Awe Arnaldo Maduro, Naldo, conocido figura local como musico, presentador di noticia y entrepreneur a comparti riba su plataforma social cu siman pasa el a test positivo pa anticurpa di Covid-19 despues di a haci un test di sanger, mientras cu pa e PCR test mes di Covid-19 el a sali negativo mesora despues. Den un combersacion cu Naldo, el a conta nos di Xclusivo Magazine Online cu e ta corda cu durante temporada di carnaval el a haya un griep pisa pa 2 siman largo. “Mi a haya keintura, dolor di cabes y di curpa. Pues e sintomanan cu awe ta indicativo pa e virus di Covid-19”, Naldo a splica nos. E hecho di a sali positivo pa anticurpa di Covid-19 pero negativo pa e virus mes ta pone Naldo pensa cu el a sufri di e malesa aki den luna di februari caba, ora cu e tabata malo pa 2 siman, pues prome cu e pandemia a yega oficialmente nos costanan.
Otro relato ta di mi mes, Elizabeth Guanipa. “Tabata den prome siman di Januari 2020 cu mi a bira hopi malo. Curpa kibra, tosamento pisa y keintura leve tabata algun di e sintomanan. Esaki no tabata un griep comun. Den famia mi ta conoci cu no ta cualkier griep por bentami abou. Sinembargo, loke mi a cuminsa sinti dia 5 di Januari tabata hopi mas pisa; na e punto cu el a wantami riba cama pa varios dia, c’un curpa asina kibra cu apenas mi por yuda mi mes. Dianan mas laat mi yiu homber di 13 aña a haya un version mas ‘light’ di e griep. Mi tabata sa di un virus na China, for di bispo di aña nobo, pero basa riba e experiencia anterior cu Swine Flu y Sars, mi no por a ni imagina e posibilidad cu esaki lo por tabata na Aruba caba”.
Mas y mas hendenan ta cuminsa bin dilanti cordando un griep pisa cu nan a sinti na cuminsamento di 2020, ora cu ainda leu aya por a tende di un virus, cu no tabatin un nomber mes ainda oficialmente. Esaki sigur ta mustra cu tin indicacion suficiente pa evalua e posibilidad cu e virus lo por a cuminsa plama mas trempan di loke tur hende ta kere.
Experiencianan manera esun di Naldo y mi persona ta mas comun di loke hopi por a kere. Andy Gill, un musico famoso na Reino Uni a fayece dia 1 di Februari 2020, despues di tabata di gira na China na November 2019. Y asina tambe tin storia di mas casonan na Paris for di December 2019.
Cientificonan di Harvard a studia imagennan di satelite cu ta mustra un aumento den trafico pafo di cinco hospital na Wuhan, China entre e lunanan di Augustus y December 2019. E aumento den trafico aki a bay pareu c’un aumento den buskeda online di informacion riba sintomanan manera tosamente y diaree den e search engine Chines ‘Baidu’. Di su banda China a bisa cu e estudio ta ‘ridiculo’ y ta basa riba informacion ‘superficial. E pais a raporta, pa prome biaha, un cluster di casonan di pneumonia cu causa desconoci, dia 31 di December 2019. Mas laat China a bisa e Organisacion Mundial di Salud (WHO) cu e prome casonan a bin dilanti dia 8 di December.
Expertonan ta indica cu por ta inhusto pa usa e studio di Harvard como evidencia di un cover up of retraso di parti di China pa raporta e virus pasobra ta posibel cu esaki tabata plama den otro comunidad prome cu autoridadnan a tuma nota di dje. -Si abo ta sospecha cu bo por tabatin Covid 19 prome cu el a yega oficialmente Aruba, bo por haci un test di anticurpa-.
