Conoce Notario Chamila Tromp

Un profesional, pareha, mama di 4, su mes, un yiu, ruman y amiga di hopi ta e prome forma pa introduci Chamila Tromp. “E ta un satisfaccion enorme pa mi lanta tur dia bay traha na oficina. Mi ta gusta comparti experticio y experiencia den mi ramo cu otronan. Mi ta un persona responsabel y confiabel, pero tambe cu humor y amor pa otro. Un dia sin hari y stima, p’ami ta un dia perdi.

Chamila a studia Notarieel Recht na Vrije Universiteit, Amsterdam. “Na promer instante mi no tabata sa cu mi kier bay siña Notarieel Recht. Esaki ta algo cu mi a descubri durante di mi estudio di Nederlands Recht.

Mi a ripara cu cierto cursonan tabata gara mi atencion mas cu otronan, cual a pone cu mi a dicidi di haci e escogencia pa e estudio di Notarieel Recht cu ta un estudio apart di Nederlands Recht. Despues di un oferta di trabou cu notaris Faride Tjon Ajong na 2007, el a bolbe Aruba. “Mi a traha cu notaris Tjon Ajong 3 aña, sigui pa 4 aña cu notaris Marion Tromp y 6 aña cu notaris Ted Johnson”.

Dia 28 di januari 2020 lo keda un dia importante pa Chamila. Riba e dia aki el a haya e carta di minister Andin Bikker den su man confirmando su solicitud pa bira e siguiente Notario na Aruba a keda honra pa Corte Comun di Husticia y aproba door di Ministerraad. “P’ami no solamente e ta un logro personal den mi carera, pero tambe e ta un logro pa e comunidad di Aruba”.
Kico lo ta bo estilo den forma di traha como un notario na Aruba?
“Mi kier ta e Notario moderno, accesibel y mas cu tur cos, Husto y confiabel”.

“Pa esnan cu conocemi bon sa cu mi no ta un hende conformista. Si mi no ta di acuerdo cu algo, mi ta laga sa esaki y ta purba yega na un cambio. E ta un practica conoci pa hopi aña na Aruba y resto di reino cu e Notario ta yama su oficina na su mesun nomber. E motibo mas grandi p’ami no nombra mi oficina na mi mesun nomber ta paso cu mi pensamento encuanto un oficina di Notario ta diferente. Un oficina di Notario ta consisti di e Notario y su team di profesionalnan cu ta asisti’e c’un gran cantidad y variacion di trabou. Solamente trahando hunto e oficina di Notario ta yega na e servicio/producto final. E nomber NewLeaf ta stimula e sentimento di “nos como team” y no solamente “Chamila e Notario”. NewLeaf (literalmente “un blachi nobo”) ta nifica un capitulo nobo den Aruba su Notariado (un danki special na tur hende cu a haci esaki posibel) y tambe un capitulo nobo den e bida di e cliente. Por ehempel: e cliente cu ta cumpra su promer cas of e cliente cu ta bay incorpora un compania nobo pa realisa su soño”.

“NewLeaf a habri su portanan dia 2 di april 2020, mei mei di e Corona pandemic cu ami como e unico empleado. No tabata facil pa mi a cuminsa un oficina nobo den e temporada aki, pero p’ami NewLeaf ta un concepto di añanan di dedicacion y pasion cu ni sikiera Covid-19 por a strobami. No obstante e situashon, NewLeaf por a brinda su servicio di calidad na e cliente via medionan moderno di comunicacion. Mi ta hopi agradecido na e clientenan cu a scohe e servicio di NewLeaf den e temporada dificil aki.  Esaki tabata un experiencia nobo y inovativo p’ami. Cuminsando 1 di mei, NewLeaf  a crece c’un kandidaat-notario cu varios aña caba di experiencia, señora Carine Rafine, y un accountant/HR cu hopi aña di experiencia den ramo financiero y management, señor Andre Kelly. Nos ta premira un crecemento den empleado den e siguiente lunanan teniendo cuenta cu e mehoracion di estado socio-economico di nos pais y e efecto di esaki riba Notariado.

Loke mi ta gusta mas di mi trabou ta cu e ta un funcion hopi dinamico y e ta un reto den diferente sentido.  Na Aruba, c’un comunidad relativamente chikito, e Notario tin cu encarga su mes pa specialisa riba tur ramo legal pa e por brinda e mihor servicio na e clientenan. Banda di esaki, e Notario ta un dunador di trabou tambe cu tin cu siña y guia su empleadonan mientras e ta maneha un oficina di Notario alavez. Na final di dia, e Notario ta un sirbidor publico nombra door di Corte Comun di Husticia, cu tin cu tin proteha interes general y di otro banda e interes di su mesun oficina, pero esaki naturalmente semper den un balanse. Tur esakinan ta trece cune cu e trabou den su totalidad ta rekeri hopi dedicacion y responsabilidad.

“Mi ta convensi cu awor cu tin dos Notario extra, e servicio lo bay mehora pasobra simplemente tin mas competencia awor cual ta pone cu tur Notario lo haci mas di nan parti pa mehora nan servicio, entre otro door di ahusta procesonan interno. Tambe cu dos Notario extra, e trabou lo keda reparti over di 6 Notario enbes di 4, cual ta pone cu e Notarionan existente lo tin menos trabou y pues lo por concentra nan mes pa duna un servicio mas eficaz na publico.

Notario tin un buki di tarifa cu ta wordu estableci door di Corte Comun di Justicia. Si un cliente no ta di acuerdo cu e tarifa, e cliente por semper pidi reduccion na e Notario y e Notario lo evalua e caso den su totalidad y si e Notario ta di acuerdo, e por pidi Huez aprobacion pa reduci e tarifa stipula.

Mastanto bo ta wak esaki den casonan familiar, pero mi tin di bisa cu e ultimo añanan mi ta pensa nos Rubianonan ta hopi mas conciente di e cosnan cu nan mester regla cerca un Notario y e consecuencianan si nan no haci esaki. Por ehempel: un testamento of reparticion di bienes.

Mi ta pensa hopi cos den e mundo di Notario tin cu cambia, cuminsando na un cambio general di e Ordenansa di funcion di Notario cual tin cu regla e funcion di Notario mihor y detaya. Por ehempel: e parti di supervision riba e Notario y mihor entrada legal ora un Notario comete un malpractica den ehecucion di su trabou.

“Mi mision ta pa drecha e servicio y comunicacion entre e oficina di Notario y e cliente door di enfoca riba uso di tecnologia moderno y adaptacion di procesonan interno cu ta pone cu e trabounan ta wordo haci mas liher y eficaz.  Durante mi carera na Aruba, mi semper a pensa cu burocracia ta un di e factornan mas grandi na Aruba cu ta stroba nos como pais bay p’adilanti. Nos mester enfoca nos mes riba metodonan nobo di traha y tecnologia. Mi ta hopi contento mes cu instancianan manera Camara di Comercio, Kadaster y Departamento di Impuesto ta haciendo un progreso den esaki. Den bida bo ta siña di tur cos. Si nos a siña algo di Covid-19, ta cu nos como sociedad mester pensa mas concientemente kico nos por cambia den nos forma di biba y traha y ki metodonan nobo nos por usa pa stimula nos estado socio-economico y tambe generacionan nobo pa traha riba e mesun meta aki. NewLeaf su vision ta pa yega na y semper mantene harmonia riba diferente tereno: servicio, comunicacion y bienestar di tanto nos clientenan como nos empleadonan y medio ambiente.