E tabata varios luna di anticipacion pa aruba conoce finalmente, kende lo bira su proximo gobernador entrante e prome dia di e prome luna di 2017. Manera e nomber a bira conoci; pues cu tabata trata di un arubiano c’un trayectoria intachabel manera esun di alfonso boekhoudt, e acceptacion tabata inevitabel.

‘Un persona di hopi fe, un gran traductor, un persona hopi priva, e ta gusta musica, e ta gusta studia, e tin un famia grandi, esta un bon hefe’, tabata djis algun di e comentarionan cu nos a haya di personanan c’un momento dado di nan bida, a conoce nos di cuater gobernador pa pais aruba.

Pa haya sa un poco mas ken e persona cu ta ocupa e cargo asina honorabel aki entrante promer di januari 2017 ta, xclusivo magazine a aserca su excelencia alfonso boekhoudt, kende a otorga nos su promer entrevista y a comparti cu nos,algun potretnan intimo di su coleccion. Esaki ta su palabranan

“Mi tata Alfonso Boekhoudt (sr.) a lanta den bario di Rooi Spoki y mi mama Irena Rasmijn na Standard Ville, pues ambos di San Nicolas. Despues cu nan a casa (for di e union aki), ami a nace y pasa e prome tres añanan di mi bida den e casnan di pueblo na Van Lennepstraat. Como cu ami tabata e di cinco yiu, e famia mester a muda pa un otro cas na Dr. Schaepmanstraat. Loke mi por corda di mi infancia prome cu mi a cuminsa bai scol, ta cu nos tabata hunga masha hopi mes cu amigonan y bisiñanan riba caya y den cura di otro.

E tabata e tempo cu bisiñanan tambe tabata sinti nan mes responsabel pa e muchanan den bario lanta den un bon ambiente. Nos tabata conoce tur mama y tata di nos amigonan na nan nomber y tabata sa di respeta nan autoridad. Na edad di 4 aña mi a cuminsa atende Arubanita Kleuterschool y despues mi a bai Maria Regina School. Na scol semper mi tabata e mucha keto di klas. Na cas mi tabata hunga mas tanto cu mi ruman homber chikito (e unico cu a nace despues dimi)”.

“Nos famia tabata consisti di 6 ruman, di cual 3 ruman muher y 3 ruman homber. Como cu nos tata pa gran parti di su carera profesional tabata traha night-shift den hotel, practicamente ta nos mama tabata encarga su mes cu nos durante dia. Mi mama tabata gusta bai misa y for di chikito mi a cuminsa bai cune. P’esey un di mi nombernan di cariño den bario tabata ‘Pastor’. Nos tabata haci hopi actividad hunto como famia. Ehempelnan ta manera campa na Rincon, pasa dia na grotnan di Huliba y Tunnel of Love, picknick na Plantage Prins of bishita di un dia completo na propietario di plantacion di coco na Daimari. Mi tin hopi recuerdo di tur e sitionan aki di añanan ‘70, cual semper mi ta recorda c’un sentido di nostalgia”.

“Den mi hubentud mi a atende Colegio na San Nicolas for di principio cu el a habri na Pastoor Hendrikstraat. Un amigo di scol a sa di interesa mi pa cuminsa hunga futbol. Prome nos a hunga cu sponsoring di Charlies Bar Boozers, pero despues a carga e nomber di S.V. San Nicolas Jrs. Mi ta corda cu tabata dificil combina deporte cu estudio. Consecuentemente den siman mi tabata cana bai Biblioteca di San Nicolas pa lesa y studia. Añanan despues un ex-colega di mi a reconoce cu ami tabata e mucha homber blanco cu ta cana yen di buki door di Village pa bai Biblioteca. Un di e miembronan di nos team di e tempo aki tabata sr. John Dirks, cu mi a topa bek na Hulanda como mentor di nos studiantenan di Rotterdam”.

“Asina cu mi a cambia di Colegio di San Nicolas pa Colegio di Playa, mi a cuminsa hunga basketball. Prome nos a hunga bou di nomber di Chinese Clippers, pero despues nos a cambia pa YMCA San Nicolas. Den aña di examen na Colegio mi mester a stop cu Basketball pasobra mi no por a combina esey bon cu scol. Nos tabata hunga tin ora te laat den anochi y tabata yega marduga cas. E rumannan Nedd tabata contribuyente grandi di e exito di e team di e añanan aki, tanto como coach y como hungado di e ekipo”.

“Na edad di 15 aña mi tata a regalami un guitara spaño riba su mesun cumpleaños. Saliendo di un famia humilde, esaki tabata algo masha grandi mes. Mi no tabata por a toca ainda, pero mi a bira autodidacto. Di e tempo aki mi a desaroya mi stimacion pa musica y te cu awe ta gosa di scucha diferente genero”.

“Na principionan di aña ‘80 ainda tur studiante tabata depende di otorgacion di beca pa por bai haci un estudio den exterior. Despues di a caba HAVO na Colegio mi interes tabata pa bai studia matematica na Merca. Como cu mi no a haya beca, ya caba na edad hopi hoben mi a haya mi ta scohe pa bai traha mientras cu mi a purba di sigui capacitacion den orarionan di anochi. Mi a cuminsa traha na Antilliaanse Luchtvaart Maatschappij (ALM) como ground steward y a haci tur estudio disponibel riba tereno di computacion (Basic, Cobol, Programming etc.). Despues mi a cuminsa cu cursonan di contabilidad (boekhouding). Esaki a revela na mi un area di interes grandi cu a pone cu mi a haci esfuerso pa bai studia den exterior un bes mas.

Mientrastanto na Hulanda, a introduci e sistema di beca combina cu fianza pa tur studiante di HBO of Universidad, esaki a haci posibel pa mi haci un estudio den e ramo nobo di mi interes. Mi a studia sciencia empresarial cu specialisacion Comercial/Administrativo y despues a haci estudionan financiero (MBA, SPD)”.

“Despues di a caba mi estudio na HTS mi a dicidi di haci e estudio di MBA y tres certificado di SPD (ambos den ramo di contabilidad) den un solo aña escolar. Esaki tabata un reto basta grandi, cu a costa hopi oranan di sacrificio. Drumi laat y lanta tempran a bira un habito pa logra e estudio, pero cu no tabata laga ningun espacio pa practica ningun hobby. Pero despues cu mi a logra mi metanan mi por a bisa cu el a bale la pena haci e sacrficionan necesario”.

“Manera menciona anteriormente, mi prome trabou prome cu mi estudio den exterior tabata na ALM. Despues di mi estudio, mi a cuminsa traha na Arubahuis como asistente di e director interino. Den e funcion aki mi por a asisti diferente departamento di Arubahuis. E encargo principal sinembargo tabata pa cu e departamento di enseñanza encarga cu guia di studiantenan Arubiano na Hulanda”.

Despues di un termino di tres aña na Arubahuis mi a dicidi di regresa Aruba y a bai traha den sector priva den ramo di contabilidad y finanzas den diferente companianan di famia Mansur den zona liber. Durante e periodo aki mi tabata miembro di directiva tambe di e asociacion di zona liber den cual capacidad a atende hopi cu e leynan di zona liber, como tambe e desafionan di cumplimento cu rekisitonan di Caribbean Financial Action Task Force y Financial Action Task Force. Den e diferente funcionnan financiero mi tabata encarga como contralor den e diferente compania na Aruba, Boneiro, Corsou y San Andrés. Despues mi a bai mas den funcion di gerencia trahando pa un di e importadornan principal di productonan farmaceutico den e grupo di Manrique Capriles, cu na e momento ey tabata activo na Aruba, Boneiro, Corsou y St. Maarten.

Durante e periodo aki mi tabata encarga cu representacion di e compania den e asociacion di importadornan di productonan farmaceutico (VIPPA). Na aña 2005 mi a cuminsa traha cu Aruba Ports Authority (APA) NV den funcion di director. Mi a cumpli cu e encargo aki te ora cu na aña 2013 destino a pone cu mi mester a muda pa Hulanda. Na Hulanda mi a haya mi bek na Arubahuis, pero e biaha aki como e Ministro Plenipotenciario, representado Aruba den e conseho di minister di Reino”.

“Como hefe den diferente calidad y funcion, ami semper a trata pa laga tur hende traha cu placer pero produciendo lo maximo segun nan abilidad. Pero mi filosofia tabata semper cu abilidad ta algo cu bo ta cultiva entre otro door di capacitacion educacional.

“Mi a traha den diferente cultura empresarial, y a wak con den e diferente culturanan ey e hendenan tabata anda cu otro. Loke mas a impresionami semper ta pa wak con tin trahadornan cu sa di haya un bon balansa entre loke ta nan interes propio den nan trabou, sin perde na bista e interes di nan coleganan, cu tin biaha ta contradictorio na esun di nan. Esnan cu sa con pa mustra empatia pa cu otronan, ta logra establece un cultura di colegialidad fuerte cu ta supera hopi desafio c’un compania, organizacion of empresa por wordo confronta cune”.

“Mi a conoce mi esposa durante e temporada di mi estudio na Hulanda. Nos a topa otro como cu nos tabata atende e mesun iglesia y nos tabatin e mesun grupo di amistad. Nos a casa na 1992 y otro aña lo celebra nos boda di plata. Aunke mi tabata feliz prome cu mi a casa, mi esposa a añadi un dimension di rikeza familiar cu a completa mi bida den un forma unico.

Tambe semper el a sa di sostene mi den eherce mi diferente funcionnan tanto di trabou como tambe den comunidad pafor di oranan di trabou. E semper ta e forza (hopi biaha scondi) tras di mi motivacion pa fiha riba necesidad di otronan cu ta den mi alcance pa haci un diferencia pa nan. Pero mi stimacion p’e no ta basa riba kico e ta haci pa mi, sino ken e ta como persona. Ademas mi casa ta esun cu grandemente ta yuda mi ta un mihor persona, un mihor casa y un mihor tata”. “Dios a bendiciona nos matrimonio cu nuebe yiu, pero nos ta considera nos famia directo mas grandi door di mas ser keri cu nos a encontra riba nos caminda. Bienestar familiar ta un balor central den nos bida.

“Tempo a cambia y nos comunidad a cambia. E ta costa mucho mas esfuerzo pa mantene bo balornan familiar y spiritual intacto den e tempo aki. Nos yiunan di awendia ta yega mucho mas lihe den contacto cu influencianan y custumbernan aheno. Nan ta wordo confronta mas lihe cu e maldad cu tin pafor. Nan ta bou un presion constante pa adapta y participa na loke nan no ta aproba. P’esey e ta costa mucho mas dedicacion y guia pa mantene loke bo mes ta kere aden cu ta miho pa bo yiunan”.

“Na final di dia, union, bienestar y harmonia familiar ta mucho mas importante cu cualkier carera profesional y/of seguridad material. P’esey mi a dicidi di laga e seguridad di trabou na Aruba pa bai traha kizas den otro ramo y cu menos seguridad na Hulanda, pero basta cu nos famia por ta hunto. Claro cu awor, despues di mira con cos a bai, mi ta agradecido cu durante e periodo aki, toch mi por a sirbi mi pais y contribui na su desaroyo. Mi ta contento cu gobierno a brinda mi e oportunidad aki”.

“Musica ta algo cu ta nifica masha hopi mes den mi bida. Mi gusta scucha musica. Ademas, mi ta encanta disfruta di naturalesa den presencia di amigonan, famianan y mi sernan keri. Mi lo sigui disfruta di tur aspecto di naturaleza di Aruba, principalmente cu mi famia. Por lo demas, lo mi kier sigui extende un man (figurativo) na esnan cu tin mester di esey”.

“Na edad di 19 aña mi a cuminsa cu trabounan boluntario. Mi a haci esey tanto pa iglesia como tambe pa instancianan caritativo. E trabounan tabata ensera un variedad di diferente actividad y labor. Mi a yuda den construccion, den administracion, cu traduccion, cu imprenta di material, guia di grupo di mucha y hobennan, etc. Despues, na 2010 mi a encarga mi mes cu e trabounan di Cruz Cora na Aruba, como presidente di e hunta di directiva.

Mi tabatin e previlegio di encarga mi mes cu e organisacion aki, net despues cu a recauda un suma masha grandi mes pa yuda cu reconstruccion di Haiti, despues di e temblor teribel di 2010. E satisfaccion mas grandi cu mi tabatin den e funcion aki ta momento cu nos por a haci apertura y entregamento di e yabinan na esnan encarga cu e dos scolnan cu nos a logra construi y drecha. E impacto cu esaki ta haci te awe ainda riba bida di muchanan na Haiti ta masha grandi mes. Awor pa motibo di mi funcion mi no por ta encarga cu trabounan asina mas, pero mi ta purba semper di contribui den e forma cu mi por”.

“For di chikito mi tabata interesa pa conoce y sa mas di Dios. Ora cu mi a cuminsa bira adolecente e interes aki a bira mas serio, y mi a cuminsa busca di conoce y cumpli cu Dios su boluntad den mi bida. Fe a keda central p’ami, y mi ta realisa cu ta Dios ta esun cu a sa di guiami bida di tal forma, cu mi por haya no solamente felicidad pa mi mes y pa mi famia, sino cu tambe mi por comparti esaki cu otronan. Loke a cuminsa como un fe personal, ta guiami y yudami practica mas stimacion pa mi prohimo, locual nos mester mas di dje den e mundo di awendia.