Mi ta bayendo Paris, London y Amsterdam pa concierto hunto cu J. Balvin y despues di esey mi ta keda un rato Hulanda pa haci algun grabacion prome cu mi bolbe Aruba djis un rato pa sigui pa Colombia, Mexico y Miami unda nos lo ta den Premio Lo Nuestro”. Esaki ta prome informacion cu Jeon (27) ta duna nos mientras cu e ta drentando e area cu nos a ‘set up’ p’e unda ta machika auto y heronan bieuw, den apenas algun ora pa por haci un sesion di potret cune prome cu e subi avion pa su tour na Europa.
Speechless ainda
Aunke no ta prome vez cu nos ta haci entrevista cu Jeon, esaki ta un entrevisa diferente. Jeon awor no ta e nomber conoci entre nos islanan y Arubianonan biba afor unicamente. Desde lansamento oficial di e cancion Machika dia 19 di Januari 2018, su nomber a bira conoci pa miyones di persona den apenas algun ora. Jeon tabata na Aruba pe lansamento dilanti un grupo di persona pero mesora e dia siguiente mester tabata na California na unda e hoben Arubiano cu a drop out di EPB pa sigui su pasion pa musica, a biba su soño di mas grandi, hiba su musica riba un plataforma internacional.
“E tabata algo hopi great, mi no por splica, e ta algo unico. Mi prome concierto tabata dilanti mas o menos 30 mil persona unda mi por a canta cu tur mi energia un produccion cu a nace dimi un tempo atras.
Mi tabata hopi nervioso mes mi no por gaña. P’ami, tur cos a pasa asina liher. Ainda mi ta speechless pa tur cos, esaki t’e cos mas grandi cu mi a soña cune. Tur loke mi tabata soña cune y tabata wak riba video, ta exactamente asina. Mi por bisa Jacqueline esey paso mi ta bezig ta bibando e realidad di mi soñonan’, Jeon ta bisa tur emociona y semper cu su respet na ora di dirigi sumes na un otro persona.
Nacimento di Jeon
E sensacion y acogida cu Machika ta hayando mundialmente ta berdad increibel y ta mustra caba cu esaki ta simplemente e cuminsamento pa Jeon. ‘Ya caba mi ta trahando cu 4 diferente otro artistanan cual nombernan nos lo menciona te ora e dealnan ta completamente sera. Mi por bisa tambe cu mi ta bay saca un cantica pronto c’un otro artista hopi grandi y esey tin mi hopi emociona. Mi ta e prome artista cu J. Balvin a ‘scout ever’, dus e ta poniendo tur su atencion riba mi y mi ta hopi gradicido mes pa esey”. Pensando bek, nunca Jeon lo por a pensa cu su viahe pa New York lo habri e porta pa mundo den e forma aki p’e y asina liher.
“Mi tabata na New York pa cuminsa un carera nobo, pa conoce hende y sondea oportunidadnan nobo paso corda cu eynan tin studionan mas grandi etc. Tabata un dia comun den un gym cu mi a conoce J.Balvin y nos a cuminsa combersa. Gym ta algo cu a drenta den mi bida desde cu mi a bay mas deep den mi bida spiritual, cuminsa lesa mas buki riba esaki y cambia mi rutina di bida. Y tabata net 1 luna despues di e cambio aki cu mi a conoce J Balvin. Nos tabata amigo di gym. Despues e cos aki a pasa y awor nos ta tour hunto locual a fortifica nos amistad mas ainda.
MACHIKAAAAAA
E tabata un palabra cu mi tabatin graba den mi cabes pa hopi tempo y ora cu nan a pone e ‘beat’, mi a cuminsa canta ‘Machika Machikaaaa. Esaki tabata mi prome ‘club banger cu tabata di bay sali sin palabra malo den dje. Nunca mi por a pensa cu e lo bay zona den clubnan awor rond mundo”.
Jeon ta bisa di ta agradecido pa tur e sosten cu el a haya desde cuminsamento di su carera te cu awe. Sin esakinan e lo no por a dedica su mes 100% na musica. Desde lansamento mundial di Machika, na Aruba e comentarionan tabata sumamente positivo aunke aki aya tabatin algun no mucho bon. ‘Mi ta scohe pa concentra riba e positvo y e negativo mi ta blokea esaki paso mi sa cu semper esakinann lo t’ey”.
Mensahe na su fanaticonan adulto
Danki p’e sosten di semper y mi ta priminti cu mi lo keda mesun persona cu boso conoce.
Karol ta mi chick pa 6 aña caba, el a sostenemi den bon y den malo y e merece pa por ta bandimi y disfruta di ‘full e journey’ hunto cumi. Renchi ta bay cay pronto, e no por cay con cu ta hahahah!
