“Mi a nace 12 di Augustus 1939. Mi mama tabata yama Anastacia Reyminda Jacobs y mi tata Hilario Casper Britten. Mi tabata e di ultimo di 7 ruman cual un tabata homber y tur e restonan muher. Mi tabata e laatste, mi a bin manera di sorpresa…
Mi a lanta na Calabas 71. Si bo scucha mi rumannan conta con nan a lanta, mi tin cu bisa cu ami a lanta masha dushi mes. Nan a lanta diferente manera den nan bida di antes, laga nos bisa nan mester a bay busca awa na pos y cana bay scol. Ami tabata bay scol den e Chevrolet Impala di mi ruman muher Ninita, q.e.p.d.. Ami no a pasa den e cosnan ey, bo mes sa, di e tempo ey caba ami tabata ‘Clarita Moderno’.
Mi a bay Mulo School Maria College. Despues mi a tuma les di type y shorthand for di Frere Chikito. Ma bay tuma les di boekhouding anochi pero mi no a cabe. Mi prome trabou tabata na Sherathon Hotel cu mi 20 aña ney. Ma traha den reservation y boekhouden. Despues ma traha cu Lago y despues ma bay traha na Colegio Arubano. Tabata dushi eynan. Mi tabata yuda organisa fiesta cu e muchanan. Despues ma tuma un tempo pa bay vacantie y djey ora ma bolbe ma bay traha cu FCCA, eynan mi a traha masha dushi mes. Despues di ma bisa ta basta ma traha suficiente y ta ora pa bay cas.
Clarita & amor
“Mi tata tabata un tiger, bo mes sa, e tabata hopi streng. Mi no tabatin mag di sali, asina mes ma haya mi prome sunchi na scol, of mihor bisa, pafor di scol. Bo mes sa, paden di scol nos tabatin nos seur Dorothea cu tabata masha streng tambe.
Pero manera bo ta pafor di e porta di scol, bo ta otro hende. E yoncuman di mi prome sunchi a fayece caba. Na cas di mi tata si nunca ma haya niun ‘boyfriend’ bin cortehami. Despues ma haya uno si cu ma keda tres aña cune. E tabata bin buscami y nos tabata bay Aruba Caribbean Hotel, come dushi cangrew y lobster na Astoria y baila riba bou na Strand Hotel. E lugarnan ey mi tabata bay, lugarnan chic. Mi a gusta su manera con el a tratami. Nos tabata pasa masha dushi mes, lastima e tabatin un otro religion. Ami tabata Catolico, pues esey tabata trece contratiempo. Awendia mi ta yena di regalo cu el a dunami, eseynan ta recuerdo… ”
Esey tabata e amor di Clarita su bida?
“Bo sa, segun mi cu si paso ma haya yen admirador despues pero nan no a ‘fix’. Bo sa kico tambe mi ta bisa, nan mester tin un bon trabou paso awendia bo ta capaz di haya un yoncuman cu ta bon bay AO, AO y keda cas. Ami un por cu e cosnan ey. Ami ta un muher balente riba tur tereno. Mi no a casa nunca, mi gana a bay pero mi tin yen admirador si.
Clarita conociendo mundo
Mi a yega di biaha bay Baranquilla, Venezuela pero nunca ma bay Merca p’esey ma dicidi pa tuma 6 siman di vakantie pa mi bay conoce mundo. Manera bo ta wakmi aki, mi no conoce Miami. Mi a bay directamente pa New York. Hombo New York ta dushi. Ma keda na Johnson Hotel y mi a keiro hopi eynan. Ma conoce Yankee Stadium. Despues ma bay Denver, Los Angeles, conoce Beverly Hills y Hollywood y Texas.
Clarita su so?
“Wel, laga nos bisa, aha, mi so. Despues di ey, ma coy bus y ma pasa Sierra Nevada. Masha dushi mes, bo mester hacie. Asina ma yega Las Vegas. Ma keda na Bally hotel, fantastico. Eynan mi a wak Rocio Durcal cu Juan Gabriel. Tambe Julio Iglesias mi a wak eynan. Ma pasa masha dushi mes, kico bo kier mi bisabo. CMB a fiami placa. Bo mester ta bon pagado si. Despues mi a bay Mexico lindo y querido y puero Vallarta, eynan ta na unda Nixon a bay sconde.
Con e Mexicanonan tabata?
“La ley del monte; nan tabata canta ranchera bay gol. Despues m’a bay Houston looking for cowboys. Mi a sinta eynan hasta den e stul di e hendenan cu a bay luna.
Djey ma coy un otro avion bay Mc Allen. Mi a bay hopi lugar mes y no un biaha, sino tres biaha. Otro vakantie dushi cu mi a bay ta Hulanda. Ma hiba mi ruman muher Ninita cumi. E tabata soña tur ora cu Papa Juan Pablo II, kiermen ma bolbe fia placa y pasa man pa mi ruman y mi a dicidi pa hibe Hulanda y despues nos a laga tumba pa Roma.
Eynan nos a sinta den un audiencia cu Papa sin sa si no lo haya e chens pa wake di serca. Mi ta corda con nos tabata sinta leu aya y diripiente Papa a bin strit serca mi ruman y pone man na su cara y brase pa un rato masha largo mes y bise algo den su orea. El a keda felis. Despues, e tabata un caminda di cruz pa nos por a sali di e lugar pasobra tur hende tabata bin mishi cu mi ruman paso Papa a mishi cune un rato prome. Nos a sigui pa Suiza, Alemania y Paris. Ami a viaha y conoce mundo, t’esey ta bida. Contento y alegre. Ami ta echt enjoy life, no worry cu hende no gustabo of tin rabia riba bo, zelos ta loke tin nan malo. Ami no, locoooo.
Clarita VS atracador
“Ami nunca ta biba porta habri pero net e dia cu e atracador a drenta mi cas, mi porta tabata un poco habri. Mi a caba di yega for di supermarket. Mi a pone tur cos den cushina cu mi a dicidi pa sinta un rato wak television. Bo mes sa, mi tabata cansa. E porta tabata net ‘op een kiertje’ lugar shon atracador a drenta paden y cay na rudia mi dilanti. Ma kere ta pordon e tabata pidiendomi. El a pone su nanishi riba mi nanishi pa mi wak su dos wowonan. Su cara tabata tapa y e tabata full bisti na preto cu handschoen na man. Mi tin cu bisa cu su wowonan tabata masha bunita si, nan tabata color cla. El a cuminsa pidimi pa oro. Ma bise p’e papia drechi cumi y eynan el a puntrami pa mi camber y a bentami abou. Ora el a bisami lanta, ma bise pa e mes lantami cu delicadesa, el a hacie tambe. El a skop mi pober ruman Wika si, lage na un banda di su bil tur blausa. E pober a haya sla den sla, anto net mi ruman ey cu semper ta yuda tur hende”.
Clarita no a sinti miedo ningun momento?
“No, atami ‘ki, katan katan.
Ora porfin el a bay, Clarita a sinti alivio?
“Si, cu tur e polisnan rond mi ma sintimi dushi. Mi ta stima e polisnan, nan ta tuti tuti paso nan tur a bin full speed na granel mi cas cu awor ta luci. E polisnan a dunami un servicio cu nunca mas lo mi lubida. Mi no kier pa hende criticanan”.
Fama & ofertanan na granel
“Ora cu hende a cuminsa yamami, bishitami, trece t-shirt y sticker cu zelos aki y zelos aya, mi a puntra mi mes ta kico ta pasando? P’ami e tabata un sorpresa paso no ta algo agradabel a pasami. Ma kere hende lo a bay tene compasion cumi mescos cu e dushi polisnan. Ami nunca tabata den man di polis. Nan por habri y sera nan computer cuanto cu nan kier y nan lo no haya mi nomber eyden paso Clarita ta mi nomber y Britten ta mi fam. Pero berdad e tabata un sorpresa. Awo mi tin fama y mi ta contento si pa esey. Nan ta bisami cu mi a duna e hende muhernan hopi power y esey mi ta gusta. Awor mi a conoce hopi hende cu mi no sa unda pa cuminsa cu nan. Ma conoce hende di Hulanda, Brazil, Los Angeles, New York. Companianan cu ta bin serca mi, Clarita paki y Clarita paya. Mi ta purba atende tur, mi no sa con pa parti mi mes. Awor ma haya un oferta pa traha c’un compania exclusivamente. Mi a gusta e oferta y mi kier cumpli cune. Corda ta penshonado mi ta.
Mensahe na atracador: Señor atracador, pakico bo a drenta asina den mi cas? Si ta un poco koffie bo tabata kier lo mi a dunabo. Si bo no tabatin moda, lo mi a dunabo un plato di cuminda. No tabatin mester pa bo haci asina cumi y mi ruman. No pasa ki banda mas paso awor si lo bo haye alomenos cu ta pa pidi mi ruman Wika pordon pa con ba haci cune.
Conseho na hobennan: Boso studia bon y haci uzo di boso tempo, corda e tempo cu pasa awe no ta bolbe bek. Cu bo estudio bo ta haya tur chens pa forma bo bida manera bo ta desea, vooral awor den e mundo moderno aki.
Conseho na fanaticonan di Clarita: Danki, mara mi por tin e tempo pa sinta na mesa y cuminda tur. Pero mi tin cu biba tambe. Mi ta manda un cordial saludo y masha danki pa tur e mensahenan. Boso no lubidami, un sunchi y brasa yen di amor pa boso tur.
Size di sapato: 61⁄2 Color: Cora Perfume: Bloom by Gucci Cantante: Julio Iglesias, Rocio Durcal y Juan Gabriel Religion: Catholico
Cuminda: Lambchops Bebida: Gatorade Joya sagrado: Holoshi y renchi casamento di mi tata Habito sagrado: Mi ta dura 1 ora den baño ora di baña. Despues mi ta hunta crema y spray perfume riba full mi curpa.
