E ex-reina, presentadora y empresario, Daniela Alvarez, kende mester a amputa su pia pavia di un ischemia, a sali riba portada di e revista Colombiano Alo, cu su prome entrevista oficial den media. E condicion di Alvarez, cual ta describi como un condicion vascular cu ta causa un interupcion di fluho di sanger na por ehempel tejido y organonan cu consecuencia fatal. Den su entrevista, Daniela Alvarez ta habri su curason pa su prome entrevista na tur su siguidornan tanto na Colombia como otro parti di mundo.
“Mi ta siñando na accepta y stima mi mes y ta gradicido di por ta na bida y siña biba sin un pia” , Alvarez a bisa den un parti di su entrevista. El a bisa cu p’e, humor y positivismo ta fundamental. E ex-reina ta conta di su bida y e momento cu el a descubri un masa na su bariga cu no kier a bay y cu finalmente a resulta di tabata un condicion cu tabata atentando contra su bida.
Daniela Alvarez kende ta stima y bon conocir na Colombia, via su cuenta di instagram, a bin ta informa su siguidornan riba su condicion desde hopi trempan y di e momento cu a dicidi cu e unico forma pa salba su bida, tabata amputando su pia robes, te na su rudia. E miss a comparti e momento despues di e cirugia hunto cu su famia como tambe su proceso di recuperacion y hasta algun momentonan haciendo ehercicio y bailando na su cas.
Daniela Alvarez su postnan ta sigui inspira y desde loke a pasa cune, esakinan a haya atencion di cientos di miles di persona rond mundo. Su forma di maneha e situacion dificil den su bida, a bira un fuente di inspiracion pa hopi hende den situacionnan igual of diferente pero dificil, pa demostra cu e forsa interno tin biaha por yudabo sobrepasa e adversidadnan di mas dificil den bo bida.
