Huicio perfecto ta un pelicula local dirigi pa Angelo Croes cu grabacion y edicion den man di Roy Croes. En total, Huicio Perfecto tin aproximadamente 4 aña den produccion. Contando cu no menos di 30 actor estelar y 100 figura local cu a participa activamente, awe Aruba por ta orguyoso di un produccion cu potencial internacional di nivel halto y un calidad unico. Sin conta cu e ta un produccion na Papiamento. E pelicula aki ta un pelicula di 1 ora y 40 minuut y ta inclui escenanan romantico, di accion, drama y te hasta un poco di humor. Huicio Perfecto ta conta e storia di con Aruba a hunga un rol importante y tabata e yabi clave den mundo di petroleo, pero separa di e industria petrolero, tambe e storia ta encera un cartel criminal cu tabata bou investigacion di un escuadron elite di Polis. E escenanan di e pelicula aki a keda graba na varios sitio di nos isla. Esaki ta e elenco principal di Huicio Perfecto.
Alvin Molina [Django Maduro]
Edad: 44 aña
Perfil
Alvin ta un persona basta ‘easy going’ y social. “Comunicacion p’ami ta primordial den cualkier tipo di relacion. Mi profesion ta Districtschef di districto Oranjestad. Como hefe mi ta haña importante pa mi coleganan ta motiva, pa cuida mi coleganan, percura pa nan tin loke nan mester pa por haci nan trabou, percura pa cada un haña locual nan merece. Ami mester duna servicio na mi coleganan pa nan por duna un bon servicio na comunidad di Aruba”.
Personahe
Django Maduro ta hefe (capitan) di e ‘escuadron elite’ di cuerpo policial. E tin un pasion inmenso pa su trabou y e ta hopi bon den esaki. Su bida priva si no ta mesun organisa. E ta arogante, ta usa demasiado alcohol y ta un muheriego. Ora su ruman, Ruben Maduro wordo asesina, Django mester zorg pa su subrina Jessy. Django no ta gusta carga responsabilidad y esey ta hopi obvio den su accionnan. Conociendo su subrina, Django ta crea un punto debil p’e y su amor pa famia ta resalta.
Similaridad y diferencia
“Django y ami tin e mesun profesion y nos stima nos trabou. Tambe nos tin en comun nos amor pa famia. Mi uso di alcohol ta hopi limita y mi semper ta trata hende muher cu respet. Arogancia sigur no ta parti di mi caracter”.
Conseho
Huicio Perfecto ta un otro ‘stepping stone’ pa e industria di pelicula na Aruba. Poco poco nos conocimento y experencia ta crece dunando mas oportunidad pa esnan cu interes pa actuacion. Esnan cu tin e pasion pa actua por tuma les di actuacion. Na Aruba mes tin hende cu ta duna e les aki. Actuacion ta un bunita oportunidad pa ser un otro persona and ‘get away with it’! Ta importante pa bo conoce bo personahe den detaye y purba imagina cu bo ta e persona ey.
Gionathan Croes [Oficial Mendoza]
Edad: 36 aña
Perfil
Gionathan ta describi su mes como un hende di tur hende. “Mi ta un persona hopi outgoing, ‘fun’, fastioso y streng como tata y hopi ocupa den locual ta concerni mi trabou, planes te cu awor y tur locual cu mi kier logra pronto den un futuro sercano. Mi ta un persona di un caracter fuerte, mi a yega di ‘give up’ y perde casi tur cos den bida pero tambe recupera tur cos bek. Esaki ta bisa tambe cu mi ta un persona hopi determina den bida. Mi profesion ta un ‘First Class Meteorological Technician’ y un ‘Eerste Klasse Weer Observator’ cual ta encera cu mi ta duna informacion special di e tempo aki na Aruba pa aviacion p’asina pilotonan por procesa esaki ora di lanta vuelo of aterisa na Aruba”.
Personahe
Oficial Mendoza ta e ‘cool guy’ cu ta biba ‘on the edge’, e ta arogante, ‘cocky’, humoristico y ta gusta reta hende. Ora cu e capitan tuma decisionnan descabeya, oficial Mendoza, cu no tur ora ta di acuerdo cune, ta bisa esaki tambe sin pensa dos biaha. E ta hopi recto y directo y den cierto decisionnan cu su capitan tuma, cu no ta cuadra ta pone cu e ta tuma e iniciativa como leader of ta guia e capitan y mustr’e asina cu e decisionnan cu e tuma no ta esunnan di mas corecto.
Similaridad y diferencia
Entre ami y oficial Mendoza casi no tin diferencia. Nos ta hopi similar y ta como si fuera cu e personahe aki a wordo traha specialmente p’ami. Mi a sintimi liber di por ta mi mes den e personahe aki y di por a expresa mi mes manera cu mi ta, esta Gionathan, djis den un rol. Oficial Mendoza no ta perfecto y ami tampoco y esaki ta un di e cosnan cu mas mi ta identifica mi mes cune.
Conseho
Si ami tabata por c’un solo liña y sin por a prepara pa esaki, tur hende por. Aruba mester di hendenan cu por, kier y cu lo kier hiba mas produccionnan asina dilanti y cu mundo henter por mira cu nos isla tin hopi mas pa ofrece.
Abigail Sanchez [Jessie Maduro]
Edad: 14 aña
Perfil
Abigail ta un mucha muher di caracter firme, cu tin bon sentimento y ta hopi alegre. “Actualmente mi ta studiando na Colegio Arubano na Playa y mi ta den tercer aña di HAVO”.
Personahe
Mi personahe ta un mucha muher di 12 aña cu ta haci e deporte di landamento synchronisa cual e ta disfruta hopi. Jessie ta un personahe di bon sentimentonan y hopi decidido den locual cu e kier haci. Esaki alaves ta hacie poco ‘cabes duro’ tin biaha ora ta trata e relacion entre e cu su omo Django Maduro.
Similaridad y diferencia
E diferencianan entre ami y mi personahe ta cu nos tur dos tin un amor pa bestia y tambe pa e deporte di landamento synchronisa cual ami tambe ta disfruta di dje.
Conseho
E conseho cu mi tin ta pa tur locual bo kier haci, hacie cu amor y pasion. No tene miedo di soña paso soño ta existi pa bira realidad.
Stephanie Croes [Dr. Angela de Cuba]
Edad: 35 aña
Perfil
Stephanie ta describi su mes como un persona cu ta multifacetico ya cu e ta gusta ta ocupa cu diferente cosnan. “Mi ta un cantante, un actor, un contado di storia, un ciclista, un violinista, pa menciona algun. Mi gusta comparti y yuda otro descubri nan talentonan mientras hunto nos ta desaroya otro abilidadnan tambe specialmente den liderazgo y comunicacion. P’esey 7 aña pasa mi a bira miembro di e organisacion internacional educacional yama Toastmasters unda cu aña pasa na November mi a logra e reconocimiento mas halto den e organisacion. Mi ta identifica mi mes como un Toastmaster; cu p’ami ta encera un persona cu ta keda desaroya continuamente den su bida diario”.
Personahe
Mi personahe yama Dr. Angela de Cuba y e ta un Psycholoog. Dr. Angela ta cuida Jessie Maduro segun e ta evalua Django Maduro pa por tuma voogd di su subrina. Dr. Angela de Cuba por keda describi como un persona amabel, cu hopi compasion y basta persistente, profesional y directo.
Similaridad y diferencia
Den bida real mi a haya psicologia como parti di mi estudio na Universidad di Aruba. Den mi estilo di bida como un Toastmaster y den mi area di trabou mi ta traha hopi cu personanan di tur edad. Mi ta duna various tayer y discursonan di liderazgo y comunicacion. E sciencia di e mente humano y con emocionnan ta afecta nos comportacion ta un abilidad importante den mi bida diario mescos cu ta e caso den e bida di mi personahe Dr. Angela de Cuba. Den caracter mi ta hopi similar cu Dr. Angela de Cuba. Mi ta amabel, mi tin compasion, mi ta purba semper di ta profesional den tur circumstancia cu presenta y tambe mi por ta basta directo. Den bida real mi tin otro profesion, mi no ta core un Nissan Skyline cu stuur banda drechi y mi no ta biba na Playa sino na Tanki Leendert.
Conseho
“No laga oportunidadnan pasa bo dilanti sin cu bo tribi di participa den nan. Hopi biaha ta den e proceso nos ta realisa nos potencial, talento y ta desaroya abilidadnan nobo. Cada experiencia tin su rikesa. Mi a tribi na participa den Director Angelo Croes su prome pelicula “Natalia”, varios propaganda pa radio y television, video clip y tambe un serie local yama “Ciudad Oraño” dirigi pa Director Juan Francisco Pardo di CINEARUBA. Mi a tuma Drama como materia na Colegio Arubano y Arte Contemporaneo di John Freddy Montoya. Mi a desaroya mi abilidadnan di monodrama den Toastmasters y a haya curso di actuacion na nivel profesional di author/actor Charles Croes. Na Aruba hopi ta posibel, no limita bo mes”.
Alejandro Dirksen [Fiscal Jean Pierre]
Edad: 29 aña
Perfil
Alejandro ta un persona hopi trankilo riba su mes pafor di e bista publico. “Den bista publico mi tin hopi aña ta subi escenario pa diferente festivalnan como cantante y tambe como musico. Algun tempo atras mi interes den actuacion a crece y e oportunidad a presenta via di mi pareha cu a incluimi den e pelicula. Mi ta haci mi maximo esfuerso semper pa ta bon cu tur hende y yuda unda cu por. Mi ta den e proceso di cuminsa cu mi mesun negoshi. Mi caracter por keda describi como hopi calmo pero husto.
Personahe
Den e pelicula ‘Huicio Perfecto’ mi a actua como Jean Pierre. Jean Pierre sa cierto berdadnan cu ta remorde su consenshi y esaki ta haci cu e kier husticia. Jean Pierre su profesion ta Fiscal, officier di husticia di Aruba y Hulanda. Jean Pierre ta un persona hopi determina c’un caracter fuerte y kizas hasta un poco fresco den mi opinion.
Similaridad y diferencia
Jean Pierre ta un persona hopi determina pa logra su metanan y esaki ta algo cu ami tambe tin den bida real. Tambe Jean Pierre tin un manera di comunica informacion pa trece su punto dilanti den un forma hopi directo pa convence e publico cual a haci e actuacion mas facil ya cu ami tambe ta comunica den e forma aki. Tin algun momento cu Jean Pierre ta hopi ‘In your face’ y directamente tira palabra hopi bruto cual mirando bek, esey ta un parti cu no ta den mi. Esey a tuma training y confiansa den e team di actornan cu tur locual ta pasando ta actuacion y algo profesional.
Conseho
“E prome conseho pa un persona cu ta desea di actua ta pa kere den bo mes. Si actua ta algo cu ta den bo persona, puntra y papia tocante actuacion cu hende hendenan rond di bo. Keda sigui tras di e caminda di actuacion cu bo ta desea. Den mi caso mes, mi a canta semper den festivalnan di cultura manera dande y 18 di Maart y dera gai y mi semper a pensa di ta den un pelicula. Mi a menciona esey den pasado y e palabra ey a keda plama te na e momento cu e oportunidad a presenta. E parti chikito cu mi a cuminsa cune den training a crece bira un di e personahenan di mas grandi di e pelicula. Asina ta, comunica bo ideanan. Trece bo mes dilanti y no tene miedo di locual bo ta gusta. E persona nan pa haci bo meta bira realidad ta esnan cu ta bay bin dilanti den bo bida pa yudabo logra. E mesun personanan ey ta comparti e mesun pensamentonan di alegria cu abo tambe tin y sigur algun dia abo tambe lo logra yuda otro nan logra nan meta.
Luty Martinez [Huez Marie Therese Arends]
Edad: 63 aña
Perfil
Luty ta describi su mes como un persona c’un caracter ‘trankilo’. “Mi ta un persona hopi suave y amabel cu tur hende. Actualmente mi ta traha 20 ora como docente di Papiamento na EPB Hato. Oficialmente mi ta pensionado. Mi tin un doctorado den Educacional Leadership y awo mi ta siguiendo un otro opleiding di Bachelor den Papiamento”.
Personahe
Huez Marie Therese ta un huez den corte di husticia di Aruba. E ta un persona cu tin un caracter bastante stricto cu no ta tolera desorden den su sala di corte.
Similaridad y diferencia
Algun similaridad entre Marie Therese y ami den bida real ta cu nos ningun di dos ta gusta desorden of ‘bochincha’. Nos ta kere den husticia, ordo y disciplina. Nos ta convenci cu semper mester wak e bienestar di nos hobennan. Y nos tur dos ta bon studia. Un cos ta sigur cu Hues Marie Therese tin c’un cara sera, casi e no ta mustra ningun tipo di emocion mientras cu ami tin un cara cu exprecion mas amabel.
Conseho
Na momento cu bo scohe pa participa den un pelicula asina, of cualkier otro produccion sea cortometrahe of largometrahe, bo ta compromete bo mes. Bo ta forma parti di un equipo cu ta depende di bo presencia, aporte y sosten shen porciento. Bo mester tin hopi pasenshi. Tambe como actor, bo mester conoce bo personahe y bo mester siña bo texto. Si bo no ta comprende bo personahe y bo no sa bo texto, ta hopi dificil pa bo duna un actuacion convincente.
Joylene de Nobrega [Nariana]
Edad: 32 aña
Perfil
Joylene ta un mama soltera y ta hopi dedica na su yiu homber. “Mi a lanta na Hulanda y desde mi 18 aña mi a biba independiente. Kizas esey mes a yuda mi desaroya un caracter di ta un hende pragmatico, di ‘make things happen’ y sin perdemento di tempo pornada. Despues di caba mi estudio, mi a haya mucho falta di mi famia y a dicidi di bin biba y traha na Aruba. Actualmente mi tin mi mesun compania di marketing y evento”.
Personahe
Den ‘Huicio Perfecto’ mi ta Nariana, naci na Cuba y cu a pasa den un training intensivo pa bira un ‘Special Double Agent’ na un edad hopi hoben. Nariana a yega Aruba pa haña un parti den e negoshi ilegal di petroleo. E ta un persona c’un caracter hopi fuerte y no ta laga ningun hende para den su caminda pa strobe di logra locual e kier.
Similaridad y diferencia
Similaridad sigur ta cu tanto den actuacion como den bida real, mi ta un persona determina pa cana e caminda cu mi a visiona pa mi mes sin cu ta laga nada desvia mi di mi meta. E rol di un “double agent” no ta parti di mi caracter den bida real y aunke mi por ta fuerte, mi no ta “mal hende”. Den bida real mi por ta e persona fuerte cu bo ta mira den e pelicula, pero mi tin e curason mas moli tambe pa yuda mi prohimo. Di otro banda, den bida real no tin espacio pa tin dos cara sino mas bien mi ta kere den sinceridad, transparencia y compromiso.
Conseho
E industria di cine na Aruba no ta bay hacibo rico. Pues si bo ta busca pa haci esaki pa placa, mihor bo no ni cuminsa. Mi ta convenci cu mas tempo pasa, mas interes lo tin, kizas di fundacionnan internacional pa brinda mas sosten financiero y di guia pa hiba e industria pa un siguiente nivel. Pa awor, mira esaki como un hobby cu ta duna hopi satisfaccion ora mira e producto final.
