E dia cu tur cos a cambia: Rosetty Eleonora

Ainda Rosetty no por kere cu su dianan, antes yena di cosnan pa haci pa su trabou, awor ta paralisa. Na cas, sin cosnan pa organisa, tur cos a cambia den un sera di wowo. 

Apenas aña a habri, Rosetty ta corda cu ya el a tende di Covid-19. Como cu e sa haci compra di hopi materialnan pafor di Aruba,  el a ripara cu diripiente disponibilidad di cierto materialnan a bira dificil. Motibo tabata cu e industria di China a sera causando cu hopi productonan a bay ‘out of stock’ na Merca. “Tambe negoshinan local Chines unda nos sa cumpra flor por ehempel, a cuminsa duna nos e pre-aviso cu lugarnan ta sera na China, pues cu nan lo no por haya ningun container mas. Esaki tabata ainda ora Covid-19 tabata na China solamente y ainda no a plama rond mundo”.

E realidad a ‘kick in’ pa Rosetty y su team, ora e yamadanan cu bo no kier pa drenta, a cuminsa drenta. Cancelacion y eventonan posponi den cuestion di dianan, di tanto local como gruponan internacional. Di casamento pa gruponan corporativo, decoracion y asina por sigui bay. Tur esaki den loke ta considera normalmente e ‘high season’ pa e tipo di trabou aki.

Nan lo bolbe ‘book’ e eventonan aki?

“Tur cos ta depende si e cliente a haci downpayment y/of reservacion cu hotel etc, e ora mi ta kere cu sigur nan lo bolbe y lo djis cambia fecha. Hopi a cambia fecha pa fin di aña of otro aña. Pero loke ta sigur ta cu nos no lo conta cu eventonan di afo pa e siguiente lunanan. Berdad ta tambe cu otronan a cancela y a bisa cu lo delibera si Aruba lo sigui ta un opcion pa nan. Nos tarea ta pa logra nan pospone y no cancela. Nos ultimo evento tabata 14 di Maart 2020. Tabata un wedding set-up, un set-up pa un grupo di afo na hotel y tambe un set-up chikito na un otro hotel. E momento ey mi no a realisa e gravedad, kizas mi tabata den ‘denial’ y tabata hopi positivo ainda cu cos no lo bira asina erg den nos region. Despues el a kick in”

“Te ainda mi ta basta fuerte pero e gana no ta faltami pa yora pero mi mester pusha mi mes pa sigui. Tin dianan mi ta haya poco “anxiety” mas bien paso bo no sa kico lo pasa. Y esaki ta djis e cuminsamento.  Mi ta kere cu nos ta hopi optimista y p’esey e realidad ainda no a dal nos completamente pero di otro banda, e hecho di no tin trabou pa tur e temponan aki ni tampoco sa kico lo bay pasa despues, ta fastioso”.

Stay strong, no ta facil, no gasta pa loco, si bo tin accountant, sinta cune. Informa ki posibilidad tin pa bo negoshi no desaparece. Ningun hende kier esey, specialmente si bo a inverti asina tanto den dje. Mantene bo mes positivo. Den mi caso mi tin pasenshi, mi no a ‘figure out’ tur cos pero mi sa cu mi lo ta o.k. y Perfect Team lo bolbe mas fuerte cu nunca!

Nomber: Rosetty Eleonora

Negoshi: Perfect Team Event Planners

Tempo: Ta cumpli 10 aña  5 di november 2020