Diana seccion TOB Carnival Group

Aña pasa Diana Helder-Lerma a haci su debut den carnaval pa prome biaha
cu su mesun seccion. Mirando su background den moda pa hopi aña, e tabata straño cu e no a tuma e paso aki di prome caba. Aparte di ta un cara conoci y un influencia grandi den moda na Aruba, por a mira Diana den varios paradanan anterior caba den e parti di massa, unda tabata categorise como un ‘seccion den massa’ di con bon prepara su kostuum tabata. “Mi tabatin hopi
aña ta participa berdad den massa unda na final, semper mi tabata termina
ta personalisa e kostuum di tur hende cu tabata join me. Mi tabata cambia, drecha y ‘upgrade’ e kostuum cu tabata keda entrega na nos. Eynan ta unda mi a realisa cu di berdad mi por a lanta mi mesun seccion, Diana ta cuminsa conta con tur cos a cuminsa. Asina el a subi caya pa prome biaha den carnival 64
cu 14 participante cu su tema Guardian of The Phoenix. Manera a spera, el a destaca tambe unda huradonan a dune e di dos lugar di seccion campeon, un reconocimento sigur motivante pa el a dicidi di bolbe c’un seccion awor den carnaval 65.

Esnan cu conoce Diana bon sa cu e ta un persona hopi organisa y e cualidad aki p’e, ta importante p’e aplica mescos cu den su negoshi, den su seccion tambe . “Mi ta gusta prepara cu tempo. Mi ta analisa kico tur mi mester y mi ta busca tur mi cosnan p’asina mi por ta bon prepara y na tempo. Mi no ta gusta traha den pura y cu preshon”, Diana ta splica. Esmas, e parti di preparacion e ta mire mas como un experiencia na lugar di un ‘tarea of trabou’. “Mi ta kere cu bo mester por disfruta di tur momento den bo preparashon y mas importante cambia locual bo no gusta, of mehora y embeyeze bo trabou mas”. E prome paso cu Diana ta tuma cu su seccion ta haci un analisis completo di e tema. “Mi ta informa mi mes bon. Mi ta investiga kico ta e ‘plot’ di dje y di eynan e proceso pa cuminsa ‘brainstorm’ con mi por trece esaki den e kostuum, ta cuminsa. Di unda su inspiracion ta bin? Di su amor y pasion pa carnival. “Mi ta considersa mi mes un persona creativo, artistico, e ta empirico den mi. Tur carnavalista ta artista riba nan mes”.

Pa hopi hende, e aspecto financiero por ta un drempel na momento di participa den carnaval. Aki ta unda e factor tempo ta yuda pasobra Diana ta kere cu si bo cuminsa trempan, bo por probecha y haya e mihor prijsnan riba hopi material. Pa carnaval 64, el a cumpra piedranan cu el a haya na bon prijs prome cu e aña y asina por a luci esakinan riba su kostuumnan na smaak sin e preshon di un gasto grandi. Su sapatonan, e ta percura pa esaki keda traha pa cada participante y ta algo cu e ta haci for di trempan.

Pero e realidad ta c’un seccion ta un grupo mas detaya y cu mas gasto. Hopi cos ta depende di con mahestuoso y luhoso bo kier mustra pero e prijs ta varia sigur pa minimo entre 3500-4500 florin. Pa loke ta e balor no financiero, Diana ta pensa cu esaki ta grandi; “ Esaki ta e luna mas importante di aña pa nos tur cu stima carnaval y pa Aruba su turismo y cultura. Cu carnaval nos ta mustra mundo nos cultura, nos esencia y amor pa e fiesta cultural aki. Nos ta ilustra cu color y alegria, nos amor pa nos dushi paraiso cu nos ta biba den. Cu tin caminda pa mehora, sigur. “ Mi ta haya cu e comishionnan mester ta activo trahando pa carnaval full aña of gran parti p’asina por duna tur hende cu ta forma parti di dje, nan balor cu nan merece . E preparashonnan mester ta mihor y dedica mas tempo na nan”.

Goz’e all the way; full e proceso for di cuminsamento di bo preparashon te ora cu bo subi caya, no importa si bo hilchi, bo headpiece kibra of bo bodypiece kibra, e por pasa cu tur hende. Djis disfruta di dje, tanto bal bo a gasta tur bo cen den carnival y bo no ta enjoy. SIGUI BAILA pasobra na final di dia, loke nos kier mustra mundo ta cu nos ta ONE HAPPY ISLAND LOADED WITH HAPPY PEOPLEEEEEEEE.