E dia cu tur cos a cambia: Jacky Thoonen

E dia cu Jacky Lopez no kier a imagina yega, ta loke e ta bibando awe cu e crisis di Covid-19.

Cu e curason di entrepreneur, hunto cu su casa Maarten, nan a logra crea un negoshi hopi unico den cu concepto pa resalta eventonan y fiestanan priva 4 aña pasa. E Idea original di Jacky y su casa tabata pa bende cocktails & smoothies na beach, pero como cu nan no a logra haya un ventvergunning, nan a cuminsa sondea otro posibilidadnan. Eynan ta unda e pareha a conclui cu locual semper tin demanda pe ta celebracion di un dia special serca tur hende. Eynan nan a adapta nan idea original y a bay un poco mas leu. “Imagina un beach party unda tur cos  por keda regla, di cuminda pa bebida, servicio,  sonido y luz, mueble y decoracion, photobooth, fotografo, un banda completo, pues tur cu e meta pa cumpli cu deseo di e cliente y hacie contento.  Asina Little One a nace. “Mi casa a transforma (Lola) e hippy classic Volkswagen Van cora, den un movable bar.  Esaki tabata nos prome concepto y di eynan nos a sigui crece te yega awor na crea 10 diferente conceptonan mas. Tur nos conceptonan ta un ‘eye catcher’ pa cualkier persona, pa pone e toke pa crea un evento of fiesta inolvidabel”.

Desde principio, The Little One a bira un concepto asina atractivo cu su mercadeo a bira tanto turista como local. Su staff a crece cu cada ampliacion te yega na 19 persona trahando dado momento hunto. “Cada evento cu nos a yega di haci ta sin duda memorabel. Eventonan extravagante nos tabatin varios manera un birthday party all out cu a contrata full un banda for di Panama, un DJ di Miami, luxury lounge area, cuminda y bebida sin limite, un set up hopi bunita pa 50 persona y 8 ora di celebracion! Di tur nos eventonan, nos a crea un bond cu nos guest y esey ta un sentimiento cu ta yenabo”

Tabata fin di December 2019 cu e noticia di e brote di un virus yama Covid-19 na China a cuminsa bira conoci. E noticia a cuminsa circula y a yega Aruba tambe na orea di Jacky. “ Mi ta corda cu mi a lesa den noticianan, tabata den e temporada cu el a cuminsa y tabata escalando na China. Mi tabata sa cu e lo yega Aruba, aunque cu mi no kier a imagina ki dia. Mirando con otro paisnan a cuminsa haya personan positivo pa e virus y mas y mas paisnan a cuminsa tuma medidanan di cancelacion di cualquier tipo di evento, mi tabata sa cu hopi liher, e lo ‘hit’ fuerte.

“Apenas a anuncia e prome persona positivo na Aruba, mi tabata sa cu cosnan lo ‘go sour’. Nos staff tabata preparando pa un evento corporativo importante ora cu nos a haya e cancelacion y nos mester a stop inmediatamente. Mayoria di nos eventonan a keda posponi. Solamente 1 a keda cancela te aworaki. Nos ultimo evento tabata amazing! Un bunita pareha, ambos tabata celebrando nan 50 cumpleaño cu amigonan y famia di diferente parti di mundo cu a bin huntu. Tur hende a goza cu (Rockabilly) nos jukebox unda  tur por a scohe nan cantica favorito y baila pareu.  Tabatin Happy hour cu ‘silly Dutch carnival costume y di nos dushi Aruba, tur mientras nan cuminda y bebidanan favorito a keda sirbi.

No tin nada mas dificil pa mira loke bo a crea, mester keda para y cu esaki ta for di bo control. Jacky ta admiti cu varios biaha su sentimientonan a domina y a kibre na varios ocasion. Pero sigur, e parti mas dificil tabata ora cu mester a enfrenta e realidad hunto cu su equipo. “ Esaki ta un di e momentonan di mas fuerte cu nos mester a enfrenta. Nos tur ta trata otro manera famia. Nos a purba di wanta cu nos staff pero mirando cu no tin un lapso di ki tempo nos lo por bolbe cuminsa opera bek,  nos mester a informa nos staff cu nos tin cu para un rato. Nan a compronde completamente locual ta pasando y nos tur a yora hunto paso e no ta ningun hende su fout. E ta duel nos cu nos mester pause pa un tempo. Nos staff a ricibi pago completo di Maart, nos no a desconta dianan di vacantie pasobra nos sa cu tin un regenboog despues di e awacero y nos lo  kier pa nan ta liber di scoge nan mesun dianan ora nan ta desea. Nos a entrega tambe makuto cu cuminda na nos staff y  a laga nan sa cu nos lo t’ey den bon y den malo hunto paso nos ta e TLO family”

Mi ta positivo cu lo tin un vacuna of un solucion mundialmente pa e virus. Ki tempo, esei ta dificil pa bisa.

Esaki ta bida, den 1 dia bo bida por cambia completamente. E ta algo cu nunca nos no a yega di experencia. Como Arubiano bo ta lubida di aprecia unda bo ta biba, di lanta y goza di nos dushi lama y cada bahada di solo.  Nos sa di keha ora cu tin hopi trabou, druk etc, pero mi sa cu tur hende na e momentonan aki ta miss e ‘stress’ di trabou ey”.

Aunque cu placa ta un necesidad, sin salud nos no tin nada toch, so cuid’e.  Lastimamente nos no por cambia locual ta pasando,  unico cos nos por haci ta acepta y ta cauteloso den locual nos ta gasta. Tur hende ta hayando un golpi duro como dunado di trabou of empleado. Sin negoshi tampoco no lo por tin trabou.  Porfavor tene consideracion y pasenshi pa nos tur por sigui p’adilanti!

Nomber: Jacky Lopez Thoonen

Nomber di negoshi y describi esaki: The Little One Aruba, ta un catering company cu cu ta ofrece un unique experience pa any kind of celebration. Wedding, rehearsal dinner, birthday party, corporate events even divorce! 

Tempo cu a cuminsa cu e negoshi: 31 di December 2016