Ambos ta naci na Venezuela y tabata conoce otro caba pero tabata durante un vakantie na Aruba cu July y Ricardo a bolbe topa otro. E tabata un re-encuentro spontaneo DURANTE CARNAVAL, sin cu nan por a pensa cu di eynan, e fundeshi pa forma nan union, nan famia y nan negoshi lo cuminsa riba e mesun isla cu a percura pa e re-encuentro aki. Esaki ta e storia di July y Ricardo…stimando y trahando hunto na nan cas, Aruba.
ESPERAME
“Nos ta haci 28 aña hunto c’un bunita famia di 2 yiu Ricardo Daniel y Daniela hunto cu esaki, un lista di experiencia di trabou y amigonan na Aruba, concluyendo cu nos mesun negoshi awor yama Oak Restaurant. July ta corda cu despues di e re-encuentro aki, el a laga Ricardo na Aruba cu su number di telefon atras. Ricardo tabata trahando cu su famia cu tabata bibando na Aruba pero no a dura mucho cu el a dicidi cu e ta bolbe Valencia, pa caba cu su estudio. Un luna prome cu el a viaha, el a manda July un ramo di flor cu e mensahe ‘esperame’. Di eynan nan a dura 3 aña y mey ta studia hunto y a gradua den administracion y di eynan, nan a opta pa bin Aruba pa construi na futuro hunto.
