por subi den ranking door di participa na mas evento den futuro sercano y na caminda pa Tokyo 2020 cu ta su “ultimate dream”. Pa esnan cu ta mira bida di forma negativo of ta sinti na mes victima di un situacion, Elliott por sirbi como fuente di inspiracion. “Ami ta gusta mira e cosnan positivo den bida, pakico enfoca riba cosnan negativo of locual bo no tin? Semper lo tin momentonan menos bon, pero door di enfoca riba e positivo semper, bo lo tin esey pa anhela na dje.

Publico en general tin e tendencia di mira hendenan cu desabilidadnan fisico como diferente of como hendenan cu mester di ayudo constante, cual no necesariamente ta berdad. Un cos cu ser humano ta bon den dje ta adaptacion y hendenan cu desabilidadnan fisico tambe ta adapta hopi bon. “Den mi caso mi lo haci e cosnan diferente paso ami mes ta wak nan diferente tambe y con di mi mesun forma mi lo por logranan”.

Apesar cu di bon curason hopi biaha un hende ta core bin yuda, Elliott ta splica cu e ta wordo aprecia pero no semper tin mester, mirando cu kizas e ta bezig ta wak con pa hacie su mes. “Tur hende ta diferente di apariencia, esey ta e parti great di humanidad, nos cu tin desabilidad tambe tin un apariencia unico, pero nos ta hende mescos cu tur otro”.

Pa esnan cu tin desabilidad e ta bisa: “Bai eyfo y purba, bo no mester tin miedo di locual otronan ta pensa dibo, e unico persona cu ta conta ora cu bo ta bin na haci cosnan cu bo kier logra ta abo mes”! Stop di worry kico hende ta pensa of si nan lo ‘judge’ bo y bo no mester tin miedo di faya paso net di e fayo bo ta siña mas, e ta e momento cu ta ponebo crece y desaroya den e persona cu bo mester bira pa futuro. “Bai eyfo, haci e foutnan, cai y lanta bek, mientras bo ta contento cu locual bo ta haciendo y bo ta siñando algo, cu desabilidad of sin desabilidad, just sali eyfo y hacie”!

Luciano (42) tin experiencia cu taekwondo for di aña 2000. El a cuminsa na Argentina, despues el a muda pa Hulanda y el a sigui subi den ramo como coach. Na 2015 el a bira un Para- Coach oficial (nr 6 di mundo), unico na Aruba y unico pafor di USA den nos region. “For di 2007 pa 2012 mi tabata e national manager di Argentina na Europa, ora e teamnan a participa na Europa pa 4 – 6 siman, Luciano tabata na encarga di contact tur e federacionnan, haci registracion, book e kambernan, transportacion”. Asina serca e tabata cu e por a haya un bista serca di atletanan grandi y mira con nan ta train y nan metodonan.

Na cuminsamento di 2017, como un scuba diver profesional Luciano a bai e cas di Elliott pa yena su tankinan di scuba y eynan
nan a conoce otro. “Mi a punte si e lo ta interesa pa train taekwondo y eventualmente participa den competencianan di taekwondo internacional”. Luciano a haci un presentacion na henter e famia di Elliott mustrando nan film, e equipment y tambe e diplomanan cu e lo por haal for di South Korea si e cuminsa train. Tur hende tabata hopi entusiasma y asina na Januari 2018 nan a cuminsa cu e training oficialmente.

Segun Mazzeo Elliott ta particular paso e ta hinca hopi tempo den su deporte y preparacion pa yega na su goals, e ta scucha
hopi y analisa, trece opinion y idea durante training. “E ta un atleta inteligente durante competencia dus e no mester demasiado coaching, solamente guia”. Luciano ta adapta Elliott su training basa riba locual e por haci y dependiendo di su condicion. E desafionan mas grandi pe ta e desbalance cu e tin den su curpa, por ehempel na cuminsamento un simpel ehercicio di core tabata dune dolor na su lomba. Mayoria hende cu haya amputacion ta adapta pero nan musculonan ta desaroya caba, den caso di Elliott door cu su brasa nunca no tabata tey, esaki ta exigi cu e mester training especifico y hopi “core exercise”.

Luciano ta mira Elliott su oportunidadnan hopi grandi den Olympiada Paralimpico, paso e ta un deporte relativamente nobo den Olympiada y no hopi pais ta desaroya den taekwondo paralympico y specificamente den nos region ta Mexico, USA y Aruba so. Pesey e ta importante pa Elliott concentra bon, mira y observa durante e competencianan cu ta bin pa asina e por haya mas experiencia y mustra cu Aruba ta presente den e mundo di competencia di Para Taekwondo.